കോഴിക്കോട്: നടി പാര്വ്വതി തിരുവോത്തിനെ അപകീര്ത്തിപ്പെടുത്തുന്ന വിധത്തില് സമൂഹ മാധ്യമങ്ങളിലൂടെ വാര്ത്ത പ്രചരിപ്പിച്ചയാള് പിടിയില്. പാലക്കാട് സ്വദേശി കിഷോര് ആണ് പിടിയിലായത്. നടിയുടെ അച്ഛനും സഹോദരനും ഉള്പ്പടെയുള്ള ബന്ധുക്കള്ക്ക് നടിയെ വളരെ മോശം രീതിയില് ചിത്രീകരിച്ചകൊണ്ട് ഇയാള് വ്യാപകമായി സന്ദേശം അയച്ചിരുന്നു. ഇതിന്റെ അടിസ്ഥാനത്തില് നല്കിയ പരാതിയിലാണ് നടപടി.
കോഴിക്കോട് നോര്ത്ത് അസിസ്റ്റന്റ് കമ്മീഷണര് കെ. അഷ്റഫിന്റെ നേതൃത്വത്തിലുള്ള സ്ക്വാഡ് തിരുവനന്തപുരം രാജ്യാന്തര ചലചിത്രമേളയുടെ വേദിക്കരികില് നിന്നാണ് ഇയാളെ പിടികൂടിയത്.
സമൂഹ മാധ്യമങ്ങളിലൂടെ പാര്വതിയുടെ സഹോദരനെ പരിചയപ്പെട്ട ശേഷമാണ് ഇയാള് മോശം സന്ദേശങ്ങള് അയച്ചത്. അത്യാവശ്യകാര്യങ്ങള് പറയാനുണ്ടെന്ന് പറഞ്ഞ ശേഷം നടി മാഫിയ സംഘത്തിന്റെ കയ്യില് അകപ്പെട്ട് പ്രശ്നത്തിലാണെന്നും ഇയാള് പറഞ്ഞിരുന്നു. എന്നാല് വിദേശ സന്ദര്ശനത്തിലാണ് പാര്വ്വതിയെന്ന് പറഞ്ഞതോടെ അത് കള്ളമാണെന്നും താന് പാര്വ്വതിയുടെ കാമുകനാണെന്നും കിഷോര് വീട്ടുകാരോട് പറഞ്ഞു. ശല്യം സഹിക്കാതെ വന്നതോടെ പാര്വ്വതിയുടെ വീട്ടുകാര് മറുപടി നല്കുന്നത് നിര്ത്തുകയായിരുന്നു. ഇവര് പ്രതികരിക്കാതെയായതോടെയാണ് ഇയാള് നടിയുടെ കോഴിക്കോടുള്ള വീട്ടിലും എത്തിയിരുന്നു.
അതേസമയം കിഷോറിനെതിരെ വിവിധ സ്റ്റേഷനുകളിലായി പല കേസുകളും രജിസ്റ്റര് ചെയ്തിട്ടുണ്ട്. തഹസില്ദാറാണെന്ന് പറഞ്ഞ് മണല് കടത്താന് ശ്രമിച്ചതിന് തൃശൂരില് ഇയാള്ക്കെതിരെ കേസെടുത്തിട്ടുണ്ട്. മജിസ്ട്രേറ്റാണെന്ന് വ്യാജരേഖ ചമച്ചതിന് കൊടുങ്ങല്ലൂരും ഇയാള്ക്കെതിരെ കേസുകള് ഉണ്ടെന്ന് അസിസ്റ്റന്റ് കമ്മിഷണര് കെ.അഷ്റഫ് വ്യക്തമാക്കി. കൂടാതെ അഭിഭാഷകനും സംവിധായകനുമാണെന്നാണ് ഇയാള് അവകാശപ്പെടുന്നത്.
