ന്യൂദല്ഹി: കൊറോണ വൈറസ് വ്യാപനപ്രതിരോധത്തില് ഏര്പ്പെട്ടിരിക്കുന്ന ആരോഗ്യപ്രവര്ത്തകര്ക്ക് സുരക്ഷാ കവചം ഒരുക്കി കേന്ദ്രസര്ക്കാര്. കൊറോണ ബാധിച്ച തബ്ലീഗ് പ്രവര്ത്തകര് ചികിത്സക്കിടെ വ്യാപകമായി ആരോഗ്യപ്രവര്ത്തകരെ ആക്രമിച്ചിരുന്നു. ഇത്തരം അതിക്രമങ്ങള് അവസാനിപ്പിക്കുകയെന്ന ലക്ഷ്യത്തോടെ ഓര്ഡിനന്സുമായാണ് കേന്ദ്രസര്ക്കാര് രംഗത്തെത്തിയത്. ആരോഗ്യ പ്രവര്ത്തകരെ ആക്രമിക്കുന്നത് ജാമ്യമില്ലാ കുറ്റകൃത്യമാക്കി. ഗൗരവമുള്ള കേസുകളില് കുറ്റക്കാരെന്ന് കണ്ടെത്തുന്ന പക്ഷം ആറു മാസം മുതല് ഏഴു വര്ഷം വരെ തടവാണ് ഓര്ഡിനന്സില് വ്യവസ്ഥ ചെയ്തിരിക്കുന്നത്.
ഗുരുതരമായി പരിക്കേല്പ്പിച്ചാല് അക്രമിക്ക് ആറു മാസം മുതല് ഏഴു വര്ഷം വരെ ശിക്ഷ ലഭിക്കും. കൂടാതെ ഒരു ലക്ഷം മുതല് അഞ്ചു ലക്ഷം രൂപ വരെ പിഴ ചുമത്തുകയും ചെയ്യുമെന്ന് കേന്ദ്രസര്ക്കാര് അറിയിച്ചു. ആരോഗ്യ പ്രവര്ത്തകര്ക്കെതിരെ ഉണ്ടാകുന്ന അക്രമങ്ങളില് പ്രതിഷേധിച്ച് ഡോക്ടര്മാരുടെ സംഘടന (ഐ.എം.എ) ഇന്ന് സൂചനാ സമരം പ്രഖ്യാപിച്ചിരുന്നു. എന്നാല്, ഐ.എം.എ പ്രതിനിധികള് ആഭ്യന്തര മന്ത്രി അമിത് ഷായുമായി നടത്തിയ ചര്ച്ചയ്ക്കൊടുവില് സമരം പിന്വലിച്ചിരുന്നു. തുടര്ന്ന് മണിക്കൂറുകള്ക്കുള്ളിലാണ് കേന്ദ്രസര്ക്കാര് പുതിയ നിയമനിര്മാണം നടത്തിയത്.
ആക്രമത്തിന്റെ സ്വഭാവം ഗൗരവമുള്ളതല്ലെങ്കില് കുറ്റക്കാര്ക്ക് മൂന്നു മാസം മുതല് അഞ്ചു വര്ഷം വരെ തടവുശിക്ഷ ലഭിക്കാം. ഇവരില്നിന്ന് അമ്പതിനായിരം മുതല് രണ്ട് ലക്ഷം രൂപ വരെ പിഴയീടാക്കാനും ഓര്ഡിനന്സില് വ്യവസ്ഥയുണ്ട്. ജാമ്യമില്ലാ വകുപ്പുകള് പ്രകാരമായിരിക്കും കേസ്. 30 ദിവസത്തിനകം അന്വേഷണം പൂര്ത്തിയാക്കി കുറ്റപത്രം സമര്പ്പിക്കണമെന്നും ഓഡിനല്സില് പറയുന്നു. ആരോഗ്യ പ്രവര്ത്തകരുടെയോ സ്ഥാപനങ്ങളുടെയോ വാഹനങ്ങള്ക്ക് കേടുപാടു വരുത്തിയാല് വാഹനത്തിന്റെ മാര്ക്കറ്റ് വിലയുടെ ഇരട്ടിവില കുറ്റക്കാരില്നിന്ന് ഈടാക്കുമെന്നും കേന്ദ്രസര്ക്കാര് വ്യക്തമാക്കി.
രാജ്യത്തെ ഡോക്ടര്മാരുടെ സുരക്ഷയും അന്തസും സംരക്ഷിക്കപ്പെടുമെന്ന് അമിത് ഷാ നേരത്തെ വ്യക്തമാക്കിയിരുന്നു. ആരോഗ്യ പ്രവര്ത്തകര്ക്കെതിരെയുള്ള ആക്രമണങ്ങളില് പ്രതിഷേധിച്ച് വെള്ളക്കോട്ട് ധരിച്ചുകൊണ്ട് രാജ്യമെമ്പാടുമുള്ള ഡോക്ടര്മാരോടും ആശുപത്രികളോടും മെഴുകുതിരികള് കത്തിക്കാന് ഡോക്ടര്മാരുടെ സംഘടന ആവശ്യപ്പെട്ടിരുന്നു. പുതിയ ഓര്ഡിനസ് പുറത്തിറങ്ങിയതോടെ കേന്ദ്രസര്ക്കാരിന് നന്ദിയുമായി ആരോഗ്യപ്രവര്ത്തകര് രംഗത്തെത്തിയിട്ടുണ്ട്.
