തിരുവനന്തപുരം: സര്‍ക്കാര്‍ ജീവനക്കാരുടെ വേതനം അഞ്ച് തവണകളായി പിടിക്കാനുള്ള സര്‍ക്കാര്‍ തീരുമാനത്തിനെതിരെ പോലീസ് അസോസിയേഷന്‍. പോലീസുകാരുടെ 30 ദിവസത്തെ വേതനം പിടിക്കരുതെന്നും 15 ദിവസത്തേത് മാത്രമേ പിടിക്കാവൂ എന്നുമാണ് ആവശ്യം.
ശമ്പളം പിടിക്കുന്ന സാഹചര്യത്തില്‍ പങ്കാളിത്ത പെന്‍ഷനിലേക്കുള്ള റിക്കവറി നിര്‍ത്തിവയ്‌ക്കണമെന്നും പോലീസ് സംഘടന ആവശ്യപ്പെട്ടു. ശമ്പളം പിടിക്കുന്ന മാസങ്ങളില്‍ പോലീസുകാരുടെ പി.എഫ് ലോണ്‍ റിക്കവറിയും നിര്‍ത്തിവയ്‌ക്കണമെന്ന് ആവശ്യമുണ്ട്. ഇക്കാര്യങ്ങള്‍ ആവശ്യപ്പെട്ട് മുഖ്യമന്ത്രിക്ക് അസോസിയേഷന്‍ കത്ത് നല്‍കി.
കൊവിഡ് ചുമതലയിലുള്ള ആരോഗ്യപ്രവര്‍ത്തകരുടെയും പോലീസുകാരുടെയും വേതനം പിടിക്കരുതെന്ന ആവശ്യം ശക്തമായിരിക്കെയാണ് പോലീസ് അസോസിയേഷന്‍ നേരിട്ട് രംഗത്തെത്തിയിരിക്കുന്നത്. എന്നാൽ സര്‍ക്കാര്‍ ജീവനക്കാരുടെയും അധ്യാപകരുടെയും ഒരു മാസത്തെ ശമ്പളം പിടിക്കുന്നതില്‍ പുനഃപരിശോധനയില്ലെന്ന് ധനമന്ത്രി തോമസ് ഐസക് ആവർത്തിച്ച് വ്യക്തമാക്കി. ജീവനക്കാരില്‍ നിന്ന് പിടിക്കുന്ന ശമ്പളം തിരികെ നല്‍കും. അത് എപ്പോള്‍ തിരികെ നല്‍കണമെന്ന കാര്യത്തില്‍ പിന്നീട് തീരുമാനമുണ്ടാകുമെന്നും അദ്ദേഹം പറഞ്ഞു.
അസാധാരണമായ സാഹചര്യമാണ് നിലവിലുള്ളതെന്നും ഐസക് പറയുന്നു. സര്‍ക്കാര്‍ എല്ലാവരുടെയും വേതനം താത്കാലികമായി മാറ്റിവയ്‌ക്കുകയാണെന്നും ഇക്കാര്യത്തില്‍ ഏതെങ്കിലും ഒരു വിഭാഗത്തെ ഒഴിവാക്കില്ലെന്നും കഴിഞ്ഞ ദിവസം മുഖ്യമന്ത്രിയും വ്യക്തമാക്കിയിരുന്നു.
