ആലപ്പുഴ: കുട്ടനാട് ഉപതെരഞ്ഞെടുപ്പില് തോമസ് ചാണ്ടിയുടെ സഹോദരനെ സ്ഥാനാര്ഥിയാക്കണമെന്ന ചാണ്ടിയുടെ കുടുംബത്തിന്റെ നിലപാട് ഇടതുപക്ഷത്തെ വെട്ടിലാക്കി. എന്സിപിയിലെ ഒരു വിഭാഗത്തിന്റെ പിന്തുണയും ഈ നീക്കത്തിന് പിന്നിലുണ്ട്. തോമസ് ചാണ്ടിയുടെ കുടുംബം അദ്ദേഹത്തിന്റെ സഹോദരന് സ്ഥാനാര്ഥിത്വം നല്കണമെന്ന ആവശ്യവുമായി മുഖ്യമന്ത്രി, സിപിഎം സംസ്ഥാന സെക്രട്ടറി, എന്സിപി സംസ്ഥാന പ്രസിഡന്റ് എന്നിവര്ക്കാണു കത്ത് നല്കിയത്. മാത്രമല്ല ഇക്കാര്യം മാധ്യമങ്ങളിലൂടെ ചിലര് വെളിപ്പെടുത്തുകയും ചെയ്തു. ഇതോടെ സീറ്റ് മോഹികളായ എന്സിപി നേതാക്കള് വെട്ടിലായി.
ചാണ്ടിയുടെ കുടുംബത്തിന്റെ നീക്കത്തിനെതിരെ എന്സിപിയിലെ ഒരു വിഭാഗവും ഘടകകക്ഷികളും രംഗത്തെത്തി. തോമസ് ചാണ്ടിയുടെ സഹോദരന് തോമസ് കെ. തോമസിനു പൊതുപ്രവര്ത്തന രംഗത്ത് പാരമ്പര്യമൊന്നും അവകാശപ്പെടാനില്ലെന്നും തോമസ് ചാണ്ടിക്ക് പകരക്കാരനായി അദ്ദേഹത്തിന്റെ കുടുംബാംഗത്തെ തന്നെ മത്സരിപ്പിക്കണമെന്ന കടുംപിടുത്തം മുന്നണിയുടെ വിജയസാധ്യതയെ ബാധിക്കാനിടയുണ്ടെന്നുമാണ് ഇവരുടെ അഭിപ്രായം. എല്ഡിഎഫ് ജില്ലാ കമ്മിറ്റി ചേരുമ്പോള് ഇക്കാര്യത്തില് നിലപാട് വ്യക്തമാകുമെന്ന് ഇവര് പറയുന്നു.
അതേസമയം, സീറ്റ് ഏറ്റെടുക്കണമെന്ന താത്പര്യമാണ് കുട്ടനാട്ടിലെ സിപിഎം നേതാക്കള്ക്കുള്ളത്. ആരോഗ്യപരമായ കാരണങ്ങളാലും മറ്റും എംഎല്എ എന്ന നിലയില് തോമസ് ചാണ്ടി മണ്ഡലത്തില് ദീര്ഘകാലമായി സജീവമായിരുന്നില്ല. അക്കാലയളവില് വിവിധ പ്രദേശങ്ങളില്നിന്ന് സിപിഎമ്മുകാരുടെ ഭാഗത്തുനിന്നുവരെ പ്രതിഷേധമുയര്ന്നിരുന്നു. ഇനി അത്തരമൊരു സാഹചര്യമുണ്ടാക്കരുതെന്ന അഭിപ്രായമാണ് താഴെത്തട്ടിലുള്ള പല നേതാക്കള്ക്കുമുള്ളത്. അതിനാല് ജനങ്ങള്ക്കിടയില്നിന്നു പ്രവര്ത്തിക്കുന്ന അനുഭവ സമ്പത്തുള്ള സ്ഥാനാര്ഥി വേണമെന്നാണ് നേതാക്കളില് പലരുടെയും താത്പര്യം. കുട്ടനാട് മണ്ഡലം സിപിഎമ്മിനു വൈകാരികമായി ബന്ധമുള്ളതാണെന്നും അത് ഏറ്റെടുക്കേണ്ടത് ആവശ്യമാണെന്നും സിപിഎമ്മിന്റെ ജില്ലാ സമ്മേളനത്തില് അവതരിപ്പിച്ച പ്രവര്ത്തന റിപ്പോര്ട്ടിലും നിര്ദേശമുണ്ടായിരുന്നു.
എന്നാല്, തോമസ് ചാണ്ടി വീണ്ടും മത്സരിക്കാന് ആഗ്രഹം പ്രകടിപ്പിച്ച നിലയ്ക്ക് സിപിഎം സംസ്ഥാന നേതൃത്വം പ്രത്യേകം താത്പര്യമെടുത്ത് എന്സിപിക്ക് വീണ്ടും സീറ്റ് നല്കുകയായിരുന്നു. ഇത്തവണ എന്സിപിയില് സ്ഥാനാര്ഥിയെ ചൊല്ലി ഭിന്നത രൂക്ഷമായാല് മണ്ഡലം ഏറ്റെടുക്കാനുള്ള അവസരമായി സിപിഎം കരുതുമെന്നാണ് എന്സിപി നേതാക്കളുടെ ആശങ്ക. അതിനുള്ള അവസരം ചാണ്ടിയുടെ കുടുംബം ഒരുക്കിക്കൊടുക്കുകയാണെന്നും അവര് വിമര്ശിക്കുന്നു. യുഡിഎഫിലും ഭിന്നത ശക്തമാണ്. അവകാശവാദവുമായി കേരളാ കോണ്ഗ്രസ് മാണി വിഭാഗത്തിലെ ഇരുപക്ഷവും പോര്വിളി തുടങ്ങിക്കഴിഞ്ഞു.
