പൂനെ: രാജ്യാന്തര ക്രിക്കറ്റില്‍ അതിവേഗം പതിനൊന്നായിരം റണ്‍സ് തികയക്കുന്ന ആദ്യ ക്യാപ്റ്റനെന്ന റെക്കോഡ് ഇനി ഇന്ത്യന്‍ നായകന്‍ വിരാട് കോഹ്‌ലിക്ക് സ്വന്തം. ശ്രീലങ്കക്കെതിരായ മൂന്നാം ടി 20 മത്സരത്തിലാണ് കോഹ്‌ലി ഈ റെക്കോഡ് സ്വന്തമാക്കിയത്.
മത്സരത്തിന് മുമ്പ് ഈ നേട്ടം കൈവരിക്കാന്‍ കോഹ് ലിക്ക് ഒരു റണ്‍സ് മാതിയായിരുന്നു. ഇന്ത്യന്‍ ഇന്നിങ്‌സിന്റെ പതിമൂന്നാം ഓവറില്‍ സന്ദകന്റെ പന്തില്‍ ഒരു റണ്‍സ് ഓടിയെടുത്തതോടെ മൂന്ന് ഫോര്‍മാറ്റിലുമായി കോഹ്‌ലിക്ക് പതിനൊന്നായിരം റണ്‍സായി. 169 രാജ്യാന്തര മത്സരങ്ങളില്‍ നിന്നാണ് കോഹ്‌ലി റെക്കോഡ് നേട്ടം സ്വന്തമാക്കിയത്. ഇതോടെ ഓസീസ് താരം റിക്കി പോണ്ടിങ്ങിന്റെ റെക്കോഡ് തകര്‍ന്നു. ഏകദിന ക്രിക്കറ്റില്‍ അതിവേഗം പതിനൊന്നായിരം റണ്‍സ് നേടിയ താരമാണ് കോഹ്‌ലി. കഴിഞ്ഞവര്‍ഷം ലോകകപ്പില്‍ പാക്കിസ്ഥാനെതിരായ മത്സരത്തിലാണ് കോഹ്‌ലി റെക്കോഡ് കുറിച്ചത്.
മുപ്പത്തിയൊന്നുകാരനായ കോഹ്‌ലി 84 ടെസ്റ്റില്‍ 7202 റണ്‍സും 242 ഏകദിനത്തില്‍ 11609 റണ്‍സും നേടി. മൂന്ന് ഫോര്‍മാറ്റിലും കോഹ്‌ലിയുടെ ശരാശരി അമ്പതിന് മുകളിലാണ്. അതും റെക്കോഡാണ്. ക്യാപ്റ്റനെന്ന നിലയില്‍ പതിനൊന്നായിരം റണ്‍സ് നേടുന്ന ആറാമത്തെ ക്യാപ്റ്റനാണ് കോഹ്‌ലി. രണ്ടാമത്തെ ഇന്ത്യന്‍ നായകനും. മുന്‍ ഓസീസ് ക്യാപ്റ്റന്‍ റിക്കി പോണ്ടിങ്ങാണ് ഈ പട്ടികയില്‍ മുന്നില്‍. 324 മത്സരങ്ങളില്‍15440 റണ്‍സ് നേടി. സ്മിത്ത് 286 മത്സരങ്ങളില്‍ 14878 റണ്‍സുമായി രണ്ടാം സ്ഥാനത്ത് നില്‍ക്കുന്നു. ന്യൂസിലന്‍ഡിന്റെ ഫ്‌ളെമിങ്ങാണ് മൂന്നാം സ്ഥാനത്ത്. 303 മത്സരങ്ങളില്‍ 11561 റണ്‍സ്. എം.എസ്. ധോണി 332 മത്സരങ്ങളില്‍ 11207 റണ്‍സുമായി നാലാം സ്ഥാനത്തുണ്ട്.
