തിരുവനന്തപുരം : ജനങ്ങളുടെ മുഖ്യ ആവശ്യമായ കുടിവെള്ളവും ഭക്ഷണവും നല്കാന് കഴിഞ്ഞിട്ടില്ലെന്ന് പിണറായി സര്ക്കാരിനെ രൂക്ഷമായി വിമര്ശിച്ച് നടന് ശ്രീനിവാസന്. ജനങ്ങളുടെ അടിസ്ഥാന ആവശ്യം പോലും നിറവേറ്റാന് സാധിക്കാത്ത സര്ക്കാര് എന്ത് മണ്ണാങ്കട്ടയാണ് കൊടുക്കുന്നതെന്നും അദ്ദേഹം ചോദിച്ചു.
സ്വകാര്യ മാധ്യമത്തിന് നല്കിയ അഭിമുഖത്തിലാണ് ഇക്കാര്യം അറിയിച്ചത്. ഇവിടെ വിഷമുള്ള ഭക്ഷണം പരിശോധിക്കാനുള്ള ആളുകളുണ്ട്. എന്നാല് ഇത് നിര്ത്തലാക്കുന്നതിനും ബദല് സംവിധാനം കൊണ്ടുവരാനും ഇതുവരെ ആരും തയ്യാറായിട്ടില്ല. വിഷരഹിത ഭക്ഷണം വിതരണം ചെയ്യാനുള്ള സര്ക്കാരിന്റെ നടപടികള് കാര്യക്ഷമമല്ല.
സംസ്ഥാനത്തെ ജല വിതരണത്തിന്റെ കാര്യത്തിലും സര്ക്കാര് നിഷ്ക്രിയരാണ്. ക്ലോറിനേഷന് എന്ന് പറയുന്ന നൂറ്റാണ്ടുകള് പഴക്കമുള്ള സാങ്കേതിക വിദ്യയാണ് സര്ക്കാര് ഇപ്പോഴും വിതരണം ചെയ്യുന്ന കുടിവെള്ളം രോഗാണു വിമുക്തമാക്കാനായി ഉപയോഗിക്കുന്നത്. എറണാകുളത്ത് പെരിയാറിലെ ജലമാണ് കുടിവെള്ളമായി വിതരണം ചെയ്യുന്നത്. കാലപ്പഴക്കം ചെന്ന രീതി ഉപയോഗിച്ചു തന്നെയാണ് ജലം ശുദ്ധീകരിക്കുന്നതെന്ന് വാട്ടര് അതോറിട്ടി തന്നെ വ്യക്തമാക്കിയിട്ടുള്ളതാണ്. അവര് തന്നെയാണ് ജനങ്ങള്ക്ക് ഈ വെള്ളം വിതരണം ചെയ്യുന്നതും. 50 ലക്ഷത്തോളം ആളുകളണ് ഈ വെള്ളം കുടിക്കുന്നത്. രണ്ട് ലക്ഷത്തോളം പേര് ഇന്ന് എറണാകുളത്ത് ഡയാലിസിസിന് വിധേയരാകുന്നുണ്ട്.
റെഡ് കാറ്റഗറിയില് പെട്ട നിരവധി ഫാക്ടറികള് പെരിയാറിന്റെ തീരത്ത് പ്രവര്ത്തിക്കുന്നുണ്ട്. അവിടെ നിന്നുള്ള രാസമാലിന്യങ്ങളെല്ലാം ഇതിലേക്ക് തന്നെയാണ് ഒഴുക്കി വിടുന്നത്. ഇത്തരത്തില് അടിസ്ഥാനമായി ഒരുആവശ്യങ്ങളും സര്ക്കാര് നിറവേറ്റുന്നില്ല.
ഇന്റര്നെറ്റ് പോലുള്ള സാങ്കേതിക വിദ്യയിലൂടെ വിവിധ രാജ്യത്തെ കാര്യങ്ങള് നമുക്ക് വിശദമായി മനസ്സിലാക്കാന് സാധിക്കും. അതിനായി അവിടെ പോയി നോക്കി നില്ക്കണമെന്നില്ലെന്നും ശ്രീനിവാസന് മുഖ്യമന്ത്രിയെ രൂക്ഷമായി വിമര്ശിച്ചു. ഇന്റര്നെറ്റില് വിവിധ രാജ്യങ്ങളില് ഉപയോഗിക്കുന്ന സംവിധാനങ്ങളെ കുറിച്ചും അവയുടെ ഗുണവും സാമ്പത്തികവും സംബന്ധിച്ച എല്ലാ വിവരങ്ങളും ഉള്പ്പെടുത്തിയിട്ടുണ്ട്. അല്ലാതെ ജപ്പാനിലേയോ മറ്റ് രാജ്യങ്ങളിലേയോ കാര്യങ്ങള് അറിയുന്നതിന് അവിടെ പോയി നോക്കി നില്ക്കണമന്നില്ലെന്നും ശ്രീനിവാസന് പരിഹസിച്ചു.
