കൊച്ചി : കോവിഡ് 19 നിരീക്ഷണത്തില് ഇരിക്കേ ആലപ്പുഴ മെഡിക്കല് കോളേജ് ആശുപത്രിയില് നിന്നും ഒളിച്ചോടിയ വിദേശികളെ കണ്ടെത്തി. കൊച്ചി അന്താരാഷ്ട്ര വിമാനത്താവളത്തില് നിന്നുമാണ് ഇവരെ കണ്ടെത്തിയത്. യുഎസ് പൗരന്മാരായ ഇരുവരും ദോഹ ഫ്ളൈറ്റില് രാജ്യം വിടാനുള്ള ശ്രമിക്കുന്നതിനിടെ സുരക്ഷാ ഉദ്യോഗസ്ഥരുടെ കൈയില് അകപ്പെടുകയായിരുന്നു.
മാര്ച്ച് 9നാണ് ഇരുവരും കൊച്ചിയിലെത്തിയത്. ഇവരില് ഒരാള്ക്ക് പനിയും തുടര്ന്നുള്ള രോഗലക്ഷണങ്ങളും കാണിച്ചതിനെ തുടര്ന്നാണ് ആശുപത്രിയില് പ്രവേശിപ്പിച്ചത്.
വൈറസ് ബാധ പടരുന്ന സാഹചര്യത്തില് സംശയ നിവാരണത്തിനായി ഇവരോട് കൊറോണ പരിശോധനയ്ക്ക് വിധേയരാകാനായി ഡോക്ടര്മാര് ആവശ്യപ്പെട്ടിരുന്നു. അതിനിടെ ഇരുവരും അധികൃതരുടെ കണ്ണ് വെട്ടിച്ച് മുങ്ങുകയായിരുന്നു.
