കൊച്ചി: കേരള ബ്ലാസ്റ്റേഴ്സിന്റെ ഹോം ഗ്രൗണ്ട് കൊച്ചിയില് നിന്ന് മാറ്റാന് നിര്ബന്ധിതരായി ടീം അധികൃതര്. ഐഎസ്എല് മത്സരങ്ങളില് കൊച്ചി വേദിയാകുമ്പോള് കൊച്ചി കോര്പ്പറേഷന്, ജിസിഡിഎ, പോലീസ്, കേരള ഫുട്ബോള് അസോസിയേഷന് എന്നിവര് ചേര്ന്ന് ക്ലബിനെ പിഴിയുകയാണെന്ന് ക്ലബ് അധികൃതര് പറഞ്ഞു. ഇവരുടെ നിസ്സഹകരണം മൂലം ഹോം ഗ്രൗണ്ടായ കൊച്ചി ജവാഹര്ലാല് നെഹ്രു സ്റ്റേഡിയം വിടാന് ആലോചിക്കുന്നതായി ബ്ലാസ്റ്റേഴ്സ് മാനേജ്മെന്റ ഉന്നതകേന്ദ്രങ്ങള് സൂചിപ്പിച്ചതായി റിപ്പോര്ട്ടുകള്. മൂന്നാം തിയതി നടക്കുന്ന ഉന്നതതല യോഗത്തില് ഇക്കാര്യ ചര്ച്ചചെയ്ത് തീരുമാനമെടുക്കും.
കലൂരിലെ സ്റ്റേഡിയത്തില് കളി നടത്താനുള്ള അനുമതി കിട്ടുന്നത് മുതല് സുരക്ഷ വരെ എല്ലാകാര്യങ്ങളിലും വന് തടസ്സങ്ങളാണ് നേരിടേണ്ടി വരുന്നതെന്ന് മാനേജ്മെന്റ് വൃത്തങ്ങള് വ്യക്തമാക്കുന്നു. ഇതിനുപുറമേ വിനോദനികുതി കൂടി അടിച്ചേല്പ്പിക്കുമെന്നാണ് കോര്പ്പറേഷന്റെ ഭീഷണി. ഇതേ തുടര്ന്നാണ് ഹോം ഗ്രൗണ്ട് മാറ്റാന് നിര്ബന്ധിതരാക്കുന്നത്. മത്സരങ്ങള് നടത്താന് വേണ്ട സാഹചര്യമൊരുക്കേണ്ട കേരള ഫുട്ബോള് അസോസിയേഷനും (കെഎഫ്എ) കാര്യമായൊന്നും ചെയ്യുന്നില്ലെന്ന് ബ്ലാസ്റ്റേഴ്സ് അധികൃതര് പറയുന്നു.
അമ്പതിനായിരത്തോളം സീറ്റുള്ള കൊച്ചി സ്റ്റേഡിയത്തിലെ നാലിലൊന്ന് ടിക്കറ്റുകളും കോംപ്ലിമെന്ററിയാണ്. ജിസിഡിഎ, കോര്പ്പറേഷന്, പോലീസ്, സ്പോര്ട്സ് കൗണ്സില്, കേരള ഫുട്ബോള് അസോസിയേഷന്, വിവിധ സര്ക്കാര് വകുപ്പുകള് എന്നിവര്ക്കെല്ലാം ടിക്കറ്റുകള് സൗജന്യമായി നല്കേണ്ടി വരുന്നു. ഇതിനു പുറമെയാണ് ആവശ്യത്തിലധികമായി പിടിച്ചു വാങ്ങുന്നതെന്നും ബ്ലാസ്റ്റേഴ്സ് വൃത്തങ്ങള് വ്യക്തമാക്കുന്നു. മത്സരത്തിന് അനുമതിക്കായി ഒന്നരമാസം മുമ്പ് നല്കിയ അപേക്ഷയില് കോര്പ്പറേഷന് നടപടിയെടുത്തത് മത്സരത്തലേന്നായിരുന്നു. 300 കോംപ്ലിമെന്ററി ടിക്കറ്റുമായി മത്സരത്തലേന്ന് കോര്പ്പറേഷനിലെത്തിയ ബ്ലാസ്റ്റേഴ്സ് പ്രതിനിധിയോട് ആവശ്യപ്പട്ടത് 700 പാസുകളും ഒപ്പം വലിയൊരു തുക സംഭാവനയുമാണ്.
സ്റ്റേഡിയം ഉടമകളായ ജിസിഡിഎയ്ക്ക് ഐഎസ്എല് ഓരോ വര്ഷവും ഏഴുകോടി രൂപയാണ് നല്കുന്നത്. എന്നിട്ടും സ്റ്റേഡിയത്തിന്റെ പരിപാലനവും അറ്റകുറ്റപ്പണികളും വേണ്ടവിധത്തില് നടക്കുന്നില്ലെന്ന് ബ്ലാസ്റ്റേഴ്സ് അധികൃതര് കുറ്റപ്പെടുത്തി. ഓരോ മത്സരത്തിനും സുരക്ഷയൊരുക്കുന്നതിന് പത്തുലക്ഷം രൂപയാണ് ബ്ലാസ്റ്റേഴ്സ് മാനേജ്മെന്റ് പോലീസിന് നല്കേണ്ടത്. പുറമേ 600 (ഏകദേശം ഏഴുലക്ഷം രൂപ) ടിക്കറ്റുകള് സൗജന്യമായും നല്കുന്നു. ഇത് 1200 ആക്കണമെന്നാണ് ഇപ്പോള് പോലീസിന്റെ ആവശ്യം. ഇതെല്ലാം പിന്മാറ്റത്തിന് പ്രേരിപ്പിക്കുന്ന കാരണമായി ബ്ലാസ്റ്റേഴ്സ് പറയുന്നു.
