കോട്ടയം: കോവിഡ് 19 രോഗികളെ ശുശ്രൂഷിക്കുന്നതിന്റെ പേരിൽ നഴ്സുമാരെ വാടകവീട്ടിൽ നിന്നും ഇറക്കിവിട്ടു. കോട്ടയം മെഡിക്കൽ കോളേജിൽ ജോലി ചെയ്യുന്ന മൂന്ന് മെയിൽ നഴ്സുമാരെയാണ് വീട്ടുടമ ഇറക്കിവിട്ടത്. മെഡിക്കൽ കോളേജിന് സമീപമുള്ള കസ്തുർബാ ജംഗ്ഷനിലെ വീട്ടിലെ മുകളിലത്തെ നിലയിലായിരുന്നു ഇവർ താമസിച്ചിരുന്നത്.
ഇന്ന് രാവിലെ വീട്ടിലേക്ക് പോകുമ്പോൾ താഴത്തെ നിലയിൽ താമസിക്കുന്ന വീട്ടുടമ നഴ്സുമാരോട് ഇനി ഇവിടെ താമസിക്കേണ്ടെന്ന് പറയുകയായിരുന്നു. കൊറോണ ബാധിതരെയാണ് ഇവർ ചികിത്സിക്കുന്നതെന്ന് ആരോ പറഞ്ഞ് വീട്ടുടമ അറിഞ്ഞതോടെയാണ് വീട്ടിൽ നിന്നും മാറാൻ ആവശ്യപ്പെട്ടത്.
പ്രശ്നം നഴ്സുമാർ മെഡിക്കൽ കോളേജ് സൂപ്രണ്ടിനെയും കോളേജ് പ്രിൻസിപ്പലിനെ അറിയിച്ചെങ്കിലും താമസ സൗകര്യം ഒരുക്കി നൽകിയിട്ടില്ല. ഇതേ തുടർന്ന് ഇവർ മെഡിക്കൽ കോളേജിലെ മുകളിലത്തെ നിലയിലെ പൊട്ടിപ്പൊളിഞ്ഞ മുറിയിലേക്ക് മാറി. പ്രശ്നത്തിൽ ജില്ലാ ഭരണകൂടം ഇടപെട്ടിട്ടുണ്ട്.
