വൈക്കം: മനുഷ്യര്ക്കും സസ്യജീവജാലങ്ങള്ക്കും ഭാഗവത ശ്രവണത്താല് മോക്ഷം ലഭിക്കുന്ന നാളുകളായി. 37-ാമത് അഖിലഭാരത ഭാഗവത മഹാസത്രത്തിന് ചെമ്മനത്ത് ശ്രീകൃഷ്ണസ്വാമി ക്ഷേത്രത്തില് ഭക്തിനിര്ഭരമായ തുടക്കം. 22ന് സമാപിക്കും.
വ്യാഴാഴ്ച വൈകിട്ട് ഗുരുവായൂരില് നിന്ന് ചൈതന്യ രഥയാത്രയായി കൊണ്ടുവന്ന ശ്രീകൃഷ്ണവിഗ്രഹം പ്രതിഷ്ഠിച്ചതിന് ശേഷം സത്രസമരംഭ സഭ ചേര്ന്നു. എസ്എന്ട്രസ്റ്റ് ബോര്ഡ് അംഗം പ്രീതി നടേശന് ഭദ്രദീപം തെളിയിച്ചു. സത്ര സമാരംഭ സഭ പ്രതിപക്ഷ നേതാവ് രമേശ് ചെന്നിത്തല ഉദ്ഘാടനം ചെയ്തു. ആലുവ അദ്വൈതാശ്രമം സെക്രട്ടറി ശിവസ്വരൂപാനന്ദ അനുഗ്രഹ പ്രഭാഷണം നടത്തി. സത്ര നിര്വഹണ സമിതി ചെയര്മാന് ബി. അനില്കുമാര് അധ്യക്ഷനായി. സത്രവേദിയില് ക്ഷേത്രതന്ത്രി മോനാട്ടില്ലത്ത് കൃഷ്ണന് നമ്പൂതിരി വിഗ്രഹപ്രതിഷ്ഠയും കൊടിയേറ്റും നടത്തി. തൃശൂര് നടുവില് മഠം അച്യുതഭാരതി, മള്ളിയൂര് ദിവാകരന് നമ്പൂതിരി, സത്രസമിതി പ്രസിഡന്റ് എം.കെ. കുട്ടപ്പന് മേനോന്, സെക്രട്ടറി ടി.ജി. പത്മനാഭന് നായര്, സത്രനിര്വഹണ സമിതി ജനറല് കണ്വീനര് രാഗേഷ് ടി. നായര്, പ്രോഗ്രാം കമ്മിറ്റി കണ്വീനര് പി.എന്. രാധാകൃഷ്ണന് തുടങ്ങിയവര് പങ്കെടുത്തു.
എല്ലാ ദിവസവും അഷ്ടദ്രവ്യമഹാഗണപതി ഹോമം നടക്കും. കൂടാതെ വിഷ്ണു സഹസ്രനാമജപം, വേദസൂക്തജപം, ഭാഗവത പാരായണം, നാരായണീയ പാരായണം, നാമസങ്കീര്ത്തനം, സംഗീതസദസ്സ് എന്നിവ ഉണ്ടാകും. സത്രത്തില് പങ്കെടുക്കാന് എത്തുന്നവര്ക്കായി താമസ, ഭക്ഷണ, യാത്രാ സൗകര്യങ്ങള് ഏര്പ്പെടുത്തിയിട്ടുണ്ട്. വൈക്കം മഹാദേവക്ഷേത്രത്തില് നിന്ന് നാല് കിലോമീറ്റര് തെക്കുമാറി ചെമ്മനത്തുകരയിലാണ് ശ്രീകൃഷ്ണ സ്വാമി ക്ഷേത്രം സ്ഥിതി ചെയ്യുന്നത്.
