കണ്ണൂർ: കൃത്യമായ ആസൂത്രണതോടെയാണ് മകന് വിയാനെ കൊലപ്പെടുത്താന് ശരണ്യ തീരുമാനിച്ചത്. ഇതിനുവേണ്ടി മാസങ്ങളായി വേറെ താമസിക്കുന്ന ഭര്ത്താവ് പ്രണവിനെ ശരണ്യ സ്വന്തം വീട്ടിലേക്ക് വിളിച്ചുവരുത്തുകയും ചെയ്തു. കുട്ടിയെ കൊന്ന കുറ്റം പ്രണവിന്റെ മേല് ചുമത്താനായിരുന്നു ഈ നീക്കം.
തിങ്കളാഴ്ച പുലര്ച്ചെ മൂന്നുമണി വരെ ശരണ്യയും പ്രണവും കുട്ടിയും ഒരു മുറിയിലായിരുന്നു കിടന്നിരുന്നത്. മൂന്നുമണിയോടെ കുട്ടിയുമായി ശരണ്യ ഹാളിലേക്ക് പോയി. ഇത് പ്രണവ് ചോദ്യം ചെയ്തപ്പോള് ചൂട് കൂടുതലായതിനാല് ഹാളില് കിടക്കാന് പോകുന്നുവെന്നായിരുന്നു മറുപടി. ഹാളില് പ്രണവ് വീണ്ടുമുറങ്ങുന്നതുവരെ കാത്തിരുന്ന ശരണ്യ ഇതിനുശേഷം പുറത്തേക്കിറങ്ങി കുട്ടിയെ കടല്ഭിത്തിയിലേക്ക് വലിച്ചെറിഞ്ഞു. ആദ്യ വീഴ്ചയില് തന്നെ കുട്ടി വേദനയെടുത്ത് അലറിക്കരഞ്ഞു. കുട്ടിയുടെ അടുത്തെത്തി മുഖം പൊത്തിപ്പിടിച്ച ശേഷം വീണ്ടുമെടുത്ത് കരിങ്കല് കൂട്ടത്തിലേക്ക് വലിച്ചെറിയുകയും മരണം ഉറപ്പിക്കുകയുമായിരുന്നു. കടല്ഭിത്തിയില് കുഞ്ഞിന്റെ തലയിടിച്ച് കൊലപ്പെടുത്തുകയായിരുന്നു. പിന്നീട് വന്ന് ഹാളില് കിടന്നു. രാവിലെ പ്രണവിനെ വിളിച്ചെഴുന്നേല്പ്പിച്ച് കുട്ടിയെ കാണാനില്ലെന്ന് പറഞ്ഞതും ശരണ്യയാണ്. പോലീസ് വന്നപ്പോഴും കുട്ടിയെ കൊന്നത് പ്രണവാണെന്ന് ആവര്ത്തിക്കുകയാണ് ശരണ്യ ചെയ്തത്. കാമുകനൊന്നിച്ച് ജീവിക്കാനായിരുന്നുവത്രെ ശരണ്യയുടെ ഈ നീചപ്രവൃത്തി.
ഭര്ത്താവുമായി അകന്ന് മൂന്നു മാസങ്ങളായി സ്വന്തം അച്ഛനും അമ്മയ്ക്കും ഒപ്പമായിരുന്നു ശരണ്യയും കുഞ്ഞും താമസിച്ചിരുന്നത്. ഞായറാഴ്ച ശരണ്യ പ്രണവിനെ വീട്ടിലേക്ക് വിളിച്ചു വരുത്തി ഒപ്പം താമസിപ്പിക്കുകയും പിറ്റേന്ന് പുലര്ച്ചെ മൂന്നരയ്ക്കും നാലരയ്ക്കും ഇടയില് കൃത്യം നടത്തുകയുമായിരുന്നു. വ്യക്തമായ ആസൂത്രണത്തോടെയാണ് ശരണ്യ ഇതെല്ലാം ചെയ്തത്. കുട്ടി മരിച്ചതോടെ ശരണ്യയുടെ ബന്ധുക്കളും പ്രണവിനെയാണ് സംശയിച്ചത്. എന്നാല് ശാസ്ത്രീയ പരിശോധനകളിലൂടെയും പഴുതടച്ച അന്വേഷണത്തിലൂടെയും അമ്മയാണ് കൊല നടത്തിയതെന്ന് പോലീസ് കണ്ടെത്തുകയായിരുന്നു.
തിങ്കളാഴ്ച രാവിലെയാണ് കണ്ണൂര് സിറ്റി തയ്യില് കടപ്പുറത്ത് കുട്ടിയെ മരിച്ചനിലയില് കാണപ്പെട്ടത്. കൊടുവള്ളി ഹൗസില് വിയാനെ(ഒന്നര)യാണ് അമ്മ ശരണ്യ കൊലപ്പെടുത്തിയത്. ശരണ്യയുടെ വസ്ത്രങ്ങളും വീട്ടിലെ കിടക്കവിരിയും മറ്റും ഫോറന്സിക് പരിശോധനക്ക് വിധേയമാക്കിയിരുന്നു. കുഞ്ഞിനെ കൊല്ലാനായി പല ദിവസങ്ങളിലായി ശരണ്യ കാത്തിരിക്കുകയായിരുന്നു. കടലിലെറിഞ്ഞ് കൊല്ലാനായിരുന്നു ശരണ്യ പദ്ധതിയിട്ടത്. ശരണ്യയുടെ പിതാവുമായി അകന്ന പ്രണവ് ഭാര്യാപിതാവ് മത്സ്യബന്ധനത്തിന് പോകുന്ന ദിവസങ്ങളിലാണ് വീട്ടില് വരാറുള്ളത്. ഈ സമയം തന്നെ കൊലപാതകത്തിനു ശരണ്യ തെരഞ്ഞെടുക്കുകയായിരുന്നു. തലയ്ക്കേറ്റ ക്ഷതമാണ് മരണ കാരണമെന്നു വ്യക്തമാക്കുന്നതായിരുന്നു പോസ്റ്റ്മോര്ട്ടം റിപ്പോര്ട്ട്.
