തിരുവനന്തപുരം: ഫെബ്രുവരി 29ന് ഇറ്റലിയില്‍ നിന്ന് കേരളത്തിലെത്തിയവരില്‍ രോഗം സ്ഥിരീകരിച്ച പശ്ചാത്തലത്തില്‍ ഇവര്‍ സഞ്ചരിച്ച ഖത്തര്‍ എയര്‍വെയ്‌സിന്റെ QR 126, QR 514 എന്നീ വിമാനത്തിലെത്തിയവരേയും പരിശോധനയ്ക്ക് വിധേയമാകണമെന്ന് ആരോഗ്യമന്ത്രി കെ.കെ. ശൈലജ.
QR 126 ഖത്തര്‍ എയര്‍വെയ്‌സ് വിനീസ് ദോഹ ഫ്‌ലൈറ്റിലാണ് ഇവര്‍ ദോഹയിലെത്തിയത്. ദോഹയില്‍ ഒന്നര മണിക്കൂര്‍ കാത്തിരുന്നു. ശേഷം ദോഹയില്‍ നിന്ന് QR 514 എന്ന ഫ്‌ലൈറ്റില്‍ രാവിലെ 8.20ന് കൊച്ചിയില്‍ എത്തി. അതിനാലാണ് ഈ രണ്ട് വിമാനത്തിലെത്തിയ യാത്രക്കാര്‍ ആരോഗ്യ വകുപ്പുമായി ബന്ധപ്പെടണമെന്ന് നിര്‍ദ്ദേശം നല്‍കുന്നത്.
സ്ഥിരീകരിച്ച അഞ്ച് പേര്‍ ഇപ്പോള്‍ പത്തനംതിട്ട ജനറല്‍ ആശുപത്രിയിലെ ഐസോലേഷന്‍ വാര്‍ഡിലാണ് ഉള്ളത്. ഇറ്റലിയില്‍ നിന്നും വേറെയും ആളുകള്‍ വന്നതായി സൂചനയുണ്ടെന്നും മന്ത്രി വ്യക്തമാക്കി.
