ചാലക്കുടി : ഒരു ദിവസത്തിനുള്ളില് തൃശൂര് ജില്ലയില് നിന്നും കാണാതായ എട്ടു പെണ്കുട്ടികളേയും മണിക്കൂറുകളുടെ വ്യത്യാസത്തില് പോലീസ് കണ്ടെത്തി. ഇതില് ഏഴ് പേരും സമൂഹ മാധ്യമങ്ങള് വഴി പരിചയപ്പെട്ട സുഹൃത്തുക്കള്ക്കൊപ്പമാണ് നാട് വിട്ടതെന്നും കണ്ടെത്തിയിട്ടുണ്ട്.
കാണാതായ പെണ്കുട്ടികളില് ഒരാള്ക്ക് പ്രായപൂര്ത്തിയായിരുന്നില്ല. കുടുംബ പ്രശ്നങ്ങള് മൂലമാണ് ചാലക്കുടി സ്വദേശിയായ ഈ കുട്ടി വീട് ഉപേക്ഷിച്ചതെന്നും പോലീസ് അറിയിച്ചു. 24 മണിക്കൂറിനുള്ളില് തൃശൂര് ജില്ലയില് നിന്നുമാത്രം എട്ട് പെണ്കുട്ടികളെ കാണാതായത് വിവാദമായിരുന്നു. പുതുക്കാട്, മാള, പാവറട്ടി, ചാലക്കുടി, വടക്കാഞ്ചേരി, അയ്യന്തോള് സ്റ്റേഷനുകളിലാണ് ഈ കേസുകള് രജിസ്റ്റര് ചെയ്തിട്ടുള്ളത്.
സൈബര് സെല്ലിന്റെ സഹായത്തോടെ നടത്തിയ അന്വേഷണത്തിലാണ് പെണ്കുട്ടികളെ കണ്ടെത്താന് കഴിഞ്ഞത്. തൃശൂര് സിറ്റി, റൂറല് പോലീസ് ഉദ്യോഗസ്ഥരുടെ സംഘം നടത്തിയ അന്വേഷണത്തിലാണ് ഇവരെ കണ്ടെത്താന് സാധിച്ചത്. സാമൂഹിക മാധ്യമങ്ങളിലൂടെ പരിചയപ്പെട്ട് പ്രണയത്തിലായവരാണ് കൂടുതലും. ചാലക്കുടിയിലെ കേസ് മാത്രം അയല്വാസിക്കൊപ്പമാണ് പോയത്. കോളജ് വിദ്യാര്ത്ഥികളാണ് ഭൂരിഭാഗം പേരും.
അതേസമയം ഓരോ മാസവും പെണ്കുട്ടികളെ കാണാതായെന്ന് ചൂണ്ടിക്കാട്ടി സ്റ്റേഷനുകളില് രജിസ്റ്റര് ചെയ്യുന്ന കേസുകളുടെ എണ്ണം കൂടി വരികയാണ്. പരാതിയുടെ അടിസ്ഥാനത്തില് പ്രായപൂര്ത്തിയായ പെണ്കുട്ടികളെ കണ്ടെത്തി വിവരം വീട്ടുകാരെ അറിയിക്കുക മാത്രമാണ് പോലീസിന് നിയമപരമായി ചെയ്യാന് കഴിയുന്നത്. രക്ഷിതാക്കള് ജാഗ്രത പാലിക്കണമെന്ന് പോലീസ് പറയുന്നു.
