ലഖ്‌നൗ : തബ്‌ലീഗ് സമ്മേളനത്തില്‍ പങ്കെടുത്തതിനെ തുടര്‍ന്ന് കോവിഡ് സ്ഥിരീകരിച്ച വയോധികന്‍ ആശുപത്രിയില്‍ നിന്നും ചാടിപ്പോയി. സാഫിദ് മിയാന്‍ എന്ന പേരുള്ളയാളാണ് തുണികൊണ്ട് കയര്‍ ഉണ്ടാക്കി ഇയാള്‍ ആശുപത്രിയില്‍ നിന്നും ചാടിപ്പോവുകയായിരുന്നു. ഉത്തര്‍പ്രദേശിലെ ബാഗ്പത് ആശുപത്രിയില്‍ ഐസൊലേഷനില്‍ കഴിഞ്ഞ് വരികയായിരുന്നു ഇയാള്‍.
മിയാന്‍ താമസിച്ചിരുന്ന മുകളിലത്തെ നിലയിലെ ഐസൊലേഷന്‍ വാര്‍ഡിന്റെ ജനല്‍ തകര്‍ത്ത് സ്വന്തം തുണികള്‍ കൊണ്ട് കയറുണ്ടാക്കി താഴേക്ക് ഇറങ്ങിയാണ് ആശുപത്രിയില്‍ നിന്നും ചാടിപ്പോയത്. തബ്‌ലീഗില്‍ പങ്കടുത്തതിനെ തുടര്‍ന്നാണ് ഇയാളെ ആദ്യം നിരിക്ഷിക്കുകയും രോഗം സ്ഥിരീകരിച്ചതോടെ ഐസൊലേഷനില്‍ ആക്കുകയായിരുന്നു.
മിയാന്‍ ആശുപത്രിയില്‍ നിന്നും ചാടിപ്പോയതോടെ ഇയാളുടെ ചിത്രം പ്രചരിപ്പിക്കുകയും തിരിച്ചറിയുന്നവര്‍ പോലീസിനെ അറിയിക്കണമെന്നും അധികൃതര്‍ നിര്‍ദ്ദേശം നല്‍കിയിരുന്നു. തുടര്‍ന്ന് പ്രദേശത്തെ ചെങ്കല്‍ചൂളയില്‍ നിന്നുമാണ് മിയാനെ കണ്ടെത്തിയത്. ഇയാളെ അറസ്റ്റ് ചെയ്ത് വീണ്ടും ആശുപത്രിയില്‍ ആക്കിയതായി ബാഗ്പത് പോലീസ് അറിയിച്ചു.
നേപ്പാളില്‍ നിന്നും തബ്‌ലീഗില്‍ പങ്കെടുക്കുന്നതിനായി എത്തിയതാണ് മിയാന്‍. കഴിഞ്ഞ വെള്ളിയാഴ്ച നടത്തിയ പരിശോധനയിലാണ് ഇയാള്‍ക്ക് കോവിഡ് സ്ഥിരീകരിച്ചത്. 17 പേരടങ്ങുന്ന സംഘത്തോടൊപ്പമാണ് ഇയാള്‍ ഇന്ത്യയില്‍ എത്തിയത്. ഇയാള്‍ക്കൊപ്പമുണ്ടായിരുന്ന ബാക്കിയുള്ളവരും നിരീക്ഷണത്തിലാണ്.
കഴിഞ്ഞ ദിവസം ഹരിയാനയിലെ കര്‍ണലിലെ ആശുപത്രിയില്‍ നിന്ന് സമാന രീതിയില്‍ രക്ഷപ്പെടാന്‍ ശ്രമിച്ച 55 കാരന്‍ ആറാം നിലയില്‍ നിന്ന് താഴേക്കിറങ്ങാനുള്ള ശ്രമത്തിനിടെ പിടിവിട്ടുവീണ് മരിച്ചിരുന്നു. തബ്‌ലീഗില്‍ പങ്കെടുത്ത് നിരീക്ഷണത്തില്‍ കഴിയുന്നവര്‍ ആരോഗ്യ പ്രവര്‍ത്തകര്‍ക്ക് വന്‍ തലവേദനയാണ് സൃഷ്ടിക്കുന്നത്. ഇവരില്‍ നിന്നുള്ള പെരുമാറ്റം അസഹ്യമായതിനെ തുടര്‍ന്ന് നിരിക്ഷണത്തില്‍ കഴിയുന്ന തബ്‌ലീഗി പ്രവര്‍ത്തകരെ ശുശ്രൂഷിച്ചിരുന്ന വനിതാ ഡോക്ടര്‍മാരേയും ആരോഗ്യ പ്രവര്‍ത്തകരേയും യുപി മുഖ്യമന്ത്രി പിന്‍വലിച്ചിരുന്നു.
