മുംബൈ: ജെഎന്യുവില് ഇപ്പോള് നടക്കുന്ന ഗ്യാങ്ങുകള് തമ്മിലുള്ള തമ്മില്ത്തല്ല് മാത്രമെന്ന് ബോളിവുഡ് നടി കങ്കണ റാവത്ത്. എല്ലാ കോളെജുകളിലും ഇത്തരത്തില് ഗ്യാങ്ങുകള് തമ്മില് അടിവും വഴക്കും ഉണ്ടാകാറുണ്ട്. അതിനപ്പുറം ജെഎന്യുവിലേത് ഒരു ദേശീയ പ്രശ്നമോ രാഷ്ട്രീയ വിഷയമോ അല്ലെന്നും കങ്കണ. ഇത്തരം ഗ്യാങ്ങുകള് തമ്മിലുള്ള തര്ക്കം അതിരുവിട്ടാല് പോലീസ് ഇടപെടണമെന്നും അടിച്ചോടിക്കണമെന്നും നടി. തന്റെ പുതിയ ചിത്രം പങ്കയുടെ പ്രചാരണാര്ത്ഥം സംഘടിപ്പിച്ച പരിപാടിയില് സംസാരിക്കുകയായിരുന്നു കങ്കണ.
ജെഎന്യുവിലെ അക്രമം ഇപ്പോള് പോലീസ് അന്വേഷിക്കുകയാണ്. ആ സര്വകലാശാലയില് എബിവിപി ഒരു വശത്തും മറ്റു രണ്ടു യൂണിയനുകള് എതിര്വശത്തുമാണ്. ഇത്തരത്തില് സംഘടന പ്രശ്നങ്ങള് എല്ലാ കോളെജിലുമുണ്ട്. ചണ്ഡിഗഡ് കോളെജില് പഠിക്കുമ്പോഴും ഇത്തരത്തില് ഗ്യാങ്ങുകള് തമ്മിലുള്ള അതിരൂക്ഷമായ ആക്രമണം കണ്ടിട്ടുണ്ട്. അന്ന് ഒരു വിദ്യാര്ഥിയെ മറ്റൊരു കൂട്ടം തല്ലിക്കൊന്നിട്ടുമുണ്ട്. മറ്റൊരു അവസരത്തില് ഒരു യുവാവിനെ ആള്ക്കൂട്ടം തല്ലിയോടിച്ചു കയറ്റിയത് ഞങ്ങള് താമസിക്കുന്ന ഹോസ്റ്റിലിലേക്കാണ്. ഞങ്ങളുടെ വാര്ഡന് ഇടപെട്ടാണ് ആ യുവാവിനെ മരണത്തില് നിന്നു രക്ഷിച്ചത്. ഇത്തരത്തില് കോളെജുകളിലെ പരസ്പരം ഉള്ള തര്ക്കങ്ങളും അക്രമങ്ങളും ദേശീയ പ്രശ്നമായി ഉയര്ത്താനുള്ള നിലവാരമില്ലെന്നും കങ്കണ.
