പോപ്പുലര്‍ ഫ്രണ്ട് പ്രളയ ദുരിതാശ്വാസത്തിന് പണം പിരിച്ചതും വിവാദ അക്കൗണ്ട് വഴി

കോഴിക്കോട്: പോപ്പുലര്‍ ഫ്രണ്ട് പ്രളയദുരിതാശ്വാസ പ്രവര്‍ത്തനത്തിന്റെ പേരില്‍ പണം പിരിച്ചതും  വിവാദ ബാങ്ക് അക്കൗണ്ടിലേക്ക് തന്നെ. മഴക്കെടുതി ദുരിതാശ്വാസ ഫണ്ടിലേക്ക് സംഭാവന ചെയ്യണമെന്നാവശ്യപ്പെട്ട് 2019 ആഗസ്റ്റ് 16 വെള്ളിയാഴ്ച നടത്തിയ പൊതു കളക്ഷനുവേണ്ടി വ്യാപകമായി പ്രചരിപ്പിച്ച അക്കൗണ്ട് നമ്പര്‍ മാവൂര്‍ റോഡിലെ സിന്‍ഡിക്കേറ്റ് ബാങ്കിലെ 44051010004277 എന്ന നമ്പര്‍ തന്നെ. 

സാമൂഹ്യമാധ്യമങ്ങള്‍ വഴി വ്യാപകമായി  പ്രചാരണം നടത്തിയാണ് പോപ്പുലര്‍ ഫ്രണ്ട് സംസ്ഥാന കമ്മിറ്റി  പണം പിരിച്ചത്. നിലമ്പൂരിലേക്ക് താമസയോഗ്യമായ വീടുകളില്‍ അടിയന്തരമായി ബഡ്ഡുകള്‍ ആവശ്യമുണ്ടെന്നും. ഒരു ബഡ്ഡിന് മൂവായ്യിരം രൂപ വെച്ച് നല്‍കണമെന്നും ആവശ്യപ്പെട്ട് പോപ്പുലര്‍ ഫ്രണ്ടിന്റെ മലപ്പുറം ഈസ്റ്റ് ജില്ലാ കമ്മിറ്റി പണം പിരിച്ചതും ഇതേ അക്കൗണ്ടില്‍ കൂടിയാണ്.  2019 ലെ പ്രളയകാലത്ത് മഴക്കെടുതി ദുരിതാശ്വാസ ഫണ്ട് എന്ന പേരിലാണ്  വ്യാപകമായി പണം ശേഖരിച്ചത്. 

ഹാദിയ കേസുമായി ബന്ധപ്പെട്ട് പോപ്പുലര്‍ ഫ്രണ്ട് നേരിട്ട് നടത്തിയ ധനസമാഹാരണത്തിലൂടെ ആകെ ലഭിച്ചത് 80,40,405 രൂപയായിരുന്നു വെന്നാണ് സംഘടന വ്യക്തമാക്കിയത്. ബാങ്ക് അക്കൗണ്ടിലേക്ക് ലഭിച്ചതാകട്ടെ 81,61,245 രൂപയും. 17,91,079 രൂപ പോപ്പുലര്‍ ഫ്രണ്ടിന്റെ പ്രവര്‍ത്തന ഫണ്ടില്‍ നിന്നെടുത്താണ് കേസിന് വേണ്ടി ചെലവഴിച്ചതെന്നാണ് സംഘടന അന്ന് വ്യക്തമാക്കിയിരുന്നത്. 

2018 മാര്‍ച്ചിലാണ് കേസുമായി ബന്ധപ്പെട്ട കണക്കുകള്‍ പുറത്തായത്. എന്നാല്‍ ഇതേ അക്കൗണ്ടിലേക്കാണ് 2019 ല്‍ പ്രളയദുരിതാശ്വാസത്തിന്റെ പേരില്‍ പണം പിരിച്ചതും. ഇതു പ്രകാരം എത്ര പണം ലഭിച്ചുവെന്ന കാര്യം സംഘടന വ്യക്തമാക്കിയിട്ടില്ല. ഇതിനിടയിലാണ് 2019 ഡിസംബര്‍ നാല് മുതല്‍ ജനുവരി ആറ് വരെയായി പോപ്പുലര്‍ ഫ്രണ്ടിന്റെ പത്ത് അക്കൗണ്ടുകളിലും റിഹാബ് ഫൗണ്ടേഷന്റെ അഞ്ച് അക്കൗണ്ടുകളിലുമായി 1.04 കോടി രൂപ നിക്ഷേപിച്ചതായി എന്‍ഫോഴ്‌സ്‌മെന്റ് ഡയറക്ടറേറ്റ് ആഭ്യന്തര വകുപ്പിന് റിപ്പോര്‍ട്ട് നല്‍കിയത്.