കൊച്ചി: കണ്ടെയ്നര് ലോറിയില് നിന്ന് ലോഡ് ഇറക്കാന് സംരക്ഷണം നല്കണമെന്ന കോടതിയുത്തരവ് പാലിക്കാത്ത പോലീസ് സംസ്ഥാനത്തിനു നാണക്കേടാണെന്നും ഇവിടെ എങ്ങനെ ആളുകള് ബിസിനസ് ചെയ്യുമെന്നും ഹൈക്കോടതിയുടെ രൂക്ഷവിമര്ശനം. തൊടുപുഴയിലെ കൊച്ചിന് ഗ്രാനൈറ്റ്സില് നിന്ന് കുമളി ഗവ.ഹയര് സെക്കന്ഡറി സ്കൂളിലേക്ക് കൊണ്ടുവന്ന ടൈലുകള് ഇറക്കുന്നത് സിഐടിയുക്കാര് തടഞ്ഞതിനെത്തുടര്ന്ന് പോലീസ് സംരക്ഷണം നല്കാന് ഹൈക്കോടതി ഉത്തരവിട്ടിരുന്നു. ഉത്തരവ് പാലിച്ചില്ലെന്നാരോപിച്ച് ഹര്ജിക്കാര് നല്കിയ കോടതിയലക്ഷ്യ ഹര്ജിയിലാണ് സിംഗിള് ബെഞ്ച് സര്ക്കാരിനും പോലീസിനുമെതിരെ വിമര്ശനം ഉന്നയിച്ചത്. ഇവിടെ എങ്ങനെയാണ് ബിസിനസ് ചെയ്യുകയെന്ന് കോടതി ചോദിച്ചു. ഈ സാഹചര്യത്തില് ഇവിടെങ്ങനെ തൊഴില് ലഭ്യമാക്കും, ഇതാണോ ബിസിനസ് സൗഹൃദമായ സാഹചര്യമെന്നും ഹൈക്കോടതി വാക്കാല് ചോദിച്ചു.
ഹര്ജി പരിഗണിക്കവെ കോടതിയില് നേരിട്ട് ഹാജരായ സിഐ വി.കെ. ജയപ്രകാശിനോട് എന്തുകൊണ്ടാണ് സംരക്ഷണം നല്കാത്തതെന്ന് കോടതി ചോദിച്ചു. ക്രമസമാധാന പ്രശ്നമുണ്ടാകുമെന്നതിനാലാണെന്നായിരുന്നു മറുപടി. ക്രമസമാധാനപ്രശ്നമുണ്ടായാല് നേരിടേണ്ടത് പോലീസിന്റെ ചുമതലയാണെന്ന് കോടതി പറഞ്ഞു. കോടതിയുത്തരവ് നടപ്പാക്കാതിരിക്കാനുള്ള കാരണമായി ഇതു പറയേണ്ട. ഇവിടെ നടക്കുന്ന കാര്യങ്ങള് കോടതിക്കറിയാമെന്നും ഇത്തരം നടപടികള് വെറുതേ വിടാന് കഴിയില്ലെന്നും കോടതി പറഞ്ഞു. അടുത്ത ദിവസം കോടതി വീണ്ടും കേസ് പരിഗണിക്കുമ്പോള് സി.ഐ. നേരിട്ട് ഹാജരായി സ്വീകരിച്ച നടപടി വിശദീകരിക്കണം, സിംഗിള് ബെഞ്ച് വാക്കാല് പറഞ്ഞു.
സ്വന്തം തൊഴിലാളികളെ ഉപയോഗിച്ച് ലോഡിറക്കാന് 26 എ കാര്ഡ് കൊച്ചിന് ഗ്രാനൈറ്റ്സിനുണ്ടെങ്കിലും രണ്ടു തൊഴിലാളികള് മാത്രമാണ് നിലവിലുള്ളതെന്ന് പോലീസ് അറിയിച്ചു. ഇവരെ വച്ച് ലോഡ് ഇറക്കാന് കഴിയില്ല. യൂണിയനുകള് എതിര്ക്കുമെന്നതിനാല് ക്രമസമാധാന പ്രശ്നമുണ്ടാകാനിടയുണ്ട്. ഇടുക്കി എസ്പിയും സിഐയും നേരിട്ട് ഹാജരാകാന് നിര്ദേശിച്ചിരുന്നെങ്കിലും അടിയന്തര മീറ്റിങ്ങ് കാരണം എസ്പിക്ക് ഹാജരാകാന് കഴിയില്ലെന്നും പോലീസ് വിശദീകരണം നല്കിയിരുന്നു.
ഡിസംബര് ഏഴിനാണ് കുമളി സ്കൂളിലേക്ക് കണ്ടെയ്നറില് ടൈലുകള് എത്തിച്ചത്. കൊച്ചിന് ഗ്രാനൈറ്റ്സ് തങ്ങളുടെ തൊഴിലാളികളെ ഉപയോഗിച്ച് 75 ശതമാനം ലോഡും ഇറക്കി കഴിഞ്ഞപ്പോള് സിഐടിയു യൂണിയനില് നിന്നുള്ള നാലുപേരെത്തി തടഞ്ഞു. പോലീസില് പരാതി നല്കിയിട്ടും നടപടിയുണ്ടായില്ല. തുടര്ന്ന് ഹര്ജിക്കാര് ഹൈക്കോടതിയിലെത്തി. ഇടുക്കി എസ്പിയോടും കുമളി സിഐയോടും ലോഡ് ഇറക്കാന് സംരക്ഷണം നല്കാന് ഹൈക്കോടതി ഡിസംബര് 12ന് നിര്ദേശിച്ചു. സിഐടിയുവിന്റെ തൊഴിലാളികള് വീണ്ടും തടഞ്ഞെങ്കിലും പോലീസ് സംരക്ഷണം നല്കിയില്ല. വീണ്ടും ഹര്ജിക്കാര് ഹൈക്കോടതിയിലെത്തിയപ്പോള് ലോഡ് ഇറക്കാന് പോലീസ് മതിയായ സംരക്ഷണം നല്കണമെന്ന് പിന്നെയും നിര്ദേശിച്ചു. രണ്ട് ഉത്തരവുകളും പാലിച്ചില്ല. ഒരു മാസമായി സ്കൂളില് കിടക്കുന്ന കണ്ടെയ്നര് ലോറിയുടെ ടയറുകളും യൂണിയന്കാര് നശിപ്പിച്ചു. തുടര്ന്നാണ് ഹര്ജിക്കാര് കോടതിയലക്ഷ്യ ഹര്ജി നല്കിയത്. ഹര്ജി തിങ്കളാഴ്ച വീണ്ടും പരിഗണിക്കും.
