ആലപ്പുഴ: സംസ്ഥാന ഭാഗ്യക്കുറിയുടെ വില കുത്തനെ വര്ദ്ധിപ്പിക്കാന് സര്ക്കാര് തീരുമാനം. പത്തു രൂപ വീതമാണ് വര്ദ്ധന. അശാസ്ത്രീയമായ സമ്മാനഘടന കാരണം പൊതുവെ ഭാഗ്യക്കുറി വില്പ്പനക്കാര് പ്രതിസന്ധി നേരിടുന്ന സാഹചര്യത്തിലാണ് കൂനിന്മേല് കുരുവായി ടിക്കറ്റ് വില വര്ദ്ധിപ്പിക്കുന്നുവെന്ന ആക്ഷേപം.
നിലവില് 30 രൂപയുടെ ആറ് ടിക്കറ്റുകളും, 50 രൂപയുടെ ഒരു ടിക്കറ്റുമാണ് പ്രതിവാരം ലോട്ടറി വകുപ്പ് നടത്തുന്നത്. 30 രൂപ വിലയുള്ള ആറ് ടിക്കറ്റുകളുടെയും ജിഎസ്ടി അടക്കമുള്ള ആകെ വില 40 രൂപയാകും. 50 രൂപ വിലയുള്ള കാരുണ്യ ടിക്കറ്റിന്റെ നിരക്കും 40 രൂപയാക്കും. ഇതോടെ ലോട്ടറി വകുപ്പ് നടത്തുന്ന എല്ലാ പ്രതിവാര ലോട്ടറികളുടെയും വില 40 രൂപയാകും.
ലോട്ടറി ഘടന പരിഷ്കരിക്കും. ലോട്ടറിയിന്മേലുള്ള ജിഎസ്ടി നിരക്ക് 28 ശതമാനമായി ഏകീകരിക്കാന് ജിഎസ്ടി കൗണ്സില് തീരുമാനിച്ച പശ്ചാത്തലത്തിലാണ് ടിക്കറ്റുകളുടെ ഘടന പരിഷ്കരിക്കുന്നതെന്നാണ് മന്ത്രി തോമസ് ഐസക്ക് പറയുന്നത്. നിലവില് 2000 ടിക്കറ്റ് വരെ എടുക്കുന്നവര്ക്ക് 24 ശതമാനവും 2001 മുതല് 10,000 ടിക്കറ്റുവരെ എടുക്കുന്നവര്ക്ക് 24.5 ശതമാനവും 10,000ന് മുകളില് ടിക്കറ്റ് എടുക്കുന്നവര്ക്ക് 25.25 ശതമാനവുമെന്ന തരത്തില് മൂന്നു സ്ലാബുകളിലായാണ് ഡിസ്കൗണ്ട് നല്കുന്നത്. ഇത് 23.5, 24.25, 25 എന്നിങ്ങനെ പരിഷ്കരിക്കും.
ടിക്കറ്റുകളുടെ വില ഉയരുന്നതുകൊണ്ട് തൊഴിലാളികള്ക്ക് ലഭിക്കുന്ന തുക ഉയരും. 30 രൂപയായിരുന്നപ്പോള് ആദ്യത്തെ സ്ലാബില് ഒരു ടിക്കറ്റിന് 6.43 രൂപ കിട്ടിയിരുന്ന സ്ഥാനത്ത് ഇപ്പോള് 7.34 രൂപയായി ഉയരും. രണ്ടാമത്തെ സ്ലാബില് ഇത് 6.56 രൂപയില് നിന്നും 7.57 രൂപയായും,
മൂന്നാമത്തെ സ്ലാബില് 6.76 രൂപയില് നിന്ന് 7.81 രൂപയായും വര്ദ്ധിക്കുമെന്ന് മന്ത്രി പറയുന്നു. ജിഎസ്ടി ഉയര്ത്തിക്കൊണ്ടുള്ള നോട്ടിഫിക്കേഷന് വരുന്ന മുറയ്ക്ക് നിരക്ക് പ്രാബല്യത്തിലാകും.
