തിരുവനന്തപുരം: ധനമന്ത്രി ഡോ. തോമസ് ഐസക് കഴിഞ്ഞ വര്ഷം കൊട്ടിഘോഷിച്ച് നടപ്പാക്കിയ പ്രവാസി ചിട്ടിയില് ഒരുവര്ഷംകൊണ്ട് ചേര്ന്നത് 11,551 പേര് മാത്രം. കാലാവധി പൂര്ത്തിയാവുമ്പോള് 435 കോടിയുടെ മാത്രം വിറ്റുവരവ് ലഭ്യമാവും. കിഫ്ബിയ്ക്ക് പണം നല്കാനായി ആവിഷ്കരിച്ചതാണ് പ്രവാസി ചിട്ടി. ആദ്യവര്ഷം 12,000 കോടി രൂപ ചിട്ടിയിലൂടെ സമാഹരിക്കുകയും അതില് 1000 കോടി രൂപ കിഫ്ബി പദ്ധതികള്ക്കായി ഉപയോഗിക്കുകയും ചെയ്യുക എന്നതായിരുന്നു തോമസ് ഐസക്കിന്റെ പദ്ധതി. എന്നാല് ഇപ്പോള് പ്രവാസി ചിട്ടിയില് നിന്നും കിഫ്ബിയിലേക്ക് കൊടുക്കാനായത് 62 കോടി രൂപ മാത്രം.
പ്രവാസികള്ക്കിടയില് നടത്തിയ സര്വേയില് 70 ശതമാനം പേരും ചിട്ടിയില് ചേരാന് തയ്യാറാണെന്ന് കണ്ടെത്തിയതായി ധനമന്ത്രി പറഞ്ഞു. 24 ലക്ഷത്തോളം പ്രവാസികള് ഗല്ഫില് തന്നെയുണ്ടെന്നാണ് കണക്ക്. അങ്ങനെ വന്നാല് 16 ലക്ഷത്തിലധികം പേര് ചിട്ടിയില് ചേരേണ്ടതാണ്. ചേര്ന്നതാകട്ടെ 11,551 മാത്രം. ചിട്ടിയില് ചേര്ന്നതില് 90 ശതമാനത്തിലധികം ഗള്ഫ് മേഖലയില് നിന്നാണുതാനും.
പ്രവാസി ചിട്ടി പൊളിഞ്ഞ സാഹചര്യത്തില് കൂടുതല് പേരെ ആകര്ഷിക്കാന് പെന്ഷന് പദ്ധതി നടപ്പാക്കുമെന്ന് ധനമന്ത്രി തോമസ് ഐസക് ഇന്നലെ പറഞ്ഞു. ഇന്നലെ മുതല് പ്രവാസി ചിട്ടിയില് ചേരുന്നവര്ക്കാണ് പെന്ഷന് ആനുകൂല്യങ്ങള് ലഭിക്കുക. പതിനായിരം രൂപ പ്രതിമാസ അടവുവരുന്ന ചിട്ടിയില് 60 മാസത്തവണയെങ്കിലും അടയ്ക്കുന്നവര്ക്ക് 2000 രൂപ പെന്ഷനായി കിട്ടുന്ന പുതിയ പദ്ധതിയാണിത്. പ്രവാസി ക്ഷേമബോര്ഡ് മുഖേന നടപ്പാക്കുന്ന പദ്ധതിയില് അംശദായം കെഎസ്എഫ്ഇ അടയ്ക്കും.
പ്രവാസികള് ചിട്ടിയോട് വിമുഖത കാണിക്കുന്നതിനാല് കേരളത്തിന് പുറത്ത് ഇന്ത്യയിലുള്ള മലയാളികളെ കൂടി ചിട്ടിയില് ചേര്ക്കും. ഇതിനുള്ള സോഫ്റ്റ്വെയര് തയ്യാറാക്കല് അന്തിമ ഘട്ടത്തിലാണെന്നും മന്ത്രി പറഞ്ഞു.
