ന്യൂദല്‍ഹി: കോണ്‍ഗ്രസ് അധ്യക്ഷ സോണിയ ഗാന്ധിക്കും മുന്‍ അധ്യക്ഷന്‍ രാഹുല്‍ ഗാന്ധിക്കും ഏര്‍പ്പെടുത്തിയിരുന്ന എസ്പിജി സുരക്ഷ പിന്‍വലിച്ച വിഷയത്തില്‍ രാജ്യസഭയില്‍ പ്രതിഷേധിച്ച കോണ്‍ഗ്രസ് നേതാക്കള്‍ക്ക് ബിജെപി വര്‍ക്കിംഗ് പ്രസിഡന്റും എംപിയുമായ ജെ.പി നദ്ദയുടെ മറുപടി. കോണ്‍ഗ്രസ് എം.പി ആനന്ദ് ശര്‍മ ഉയര്‍ത്തിയ വിമര്‍ശനത്തിന് മറുപടി നല്‍കുകയായിരുന്നു അദ്ദേഹം. ആഭ്യന്തരമന്ത്രാലയത്തില്‍ സുരക്ഷ സംബന്ധിച്ച് ഒരു പ്രോട്ടോക്കാള്‍ ഉണ്ട്. അത് അനുസരിച്ചാണ് തീരുമാനമെടുക്കുക. രാഷ്ട്രീയക്കാരല്ല, സുരക്ഷ സംബന്ധിച്ച തീരുമാനമെടുക്കുക ആഭ്യന്തര മന്ത്രാലയമാണെന്നും നദ്ദ ചൂണ്ടിക്കാട്ടി.
നേതാക്കളുടെ സുരക്ഷ പിന്‍വലിച്ചില്ല. ഇതില്‍ രാഷ്‌ട്രീയമായി ഒന്നുമില്ല. ഭീഷണിയോ ആശങ്കയോ ഉള്ള സാഹചര്യങ്ങള്‍ വിലയിരുത്തിയാണ് സുരക്ഷ നല്‍കുന്നതും പിന്‍വലിക്കുന്നതും, നദ്ദ പറഞ്ഞു. കേന്ദ്രസര്‍ക്കാര്‍ സുരക്ഷയുടെ കാര്യത്തില്‍ പക്ഷപാത നടപടിയെടുക്കരുതെന്ന് കോണ്‍ഗ്രസ് എംപി ആനന്ദ് ശര്‍മ രാജ്യസഭയില്‍ ആരോപിച്ചു. ഇതിന് മറുപടി നല്‍കവെയാണ് നദ്ദ ഇക്കാര്യം പറഞ്ഞത്.
1984ല്‍ ഇന്ദിരാഗാന്ധിയുടെ വധത്തിന് ശേഷമാണ് എസ്പിജി രൂപീകരിച്ചത്. പ്രധാനമന്ത്രിമാരുടെ സുരക്ഷാ സംഘം എന്ന നിലയിലായിരുന്നു ഇത്. രാജീവ് ഗാന്ധി പ്രധാനമന്ത്രി അല്ലാതിരുന്ന വേളയില്‍ എസ്പിജി സുരക്ഷ നല്‍കിയിരുന്നില്ല. എന്നാല്‍ അദ്ദേഹത്തിന്റെ വധത്തിന് ശേഷം ഭാര്യ സോണിയ ഗാന്ധിക്കും മക്കള്‍ക്കും എസ്പിജി സുരക്ഷ നല്‍കുകയായിരുന്നു. അന്നത്തെ പ്രത്യേക സാഹചര്യം കണക്കിലെടുത്തായിരുന്നു തീരുമാനം. തമിഴ്പുലികള്‍ ഇല്ലാതായതോടെ ഗാന്ധി കുടുംബത്തിന് എസ്പിജി സുരക്ഷയുടെ ആവശ്യമില്ലെന്ന് സുബ്രഹ്മണ്യന്‍ സ്വാമി പറഞ്ഞു. ഇതോടെ സഭയില്‍ ബഹളമായി. തുടര്‍ന്ന് ജെപി നദ്ദ ഇടപെടുകയായിരുന്നു.
പാര്‍ലമെന്റ് സമ്മേളനത്തിന്റെ മൂന്നാം ദിവസമാണ് കോണ്‍ഗ്രസ് സുരക്ഷാ വിഷയം രാജ്യസഭയില്‍ ഉന്നയിച്ചത്. കഴിഞ്ഞ ദിവസം ഇതേ വിഷയം ലോക്സഭയില്‍ ഉന്നയിച്ച കോണ്‍ഗ്രസ് എംപിമാര്‍ പ്രതിഷേധിച്ചിരുന്നു. 28 വര്‍ഷത്തിനു ശേഷമാണ് ഗാന്ധി കുടുംബത്തിനുള്ള എസ്പിജി സുരക്ഷ പിന്‍വലിച്ചത്. സോണിയ ഗാന്ധിക്കും രാഹുല്‍ ഗാന്ധിക്കും പ്രിയങ്ക ഗാന്ധിക്കുമുള്ള സുരക്ഷ കഴിഞ്ഞ ദിവസം സിആര്‍പിഎഫ് ഏറ്റെടുത്തിരുന്നു. ഇസ്രായേലി എക്സ് -95, എ.കെ സീരീസ്, എം.പി-അഞ്ച് തോക്ക് അടക്കമുള്ള ആയുധങ്ങളുമായാണ് സിആര്‍പിഎഫ് സുരക്ഷയൊരുക്കുക.
വിവിഐപികള്‍ക്കുള്ള പ്രത്യേക സുരക്ഷ സേനയുടെ കീഴില്‍ ഇസെഡ് പ്ലസ് സുരക്ഷയാണ് ഇനി ഗാന്ധി കുടുംബത്തിന് നല്‍കുക. എന്നിട്ടും അത് പോരെന്ന വാശിയാണ് കോണ്‍ഗ്രസ്സിന്. ആയുധധാരികളായ കമാന്‍ഡോ സംഘം 10 ജന്‍പഥിലെ സോണിയയുടെ വസതിക്ക് കാവലൊരുക്കും. സമാന സുരക്ഷതന്നെയാണ് കോണ്‍ഗ്രസ് മുന്‍ അധ്യക്ഷനും വയനാട് എംപിയുമായ രാഹുല്‍ ഗാന്ധിയുടെ തുഗ്ലക് ലെയ്നിലെ വീടിനും കോണ്‍ഗ്രസ് ജനറല്‍ സെക്രട്ടറി പ്രിയങ്ക ഗാന്ധിയുടെ ലോധി എസ്റ്റേറ്റിലെ വീടിനും നല്‍കുക. നിലവില്‍ മുന്‍ പ്രധാനമന്ത്രിമാരടക്കം 52 പേര്‍ക്കാണ് വിവിഐപി സുരക്ഷ നല്‍കുന്നത്. എസ്പിജി സുരക്ഷ പ്രധാനമന്ത്രിക്ക് മാത്രമാക്കാനാണ് കേന്ദ്രസര്‍ക്കാരിന്റെ തീരുമാനം.
