അങ്ങനെ ദേവികുളം സബ്കളക്ടര് രേണുരാജിനെയും സ്ഥലം മാറ്റി. സ്റ്റോപ്പ് മെമ്മോ അവഗണിച്ച് മൂന്നാര് പഞ്ചായത്ത് കോംപ്ലക്സ് നിര്മ്മാണം തുടരുന്നതിനെതിരെ രംഗത്തെത്തിയതിനാണ് നടപടി. നിര്മ്മാണം തടയാന് റവന്യുസംഘം എത്തിയപ്പോള് സബ്കളക്ടര്ക്ക് ബുദ്ധിയില്ലെന്ന് രാജേന്ദ്രന് എംഎല്എ.അപ്പോള്തന്നെ രേണുരാജിനെ ഒതുക്കുമെന്ന വിധി കല്പിക്കപ്പെട്ടുകഴിഞ്ഞു. എന്നാല് ഉടന് വിധി നടപ്പിലാക്കിയാല് ഉണ്ടാകാവുന്ന സാമൂഹിക പ്രതികരണം മനസ്സിലാക്കി കുറച്ചുനീട്ടി വിധി നടപ്പിലാക്കിയെന്നുമാത്രം. അനധികൃത കൈയേറ്റക്കാര്ക്കെതിരെ നടപടിയെടുക്കാന് തുനിഞ്ഞ ദേവികുളം സബ്കളക്ടര്മാരായിരുന്ന വെങ്കിട്ടറാമിനെയും വി.ആര്. പ്രേമകുമാറിനെയും ഭൂമാഫിയകള്ക്കുവേണ്ടി സ്ഥലം മാറ്റി. കയ്യേറ്റഭൂമി തിരിച്ചുപിടിക്കാനായി ശക്തമായി വാദിച്ച സുശീലഭട്ടിനെ തല്സ്ഥാനത്തുനിന്നും നീക്കംചെയ്തു.
ഗാഡ്ഗിലിനെ ജനങ്ങളുടെ മുന്നില് ശത്രുവാക്കിമാറ്റി. ശത്രുവിനെതിരെ ജോയ്സ് ജോര്ജ്ജ് എംപിയുടെ നേതൃത്വത്തില് തെരുവിലിറങ്ങി. ഫോറസ്റ്റ് ആഫീസും സര്ക്കാര് വാഹനങ്ങളും കത്തിച്ചു. താമരശ്ശേരി ബിഷപ്പ് കേരളം കശ്മീരാക്കുമെന്ന് വിളിച്ചുപറഞ്ഞു. ഗാഡ്ഗില് റിപ്പോര്ട്ട് ശരിയാണെന്ന് പറഞ്ഞ പി.ടി. തോമസിന്റെ അന്ത്യകര്മ്മങ്ങള് പ്രതീകാത്മകമായി നടത്തി.
മൂന്നാറില് ടാറ്റയും, ഹാരിസണും കൈവശംവച്ചിരിക്കുന്ന 5.25 ലക്ഷം ഏക്കര് ഭൂമി കൂടാതെ അവിടെ ആറായിരത്തോളം ഏക്കര് ഭൂമി കൈയേറിയതായി കണക്ക്. ഇവര്ക്കെല്ലാമെതിരെയുള്ള കേസുകള് തോറ്റുകൊടുക്കാനുള്ള തന്ത്രങ്ങള് സ്വീകരിക്കുകയാണ് സര്ക്കാരുകള്. വിദേശികള്ക്ക് നാട്ടുരാജാക്കന്മാര് പാട്ടത്തിന് നല്കിയ ഭൂമി പാട്ടകാലാവധി കഴിഞ്ഞിട്ടും എന്തുകൊണ്ട് തിരിച്ചെടുക്കാനാവുന്നില്ല ?. ഇന്ത്യ സ്വാതന്ത്ര്യം പ്രാപിച്ചതോടെ ഇന്ത്യന് ഇന്ഡിപെന്ഡന്റ്സ് ആക്ട് ഢകക 1 (യ) ഉപവകുപ്പ് പ്രകാരം വിദേശരാജ്യങ്ങളും ബ്രിട്ടീഷ് കമ്പനികളും മറ്റ് വിദേശകമ്പനികളും വ്യക്തികളുമായി ഒപ്പുവച്ചിട്ടുള്ള എല്ലാ ഉടമ്പടികളും അവകാശങ്ങളും റദ്ദാക്കപ്പെട്ടിട്ടുണ്ട്. എന്നിട്ടും അഞ്ച് ബ്രിട്ടീഷ് കമ്പനികള് സംയുക്തമായി 1921-ല് ഒറ്റക്കമ്പനിയായി ലണ്ടനില് രജിസ്റ്റര് ചെയ്ത കമ്പനിയുടെ പേരിലുള്ള ഭൂമി ഗോയങ്ക, ടാറ്റ മുതലയാവരെ ഏല്പ്പിച്ച് അഞ്ചേകാല്ലക്ഷം ഏക്കര്ഭൂമി കൈവശം വച്ചിരിക്കുന്നു. ഇവരെ നമ്മുടെ നാട്ടില്നിന്നും ഒഴിപ്പിക്കണമെന്ന് ഒരു രാഷ്ട്രീയപാര്ട്ടിയും പറയുന്നില്ല.
ഈ വൈകിയ വേളയിലെങ്കിലും കേരളത്തിലെ മുഴുവന് കൈയേറ്റഭൂമികളും കാലാവധി കഴിഞ്ഞ പാട്ടഭൂമികളും കണ്ടെത്തി പൊതുമുതലാക്കണം പിന്നീട് കര്ഷകജനതയുടെ നിയന്ത്രണത്തിലേക്ക് ഭൂമിയും കാര്ഷികഉല്പാദന പ്രക്രിയയും വരത്തക്കവിധം ഭൂരഹിതരായ കര്ഷകര്ക്ക് നീതിപൂര്വ്വകമായ വിതരണം നടത്തുകയാണ് വേണ്ടത്. അതിന് കടുത്ത രാഷ്ട്രീയ ഇച്ഛാശക്തിവേണം. അതാണ് ഇവിടത്തെ രാഷ്ട്രീയകക്ഷികള്ക്ക് ഇല്ലാത്തതും.
ജന്മഭൂമി ഓണ്ലൈന്