പൂനെയിലും മായങ്ക്

പൂനെ: ഓപ്പണര്‍ മായങ്ക് അഗര്‍വാളിന്റെ സെഞ്ചുറിയില്‍ ഇന്ത്യക്ക് ദക്ഷിണാഫ്രിക്കക്കെതിരായ രണ്ടാം ക്രിക്കറ്റ് ടെസ്റ്റില്‍ മിന്നുന്ന തുടക്കം. ആദ്യ ദിനം കളിനിര്‍ത്തുമ്പോള്‍ ഇന്ത്യ മൂന്ന് വിക്കറ്റ് നഷ്ടത്തില്‍ 273 റണ്‍സ് എടുത്തു. അര്‍ധ സെഞ്ചുറി കടന്ന നായകന്‍ വിരാട് കോഹ്‌ലിയും (63), രഹാനെ (18) യുമാണ് ക്രീസില്‍. 

വിശാഖപട്ടത്തെ ആദ്യ ടെസ്റ്റില്‍ ഇരട്ട സെഞ്ചുറി കുറിച്ച മായങ്ക് അഗര്‍വാള്‍ 195 പന്തില്‍ 108 റണ്‍സ് കുറിച്ചു. പതിനാറ് ഫോറും രണ്ട് സിക്‌സറും അടിച്ചു. ഈ ഓപ്പണറുടെ തുടര്‍ച്ചയായ രണ്ടാം സെഞ്ചുറിയാണിത്.

ടോസ് നേടി ബാറ്റ് ചെയ്ത ഇന്ത്യക്ക് ആദ്യ ടെസ്റ്റിലെ രണ്ട് ഇന്നിങ്ങ്‌സിലും സെഞ്ചുറി കുറിച്ച രോഹിത് ശര്‍മയെ തുടക്കത്തിലേ നഷ്ടമായി. പതിനാല് റണ്‍സ് നേടിയ ശര്‍മയെ പേസര്‍ റബഡ നായകന്‍ ഡു പ്ലെസിസിന്റെ കൈകളിലെത്തിച്ചു.

ആദ്യ വിക്കറ്റ്  വീഴുമ്പോള്‍ സ്‌കോര്‍ബോര്‍ഡില്‍ 25 റണ്‍സ് മാത്രം.

തുടര്‍ന്നെത്തിയ പൂജാര ഓപ്പണര്‍ മായങ്കിനൊപ്പം ചെറുത്ത് നിന്നു. രണ്ടാം വിക്കറ്റില്‍ ഇവര്‍ നിര്‍ണായകമായ 127 റണ്‍സ് കൂട്ടുകെട്ടുണ്ടാക്കിയതോടെ ഇന്ത്യ കരകയറി. അര്‍ധ സെഞ്ചുറി കുറിച്ച പൂജാര 58 റണ്‍സുമായി കളം വിട്ടു. റബഡയുടെ പന്തില്‍ ഡു പ്ലെസിസ് പൂജാരയെ പിടികൂടുകയായിരുന്നു.

112 പന്ത് നേരിട്ട പൂജാര ഒമ്പത് ഫോറും ഒരു സിക്‌സറും അടിച്ചു.

നാലാമനായി ക്രീസിലെത്തിയ നായകന്‍ കോഹ് ലി മായങ്കിനൊപ്പം പൊരുതിക്കളിച്ചു. പക്ഷെ സെഞ്ചുറി കുറിച്ചതിന് പിന്നാലെ മായങ്ക് വീണു. റബഡയ്‌ക്കാണ് ഈ വിക്കറ്റും. ഡു പ്ലെസിസ് ക്യാച്ചെടുത്തു.

വിരാട് കോഹ്‌ലി 63 റണ്‍സുമായി കീഴടങ്ങാതെ നില്‍ക്കുകയാണ്. ഇതുവരെ 105 പന്ത് നേരിട്ട ഇന്ത്യന്‍ ക്യാപ്റ്റന്‍ പത്ത് ബൗണ്ടറിയടിച്ചു.

ആദ്യ ദിനത്തില്‍ വീണ ഇന്ത്യയുടെ മൂന്ന് വിക്കറ്റും പേസര്‍ റബഡയ്‌ക്കാണ് ലഭിച്ചത്. 18.1 ഓവറില്‍ 48 റണ്‍സ് വിട്ടുകൊടുത്താണ് മൂന്ന് വിക്കറ്റ് വീഴ്‌ത്തിയത്.

ഇന്ത്യന്‍ ക്യാപ്റ്റന്നെ നിലയില്‍ വിരാട് കോഹ്‌ലിയുടെ അമ്പതാം മത്സരമാണിത്. ടോസ് നേടിയ കോഹ് ലി ബാറ്റിങ് തെരഞ്ഞെടുത്തു. ആദ്യ ടെസ്റ്റില്‍ വിജയിച്ച ടീമിലെ പേസര്‍ ഉമേഷ് യാദവിന് പകരം മധ്യനിര ബാറ്റ്‌സമാന്‍ ഹനുമാ വിഹാരിയെ അവസാന ടീമിലുള്‍പ്പെടുത്തി. ദക്ഷിണാഫ്രിക്കയും ഒരു മാറ്റം വരുത്തി. സ്പിന്നര്‍ ഡെയ്ന്‍ പിഡിറ്റിന് പകരം പേസര്‍ ആന്റിച്ച് നോര്‍ട്ജയ്‌ക്ക് അവസരം നല്‍കി. 

വിശാഖപട്ടണത്തെ ആദ്യ ടെസ്റ്റില്‍ വിജയിച്ച ഇന്ത്യ മൂന്ന് മത്സരങ്ങളുടെ പരമ്പരയില്‍ 1-0 ന് മുന്നിട്ടുനില്‍ക്കുകയാണ്.

സ്‌കോര്‍ബോര്‍ഡ്

ഇന്ത്യ: ഒന്നാം ഇന്നിങ്‌സ്: മായങ്ക് അഗര്‍വാള്‍ സി ഡു പ്ലെസിസ് ബി റബഡ 108, രോഹിത് ശര്‍മ സി ഡു പ്ലെസിസ് ബി റബഡ 14, ചേതേശ്വര്‍ പൂജാര സി ഡു പ്ലെസിസ് ബി റബഡ 58, വിരാട് കോഹ് ലി നോട്ടൗട്ട് 63, രഹാനെ നോട്ടൗട്ട് 18, എക്‌സ്ട്രാസ് 12, ആകെ മൂന്ന വിക്കറ്റിന് 273.

വിക്കറ്റ് വീഴ്ച: 1-25, 2-163, 3-198.

ബൗളിങ്: ഫിലാന്‍ഡര്‍ 17-5-37-0, റബഡ 18.1-2-48-3, നോര്‍ട്‌ജെ 13-3-60-0, മഹരാജ് 29-8-89-0, മുത്തുസ്വാമി 6-1-22-0, എല്‍ഗാര്‍ 2-0-11-0.