ന്യൂദല്ഹി: പഴയ ശബരിമല വിധി ഉടന് നടപ്പാക്കണമെന്നാവശ്യപ്പെട്ട് ബിന്ദു അമ്മിണി സുപ്രീം കോടതിയില് അപേക്ഷ നല്കി. കൂടാതെ സ്ത്രീകളുടെ സന്ദര്ശനത്തെ ആരെങ്കിലും തടഞ്ഞാല് അവര്ക്കെതിരെ കര്ശന നടപടി സ്വീകരിക്കണമെന്നും ബിന്ദു അമ്മിണി അപേക്ഷയില് പറയുന്നു. നിലവില് ശബരിമലയിലെത്തുന്ന സ്ത്രീകളുടെ പ്രായം പരിശോധിക്കുന്ന നടപടി പോലീസിന്റെ ഭാഗത്തുനിന്നുണ്ട്. 50വയസ്സ് പൂര്ത്തിയാകാത്ത സ്ത്രീകളെ തിരികെ പറഞ്ഞയക്കുന്ന നിലപാടാണ് പോലീസ് എടുത്തിരിക്കുന്നത്. ഇത് തടയണമെന്നും അപേക്ഷയില് പറയുന്നു.
സ്ത്രീ പ്രവേശന വിധിക്ക് സംസ്ഥാന സര്ക്കാര് പ്രചാരണം നല്കണമെന്നും ഹര്ജിയിലുണ്ട്. ജനുവരി രണ്ടെന്ന ദിവസമുണ്ടെങ്കില് താന് ശബരിമലയില് എത്തിയിരിക്കുമെന്ന് ബിന്ദു അമ്മിണി വെല്ലുവിളിച്ചിട്ടുണ്ട്. നവോത്ഥാന കേരളം സ്ത്രീപക്ഷ കൂട്ടായ്മ എന്ന സംഘടനയുടെ പേരില് രാജ്യത്തിന്റെ വിവിധ ഭാഗങ്ങളിലുള്ള 100 സ്ത്രീകളെയും ഒപ്പംകൂട്ടിയാണ് ശബരിമലയില് കയറാന് ഉദ്ദേശിക്കുന്നതെന്ന് ബിന്ദു പറഞ്ഞു. നേരത്തേ ദര്ശനം നടത്താനെത്തിയവരെ തടഞ്ഞതിന് ചിഫ് സെക്രട്ടറി ഉള്പ്പെടെയുള്ളവര്ക്കെതിരെ കോടതി അലക്ഷ്യ ഹര്ജി നല്കുമെന്ന് ബിന്ദു അമ്മിണി മാധ്യമങ്ങളോട് പറഞ്ഞിരുന്നു. തല്ക്കാലം അത്തരത്തിലുള്ള ഒരു കോടതി അലക്ഷ്യ ഹര്ജിയല്ല ഇപ്പോള് കൊടുത്തിരിക്കുന്നും അവര് പറഞ്ഞു. കഴിഞ്ഞ വര്ഷം ബിന്ദു അമ്മിണിയും കനക ദുര്ഗയും സര്ക്കാരിന്റെ സഹായത്തോടെ ഇരുട്ടിന്റെ മറവില് മല ചവിട്ടിയത് ജനുവരി രണ്ടിനാണ്. അതിന്റെ വാര്ഷികം കൂടിയാണ് അടുത്തമാസം രണ്ടാം തിയതി.
ക്രിസ്മസ് അവധിക്ക് മുമ്പ് തന്നെ ഈ ഹര്ജികള് കോടതിയുടെ പരിഗണനയ്ക്ക് വരും. എന്നാല് ഇക്കാര്യത്തില് അന്തിമ തീരുമാനമെടുക്കേണ്ടത് സുപ്രീം കോടതി ചീഫ് ജസ്റ്റിസ് എസ്.എ ബോബ്ഡെയാണ്. മുന്പ് ക്ഷേത്ര പ്രവേശനവുമായി ബന്ധപ്പെട്ട ഒരു കേസില് ‘ അന്യന്റെ വീട്ടില് കയറാന് പോലീസ് സംരക്ഷണം അരെങ്കിലും ചോദിക്കുമോ’ എന്ന് ബോബ്ഡെ ചോദിച്ചിരുന്നു. തൃശ്ശൂര്പൂരം വായു മലിനീകരണം ഉണ്ടാക്കുമെന്നും വെടിക്കെട്ട് നിരോധിക്കണമെന്നും ആവശ്യപ്പെട്ട് ഹര്ജി പരിഗണിക്കവെ ‘ എന്നാല് വായുമലിനീകരണം കൂടുതല് ഉണ്ടാക്കുന്നത് വാഹനങ്ങളാണ്, വാഹനങ്ങള് നിരോധിക്കണ്ടേ’ എന്ന് ബോബ്ഡെ ചോദിക്കുകയും തൃശ്ശൂര്പൂരത്തിന് വെടിക്കെട്ട് അനുവദിക്കുകയും ചെയ്തു. ശബരിമല വിധിയും ഇനി ബോബ്ഡെയുടെ കൈകളിലാണ്.
