തിരുവനന്തപുരം: മഹാത്മാഗാന്ധി ഗ്രാമീണ തൊഴിലുറപ്പ് പദ്ധതിയുടെ സോഷ്യല് ഓഡിറ്റ് യൂണിറ്റ് ഡയറക്ടര് സ്ഥാനത്തു നിന്ന് ഡോ. എ.ബി. ജോര്ജിനെ നീക്കിയ ഉത്തരവ് പിന്വലിക്കണമെന്നാവശ്യപ്പെട്ട് ബിജെപി മുന് സംസ്ഥാന അധ്യക്ഷന് കുമ്മനം രാജശേഖരന് മുഖ്യമന്ത്രി പിണറായി വിജയന് കത്ത് നല്കി. 2005ലെ മഹാത്മാഗാന്ധി ഗ്രാമീണ തൊഴിലുറപ്പ് ആക്ട് പ്രകാരം സ്വതന്ത്രമായ സോഷ്യല് ഓഡിറ്റ് രൂപീകരിക്കാന് സംസ്ഥാന സര്ക്കാര് ബാധ്യസ്ഥമാണ്.
അതനുസരിച്ച് 2017 ഡിസംബറില് നിയമിതനായ എ.ബി. ജോര്ജിന് മൂന്നു വര്ഷത്തെ കാലാവധിയുണ്ട്. ഡയറക്ടറെ നീക്കം ചെയ്തതിലൂടെ ഓഡിറ്റ് സംവിധാനം അട്ടിമറിക്കാനും അഴിമതിക്കും ക്രമക്കേടിനുംവഴിയൊരുക്കാനും സാഹചര്യമുണ്ടായെന്നും കത്തില് ആരോപിക്കുന്നു. തന്മൂലം തൊഴിലുറപ്പുപദ്ധതി തന്നെ സ്തംഭനാവസ്ഥയിലേക്ക് നീങ്ങും. 2000 കോടി രൂപയോളം പ്രതിവര്ഷം ചെലവാക്കുന്ന പദ്ധതി നിര്ത്തലായാല് തൊഴില് ചെയ്യുന്ന പാവപ്പെട്ട തൊഴിലാളികളുടെ ജീവിതം വഴിമുട്ടും.
സോഷ്യല് ഓഡിറ്റ് യൂണിറ്റ് നിലവില് വന്ന ശേഷം നടത്തിയ പരിശോധനകളില് പല പഞ്ചായത്തുകളിലെയും ക്രമക്കേടുകള് കണ്ടെത്തി. അവയെല്ലാം ഗ്രാമസഭകളില് ചര്ച്ച ചെയ്തു. സോഷ്യല് ഓഡിറ്റ് യൂണിറ്റിന്റെ ഗവേണിങ് ബോഡി, ഡയറക്ടറുടെ നടപടി ശരിവച്ചു. വന് ക്രമക്കേടുകള് ഇനിയും പുറത്തുവരുമെന്ന ഭയമാണ് യൂണിറ്റ് ഡയറക്ടറെ നീക്കിയതിനു പിന്നിലെന്നും കുമ്മനം ആരോപിച്ചു.
