മലപ്പുറം: മലപ്പുറത്ത് സ്കൂൾ ബസിൽ നിന്നും വീണ് മൂന്നാം ക്ലാസ് വിദ്യാർത്ഥിക്ക് ദാരുണാന്ത്യം. കുറുവ സ്വദേശി ഫർസീൻ(9) ആണ് മരിച്ചത്. ഇന്ന് രാവിലെയായിരുന്നു അപകടം. കുറുവ എയുപി സ്കൂളിലെ ബസിൽ നിന്നുമാണ് വിദ്യാർത്ഥിനി വീണത്.
നിറയെ വിദ്യാർത്ഥികളുമയി പോവുകയായിരുന്ന ബസിന്റെ ഡോർ അബദ്ധത്തിൽ തുറന്ന് വിദ്യാർത്ഥിനി പുറത്തേയ്ക്ക് വീഴുകയായിരുന്നു. കുട്ടിയെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അപകട സമയത്ത് സ്കൂൾ ബസിൽ ഡ്രൈവർ മാത്രമേ ഉണ്ടായിരുന്നുള്ളൂ. ബസിൽ സഹായിയോ ആയയോ ഇല്ലായിരുന്നു. ഇതാണ് അപകടത്തിന് വഴിവച്ചതെന്ന് രക്ഷിതാക്കൾ ആരോപിക്കുന്നു.
ഫർസീന്റെ അമ്മ പഞ്ചളി ഷമീമ ഇതേ സ്കൂളിലെ അധ്യാപികയാണ്. പുറത്തേയ്ക്ക് തെറിച്ചുവീണ കുട്ടിയുടെ ശരീരത്തിലേക്ക് അതേ ബസിന്റെ ടയറുകൾ കയറിയിറങ്ങുകയായിരുന്നു. മൃതദേഹം പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ടു നൽകും.
