തിരുവനന്തപുരം: കേരളത്തിലെ രണ്ടാമത്തെ കൊറോണ മരണം റിപ്പോര്ട്ടുചെയ്ത തിരുവനന്തപുരത്തെ പോത്തന്കോടും പരിസരപ്രദേശങ്ങളും പൂര്ണമായും അടച്ചിടും. മൂന്നാഴ്ചത്തേക്കാണ് അടച്ചിടുക. പോത്തന്കോട് പഞ്ചായത്തും മേലേമുക്ക് അരിയോട്ടുകോണം, മേലേമുക്ക് എന്നിവിടങ്ങളും പോത്തന്കോട് പഞ്ചായത്തിനോട് ചേര്ന്നുകിടക്കുന്ന മൂന്നുകിലോമീറ്റര് ചുറ്റളവിലുള്ള പ്രദേശങ്ങളുമാണ് നിരീക്ഷണ പരിധിയില് ഉള്പ്പെടുക.
മരണപ്പെട്ട രോഗിയുടെ റൂട്ട്മാപ്പ് ഇതുവരെ പ്രസിദ്ധീകരിക്കാന് കഴിഞ്ഞിട്ടില്ല. കാസര്ഗോഡ് നിന്ന് എത്തിയവരും വിദേശത്തു നിന്നെത്തിയവരും അടിയന്തിരമായി 1077 എന്ന നമ്പരിലേക്ക് ബന്ധപ്പെടാന് സര്ക്കാര് നിര്ദേശം നല്കി.
മരണപ്പെട്ട അബ്ദുള്അസീസിന് രോഗം പടര്ന്നത് എവിടെ നിന്നാണെന്ന് വ്യക്തമായിട്ടില്ല. ഇദ്ദേഹം പങ്കെടുത്ത ചടങ്ങുകളില് എത്തിയ പ്രവാസികളെയും കൊവിഡ് രോഗികള് കൂടുതലുള്ള ജില്ലകളില് നിന്നുള്ളവരേയും കണ്ടെത്തി പരിശോധിക്കാനുള്ള ശ്രമത്തിലാണ് അധികൃതര്.
