ന്യൂദല്‍ഹി: ഇന്ത്യയുടെ ആസാദ് ആസിഫ് ഖാന് ഓഷ്യാനിയ ഓറിയന്റ് ബോക്‌സിങ് കിരീടം. ഫലിപ്പീന്‍സില്‍ നടന്ന ചാമ്പ്യന്‍ഷിപ്പില്‍ മലേഷ്യയുടെ ഐമാന്‍ അബു ബാക്കറെ തോല്‍പ്പിച്ചാണ് ആസിഫ് ഖാന് ചാമ്പ്യനായത്. ഈ കിരീടം നേടുന്ന ആദ്യ ഇന്ത്യന്‍ താരമാണ്.മലേഷ്യയുടെ ഒന്നാം നമ്പര്‍ താരവും ഇത്‌വരെ തോല്‍വി അറിയാത്ത ബോക്‌സറുമായ അബുവിനെതിരെ തുടക്കം മുതല്‍ ആസിഫ് മികവ് കാട്ടി. എട്ട് റൗണ്ട് മത്സരത്തില്‍ സമ്പൂര്‍ണ ആധിപത്യം സ്ഥാപിച്ച ആസിഫ് അനായാസം ജയിച്ചു കയറി.
ഇന്ത്യന്‍ ബോക്‌സിങ് കൗണ്‍സിലിന്റെ അംഗീകാരമുള്ള പ്രൊഫഷണല്‍ ബോക്‌സറാണ് ആസിഫ്. ആസിഫിന്റെ കിരീട നേട്ടത്തില്‍ അഭിമാനിക്കുന്നതായി ഇന്ത്യന്‍ ബോക്‌സിങ് കൗണ്‍സില്‍ പ്രസിഡന്റ് മുരളീധരന്‍ രാജ പറഞ്ഞു. കൊല്‍ക്കത്തക്കാരനായ ആസിഫ് 2011 നവംബറിലാണ് പ്രൊഫഷണല്‍ ബോക്‌സറായി അരങ്ങേറിയത്. മുജ്താബ കമാലാണ് ആസിഫിന്റെ പരിശീലകന്‍.
