കാബൂള്: അഫ്ഗാനിസ്ഥാനില് 31 ഐഎസ് ഭികരരും കുടുംബവും കീഴടങ്ങി. ഭീകരര്ക്കൊപ്പം 62 സ്ത്രീകളും കുട്ടികളും ഉണ്ടായിരുന്നു. ഇതോടെ രണ്ടാഴ്ചയ്ക്കിടെ അഫ്ഗാനിസ്ഥാനില് കീഴടങ്ങിയവരുടെ എണ്ണം 1058 ആയി. അഫ്ഗാനിലെ അച്ചിന് ജില്ലയിലാണ് ഭീകരര് കീഴടങ്ങിയത്. ഇവരില് നിന്ന് നിരവധി ആയുധങ്ങളും പിടിച്ചെടുത്തതായി സേന അധികൃതര് അറിയിച്ചു. ഐഎസ് തലവനായിരുന്ന അബൂബക്കര് അല് ബാഗ്ദാദിയെ അമേരിക്കന് കമാന്ഡോസ് വധിച്ചതിനു പിന്നാലെയാണ് സംഘടനയില് നിന്ന് അനുയായികള് കൊഴിയുന്നത്. അമേരിക്കന് കമാന്ഡോസ് വരുന്നതുകണ്ട് പേടിച്ച് ഭാര്യമാരെയും മക്കളേയും കൊലപ്പെടുത്തിയ ശേഷം ആത്മഹത്യ ചെയ്യുകയായിരുന്നു ബാഗ്ദാദി.
ബാഗ്ദാദിയുടെ മരണത്തോടെ ഭയന്നിരിക്കുകയാണ് ഐഎസ് ഭീകരര്. നവംബര് 12ന് സ്ത്രീകളും കുട്ടികളും ഉള്പ്പെടെ 900 പേര് കീഴടങ്ങിയിരുന്നു. തുടര്ന്ന് നവംബര് 16ന് 18 ഐഎസ് ഭീകരര് ഉള്പ്പെടെ 65 സ്ത്രീകളും കുട്ടികളും കീഴടങ്ങി. തൊട്ടുപിന്നാലെയാണ് 31 ഭീകരര് കീഴടങ്ങിയതായി സുരക്ഷ സേന അറിയിച്ചത്. അടുത്തിടെ സുരക്ഷാ സേനയ്ക്കു മുമ്പില് കീഴടങ്ങുന്ന ഐഎസ് ഭീകരരുടെ എണ്ണം വര്ദ്ധിക്കുന്നുണ്ടെന്ന് സേനാ അധികൃതര് അറിയിച്ചു. തീവ്രവാദികള്ക്ക് നേരെ അഫ്ഗാന് സായുധ സേന നടപടി കര്ശനമാക്കിയതും ഭീകരര് കീഴടങ്ങാന് കാരണമായെന്ന് കണക്കാക്കുന്നു.
