റാഞ്ചി: ഇന്ത്യയിലേക്ക് പരമ്പരയ്ക്ക് വരുന്ന എതിരാളികള് ടീമില് സ്പിന്നര്മാരെ ഉള്പ്പെടുത്തുക പതിവാണ്. ഇന്ത്യന് പിച്ചുകളില് ഈ സ്പിന്നര്മാര് വിജയം സമ്മാനിക്കുമെന്നാണ് അവരുടെ വിശ്വാസം. എന്നാല് ഇത് ശരിയല്ല. ഇന്ത്യന് പിച്ചുകളില് ഇന്ത്യന് സ്പിന്നര്മാര് കാഴ്ചവയ്ക്കുന്ന മിന്നുന്ന പ്രകടനത്തിനടുത്തെത്താനൊന്നും വിദേശ സ്പിന്നര്മാര്ക്ക് കഴിയുന്നില്ലെന്നാണ് കണക്കുകള് സൂചിപ്പിക്കുന്നത്.
2016 നുശേഷം ഇന്ത്യന് പിച്ചുകളില് സന്ദര്ശക ടീമിലെ സ്പിന്നര്മാരുടെ ശരാശരി 51.18. എന്നാല് സ്വന്തം തട്ടകത്തിലെ ടെസ്റ്റ് മത്സരങ്ങളില് ഇന്ത്യന് സ്പിന്നര്മാരുടെ ശരാശരി ഇതിലും മികച്ചതാണ്. 25.32 ശതമാനം.
സ്പിന്നര്മാരുടെ മികവില് സ്വന്തം മണ്ണില് മറ്റൊരു പരമ്പര തൂത്തുവാരാനുള്ള തയ്യാറെടുപ്പിലാണ് ഇന്ത്യ. ആദ്യ രണ്ട് ടെസ്റ്റിലും ദക്ഷിണാഫ്രിക്കയെ തൂത്തെറിഞ്ഞ ഇന്ത്യ മൂന്ന് മത്സരങ്ങളുടെ പരമ്പര പോക്കറ്റിലാക്കിക്കഴിഞ്ഞു. അവസാന അങ്കം നാളെ റാഞ്ചിയില് കൊടിയേറും. മൂന്നാം ടെസ്റ്റിലും അനായാസം ദക്ഷിണാഫ്രിക്കയെ മറികടന്ന് സമ്പൂര്ണ വിജയമാണ് ഇന്ത്യന് ടീം ലക്ഷ്യമിടുന്നത്.
സ്പിന്നര്മാരായ ആര്. അശ്വിനും രവീന്ദ്ര ജഡേജയും ഇന്ത്യക്ക് മറ്റൊരു മനോഹര വിജയം നേടിക്കൊടുക്കാന് തയ്യാറെടുത്തുകഴിഞ്ഞു. തിരയുന്ന പിച്ചുകളില് ഇവരെ നേരിടാന് ദക്ഷിണാഫ്രിക്കന് ബാറ്റ്സ്മാന്മാര്ക്ക് നന്നേ വിഷമിക്കേണ്ടിവരും.
അവസാന ടെസ്റ്റില് സ്പിന്നും റിവേഴ്സ് സ്വിങ്ങും പ്രധാനപങ്കുവഹിക്കുമെന്ന് ദക്ഷിണാഫ്രിക്കന് ക്യാപ്റ്റന് ഫാ ഡു പ്ലെസിസ് വ്യക്തമാക്കിക്കഴിഞ്ഞു. റാഞ്ചിയിലെ പിച്ച് സ്പിന്നിന് അനുകൂലമാണ്. അതിനാല് റിവേഴ്സ് സ്വിങും സ്പിന്നും ഈ ടെസ്റ്റില് നിര്ണായകമാകുമെന്ന് ഡു പ്ലെസിസ് പറഞ്ഞു. ഇന്ത്യന് സ്പിന്നര്മാര് മികച്ച പ്രകടനമാണ് നടത്തിവരുന്നത്. എന്നാല് ഞങ്ങളുടെ പേസര്മാര്ക്ക് റിവേഴ്സ് സ്വിങ് ചെയ്യാനാകുന്നില്ലെന്ന് ദക്ഷിണാഫ്രിക്കയുടെ പേസര് കഗിസോ റബഡ വെളിപ്പെടുത്തി.
ആദ്യ രണ്ട് ടെസ്റ്റിലും ഇന്ത്യന് ബാറ്റ്സ്മാന്മാര് ദക്ഷിണാഫ്രിക്കന് ബൗളര്മാരെ അടിച്ചൊതുക്കി വമ്പന് സ്കോര് കുറിച്ചു. ആദ്യ ടെസ്റ്റിന്റെ ആദ്യ ഇന്നിങ്ങ്സില് 502 റണ്സും രണ്ടാം ടെസ്റ്റിന്റെ ആദ്യ ഇന്നിങ്ങ്സില് 601 റണ്സും ഇന്ത്യ നേടി.
ആദ്യ ഇന്നിങ്ങ്സില് വമ്പന് സ്കോര് പടുത്തുയര്ത്തിയാലേ ഇന്ത്യക്കെതിരെ പിടിച്ചുനില്ക്കാനാകൂയെന്ന് ഡുപ്ലെസിസ് പറഞ്ഞു. ആദ്യ ഇന്നിങ്ങ്സിലെ സ്കോര് നിര്ണായകമാണ്. പൊരുതി നില്ക്കാന് ഇത് സഹായകമാകുമെന്ന് ഡു പ്ലെസിസ് കൂട്ടിച്ചേര്ത്തു.
