ന്യൂദല്‍ഹി: കോണ്‍ഗ്രസ് നേതൃത്വത്തിന്റെ പെരുമാറ്റ രീതി ഇതേ രീതിയിലാണെങ്കില്‍ അധികം കാലതാമസമില്ലാതെ പാര്‍ട്ടിയില്‍ ബാക്കിയുണ്ടാകുക സോണിയയും രാഹുലും മാത്രമായിരിക്കുമെന്ന് പരിഹസിച്ച് ബിജെപി വക്താവ് ഷാനവാസ് ഹുസൈന്‍. രാഹുല്‍ ഗാന്ധിയുടെ അടുത്ത അനുയായിയുമായിരുന്ന ജ്യോതിരാദിത്യ സിന്ധ്യ പാര്‍ട്ടിയില്‍ നിന്നും രാജിവെച്ചതോടെ കോണ്‍ഗ്രസ് നേതൃത്വം പ്രതിസന്ധിയിലായിരിക്കുകയാണെന്നും അദ്ദേഹം പറഞ്ഞു.
കോണ്‍ഗ്രസ് മുതിര്‍ന്ന നേതാവായ സച്ചിന്‍ പൈലറ്റിനോടും ജ്യോതിരാദിത്യ സിന്ധ്യയോട് പെരുമാറിയ അതേ രീതിയിലാണ് പാര്‍ട്ടി പെരുമാറുന്നത്. സച്ചിന്‍ പൈലറ്റിന്റെ ഫോട്ടോകള്‍ അവരുടെ പോസ്റ്ററുകളില്‍ പോലും കോണ്‍ഗ്രസ് ഉള്‍പ്പെടുത്തിയിട്ടില്ല. ഉന്നത നേതൃത്വത്തിന്റെ പ്രവര്‍ത്തനത്തില്‍ യുവാക്കളും മറ്റ് പാര്‍ട്ടി പ്രവര്‍ത്തകരും ആശങ്കയിലാണെന്നും ഷാനവാസ് ഹുസൈന്‍ വ്യക്തമാക്കി.
‘അവര്‍ എത്ര നേതാക്കളെ ഇനി പുറത്താക്കും? അവര്‍ തങ്ങളുടെ നേതാക്കളെ ഇതുപോലെ പുറത്താക്കുന്നത് തുടരുകയാണെങ്കില്‍ സോണിയയും രാഹുല്‍ ഗാന്ധിയും മാത്രമേ കോണ്‍ഗ്രസില്‍ അവശേഷിക്കുകയുള്ളൂ. അതിന് അധികം കാലതാമസമുണ്ടാകില്ല’. ഹുസൈന്‍ പറഞ്ഞു.
