ന്യൂദല്ഹി: ആസാമിലെ ഭീകര സംഘടനയായ നാഷണല് ഡെമോക്രാറ്റിക് ഫ്രണ്ട് ഓഫ് ബോഡോലാന്ഡിന്റെ നിരോധനം കേന്ദ്രസര്ക്കാര് അഞ്ച് വര്ഷത്തേക്ക് കൂടി നീട്ടി. കേന്ദ്ര ആഭ്യന്തര മന്ത്രാലയമാണ് ഇക്കാര്യം അറിയിച്ചത്.
രാജ്യത്തെ പ്രാദേശിക ഐക്യത്തിന് തടസം സൃഷ്ടിക്കാനും ബോധപൂര്വ്വം അക്രമങ്ങള് അഴിച്ചുവിടാനം എന്ഡിഎഫ്ബി ശ്രമിക്കുന്നതായി ആഭ്യന്തര മന്ത്രാലയം കണ്ടെത്തിയതിനെ തുടര്ന്നാണ് നടപടി. മേഖലയിലുള്ള മറ്റ് സംഘടനകളുമായി ചേര്ന്ന് കേന്ദ്രസര്ക്കാരിനും ആസാം സര്ക്കാരിനുമെതിരെ പ്രവര്ത്തിക്കുകയും ജനങ്ങളില് ഭീതി പരത്താനുമാണ് ഇവര് ശ്രമിക്കുന്നതെന്നും ആസാമില് പ്രത്യേക ബോഡോലാന്ഡ് എന്ന ആവശ്യത്തിനായാണ് ഇവര് പ്രവര്ത്തിക്കുന്നതെന്നും ആഭ്യന്തര മന്ത്രാലയത്തിന്റെ പ്രസ്താവനയില് പറയുന്നു.
പ്രത്യേക ബോഡോലാന്ഡിന്റെ നിര്മ്മാണത്തിനായി ഇവര് പ്രദേശവാസികളില് നിന്നും പണം പിടിച്ചു പറിക്കുന്നതായും സംഘടനയുടെ ഭീകര പ്രവര്ത്തനങ്ങള്ക്കായി യുവാക്കളെ റിക്രൂട്ട് ചെയ്യുന്നതായും ആഭ്യന്തര മന്ത്രാലയം അറിയിച്ചു. രാജ്യത്തിന്റെ അതിര്ത്തികളില് ഒളിത്താവളങ്ങള് നിര്മ്മിച്ച് മറ്റ് രാജ്യങ്ങളില് നിന്നും ഇവര് ആയുധങ്ങള് ശേഖരിക്കുന്നുണ്ട്. രാജ്യവിരുദ്ധ പ്രവര്ത്തനം നടത്തുന്ന എന്ഡിഎഫ്ബിയുടെ സമീപകാല റിപ്പോര്ട്ടുകളും പുറത്തുവിട്ടിട്ടുണ്ട്.
2015 ജനുവരി മുതല് 19 സാധാരണക്കാരെയാണ് ഇവര് അക്രമങ്ങളിലൂടെ കൊലപ്പെടുത്തിയത്. ജനുവരി മുതല് 62 ആക്രമണങ്ങള് ഇവരുടെ ഭാഗത്തു നിന്നും ഉണ്ടായി. ഇതില് 55 ഭീകരരെ വധിക്കുകയും 450ഓളം പേരെ അറസ്റ്റ് ചെയ്യുകയും ചെയ്തു. 444 ആയുധങ്ങളും മറ്റ് യുദ്ധോപകരണങ്ങളുമാണ് ഇവരുടെ പക്കല് നിന്നും കണ്ടെത്തിയത്.
കഴിഞ്ഞ മാസം ആസാമിലെ കൊക്റാജഹര് ജില്ലയില് നിന്നും ആറ് എന്ഡിഎഫ്ബി ഭീകരരെ സൈന്യം അറസ്റ്റ് ചെയ്തിരുന്നു. ഇന്ത്യന് ആര്മിയും ആസാം പോലീസും സംയുക്തമായി നടത്തിയ ഓപ്പറേഷനിലാണ് ഭീകരര് പിടിയിലായത്. എം16 റൈഫിള്, 7.65 എംഎം പിസ്റ്റലുകള്, യുദ്ധോപകരണങ്ങള്, നിരോധിത മരുന്നുകള് എന്നിവയും ഇവരില് നിന്നും കണ്ടെടുത്തിരുന്നു.
