ലഖ്നൗ: എട്ട് വര്ഷങ്ങള്ക്ക് മുന്പ് കോമള് യാദവ് എന്ന ഡോക്ടര്ക്ക് പ്രായം വെറും 29. അവിവാഹിത. പക്ഷെ അവര് ജോലി ചെയ്യുന്ന ഉത്തര്പ്രദേശിലെ ഫറൂഖാബാദിലുള്ള ആശുപത്രിയില് ഒരു സ്ത്രീ പ്രസവത്തിനായി എത്തി. അവര് ഇരട്ടക്കുഞ്ഞുങ്ങളെ പ്രസവിച്ചു. രണ്ടും പെണ്കുഞ്ഞുങ്ങള്.
പക്ഷെ അടുത്ത ദിവസം ആ സ്ത്രീ കടന്നുകളഞ്ഞു. ആ കുഞ്ഞുങ്ങളെ കണ്ട ഡോ. കോമള് യാദവ് രണ്ടാമതൊന്ന് ആലോചിച്ചില്ല. ആ ഇരട്ടകളെ ദത്തെടുക്കാന് തയ്യാറായി മുന്നോട്ട് വന്നു. അച്ഛനും സഹപ്രവര്ത്തകരായ ഡോക്ടര്മാരും ഈ തീരുമാനത്തെ എതിര്ത്തെങ്കിലും ഡോ. കോമള് യാദവ് പിന്നോട്ട് പോയില്ല. ഈ കുഞ്ഞുങ്ങളെ വേണോ അതോ അച്ഛനായ തന്നെ വേണോ എന്ന ചോദ്യമാണ് കോമള് യാദവിന്റെ അച്ഛന് ചോദിച്ചത്. പക്ഷെ അവള് തീരുമാനത്തില് നിന്നും പിന്നോട്ട് പോകാന് തയ്യാറല്ലായിരുന്നു. ഡോ. കോമള് യാദവ് ആ കുഞ്ഞുങ്ങളെ ദത്തെടുക്കാന് നിമയപരമായ എല്ലാ പേപ്പറുകള് ശരിയാക്കി. അന്ന് തന്റെ സ്വന്തം ഗ്രാമത്തിലേക്ക് ഈ കുഞ്ഞുങ്ങളുമായി എത്തിയപ്പോള് നാട്ടുകാര് ഡോ കോമള് യാദവിനെ ഇരുകയ്യും നീട്ടി സ്വീകരിച്ചു.
ആണ്കുട്ടികളെ മാത്രം മാതാപിതാക്കള് ഇഷ്ടപ്പെടുന്ന കാലത്ത് രണ്ട് അനാഥരായ പെണ്കുഞ്ഞുങ്ങളെ സ്വന്തം മക്കളായി സ്വീകരിച്ചതിന് ഡോ. കോമള് യാദവിന് വലിയ സ്വീകാര്യത ലഭിച്ചു. മറ്റൊന്ന് അവിവാഹിതയായിട്ടും മറ്റൊരാള് പ്രസവിച്ച കുഞ്ഞുങ്ങളെ ഡോ. കോമള് യാദവ് സ്വന്തം ജീവിതത്തിലേക്ക് സ്വീകരിച്ചു എന്നതാണ്. ഇതിനെയാണ് കോമള് യാദവിന്റെ കുടുംബക്കാര് എതിര്ത്തത്. എന്നാല് ഡോ. കോമള് ആ എതിര്പ്പുകളെ അവഗണിച്ച് മുന്നോട്ട് പോയി.
ഇന്ന് രണ്ട് കുഞ്ഞുങ്ങള്ക്കും എട്ട് വയസ്സായി. അവര് ആരോഗ്യത്തോടെ സ്നേഹത്തോടെ അമ്മയായ ഡോ.കോമള് യാദവിനൊപ്പം ജീവിക്കുന്നു. പിന്നീട് ഡോ. കോമള് യാദവ് വിവാഹം കഴിച്ചില്ല. തന്റെ രണ്ട് കുഞ്ഞുങ്ങളെയും സ്വന്തം മക്കളായി സ്വീകരിക്കാന് തയ്യാറുള്ള ഒരു പുരുഷനെ ഭര്ത്താവായി സ്വീകരിക്കാന് ഡോ. കോമള് യാദവ് തയ്യാറാണ്. പക്ഷെ ഇതുവരെ ആരും എത്തിയില്ല. അതിനാല് അവിവാഹിതയായി തുടരുകയാണ് ഡോ. കോമള് യാദവ്. “ഞാന് അവരെയല്ല, അവര് എന്നെയാണ് ദത്തെടുത്തത്. “- രണ്ട് അനാഥക്കുഞ്ഞുങ്ങളെ ദത്തെടുത്ത തന്റെ തീരുമാനത്തെക്കുറിച്ച് ഇപ്പോള് ഡോ. കോമള് യാദവ് പറയുന്നു. റീത്ത് എന്നും റിഥം എന്നുമാണ് കുഞ്ഞുങ്ങള്ക്ക് പേര് നല്കിയിരിക്കുന്നത്. ഇന്ന് ഡോ. കോമള് യാദവ് വാര്ത്തകളില് നിറയുന്നു. ബിബിസി ഉള്പ്പെടെയുള്ള ലോകമാധ്യമങ്ങളെല്ലാം ഡോ. കോമള് യാദവിന്റെ ജീവിതം വാര്ത്തയാക്കിക്കഴിഞ്ഞു.
