എംഇഎസിന്റെ മറവില്‍ കോഴിക്കോട്ടും തട്ടിപ്പ്; രജിസ്റ്റര്‍ ചെയ്ത ഭൂമി അഴിമതിയിലൂടെ സമ്പാദിച്ചതെന്ന് ആക്ഷേപം

കോഴിക്കോട്: എംഇഎസിന്റെ പേര് മറയാക്കി പ്രസിഡന്റ് ഡോ. ഫസല്‍ ഗഫൂര്‍ കോഴിക്കോട്ട് തട്ടിയെടുത്തത് 50 സെന്റ് ഭൂമിയെന്ന് ആരോപണം. കോഴിക്കോട് കോര്‍പ്പറേഷന്‍ പരിധിയില്‍ മിനി ബൈപാസിന് സമീപം രണ്ടേണ്ടക്കര്‍ 54 സെന്റ് സ്ഥലമാണ് ഫസല്‍ ഗഫൂര്‍ വാങ്ങിയത്.  

ഇതിന് ശേഷം ഈ ഭൂമി സ്വന്തം കമ്പനിക്കും, എംഇഎസിനും മറിച്ചു വിറ്റു. ഇതിന്റെ ഒരു ഭാഗം ഫസല്‍ ഗഫൂറിന്റെയും കുടുംബത്തിന്റെയും പേരില്‍ രജിസ്റ്റര്‍ ചെയ്തു. സ്വന്തം പേരില്‍ രജിസ്റ്റര്‍ ചെയ്തിരിക്കുന്ന ഭൂമി അഴിമതിയിലൂടെ സമ്പാദിച്ചതാണെന്നാണ് ആക്ഷേപം.  

90 സെന്റ് സ്ഥലം ഫസല്‍ ഗഫൂറിന്റെ മകന്‍ ഡോ. റഹീം ഫസല്‍ ജനറല്‍ മാനേജറായ ഫെയര്‍ഡീല്‍ ഹെയ്ല്‍നസ്സ് പ്രൈവറ്റ് ലിമിറ്റഡിന് സൂപ്പര്‍ സ്‌പെഷ്യാലിറ്റി ആശുപത്രി നിര്‍മിക്കാനും,  ഒരേക്കര്‍ 14 സെന്റ് സ്ഥലം എംഇഎസ് ആസ്ഥാന മന്ദിരം നിര്‍മിക്കാനും വിറ്റു.  

ശേഷിക്കുന്ന 50 സെന്റ് ഫസല്‍ ഗഫൂറിന്റെയും ഭാര്യയുടെയും മക്കളുടെയും പേരിലായി രജിസ്റ്റര്‍ ചെയ്തു. ഒന്നിച്ച് കിടക്കുന്ന വസ്തു നിലവില്‍ വിവിധ ആധാരങ്ങളാക്കി രജിസ്റ്റര്‍ ചെയ്തു എന്ന് മാത്രം.താസ് ഡെവലപ്പേഴ്‌സില്‍ നിന്ന് സെന്റിന് നാലു ലക്ഷം രൂപ നിരക്കിലാണ് വസ്തു വാങ്ങിയത്. എന്നാല്‍ ആധാരത്തില്‍ കാണിച്ചിരിക്കുന്നത് സെന്റിന് ഒരു ലക്ഷം മാത്രമാണ്.  

ഇത്തരത്തില്‍ വാങ്ങിയ സ്ഥലം സ്വന്തം കമ്പനിക്ക് വേണ്ടി 90 സെന്റ് സെന്റൊന്നിന് എട്ട് ലക്ഷത്തിനും,  എംഇഎസിന് ഒരേക്കര്‍ 14 സെന്റ് സ്ഥലം, സെന്റൊന്നിന് ആറു ലക്ഷത്തിനുമാണ് വിറ്റത്. ഈ വ്യാപാരത്തിനിടെ നടത്തിയ അഴിമതിയിലൂടെ സമ്പാദിച്ചതാണ് 50 സെന്റ് സ്ഥലമെന്നാണ് എംഇഎസിലെ ഒരു വിഭാഗം ആരോപിക്കുന്നത്. ഈ വസ്തുവിന് മാത്രം അഞ്ച് കോടി രൂപ മൂല്യം വരും.  

ബൈപ്പാസില്‍ വാങ്ങിയ സ്ഥലത്ത് കോഴിക്കോട് കോര്‍പ്പറേഷനെ കൈയിലെടുത്താണ്് ഫസല്‍ ഗഫൂര്‍ സൂപ്പര്‍ സ്‌പെഷ്യാലിറ്റി ആശുപത്രിയുടെ നിര്‍മാണം ആരംഭിച്ചത്.

മൂന്ന് വര്‍ഷത്തിന് ശേഷം തണ്ണീര്‍ത്തടം നികത്തി അനധികൃത നിര്‍മാണം നടക്കുന്നതായി ഹൈക്കോടതിയില്‍ ഹര്‍ജി വന്നു. ഈ ഹര്‍ജിയില്‍ കോഴിക്കോട് കോര്‍പ്പറേഷന്‍ സെക്രട്ടറിയെയും കക്ഷി ചേര്‍ത്തിരുന്നു. ഹര്‍ജി പരിഗണിച്ച ഹൈക്കോടതി, നിയമ വിരുദ്ധ നിര്‍മാണം നിര്‍ത്തി വയ്‌ക്കാന്‍ ഉത്തരവിടുകയായിരുന്നു.  

കോഴിക്കോട് കോര്‍പ്പറേഷന്‍ ഹൈക്കോടതിയില്‍ നല്‍കിയ സത്യവാങ്മൂലത്തില്‍ ആശുപത്രി നിര്‍മാണത്തിന് അനുമതി നല്‍കിയിട്ടില്ലെന്ന് വ്യക്തമാക്കിയതോടെ നിയമവിരുദ്ധ നിര്‍മാണം പൂര്‍ണമായി നിലയ്‌ക്കുകയായിരുന്നു.  

എന്നാല്‍ എംഇഎസ് ആസ്ഥാന മന്ദിരത്തിന് തറക്കല്ലിട്ടതല്ലാതെ മറ്റ് നിര്‍മാണം ഒന്നും ഇക്കാലമത്രയും നടന്നിട്ടില്ല.  അതേസമയം എംഇഎസും ഫെയര്‍ഡീല്‍ ഹെയ്ല്‍നസ്സ് പ്രൈവറ്റ് ലിമിറ്റഡ് കമ്പനിയും എഗ്രിമെന്റൊന്നും ഉണ്ടാക്കിയിട്ടില്ലെന്ന് 2018 ഫെബ്രുവരി 28ന്, ടിപി6/ടിപി8/11081/18 പ്രകാരം ലഭിച്ച വിവരാവകാശ രേഖയില്‍ വ്യക്തമാക്കിയിട്ടുണ്ട്.