കോഴിക്കോട്: 19 വയസ്സുകാരിയെ ജ്യൂസില്‍ മയക്കുമരുന്ന് കലര്‍ത്തി പീഡിപ്പിച്ചശേഷം ഇസ്ലാമിലേക്ക് മതം മാറണമെന്ന് ഭീഷണി മുഴക്കിയ ക്രിമിനലിനെ സമൂഹത്തില്‍ തുറന്നുകാട്ടിയ സംവിധായകന്‍ അലി അക്ബറിനെതിരെ സോളിഡാരിറ്റി. ക്രിസ്ത്യന്‍ വിഭാഗത്തിലെ പെണ്‍കുട്ടികളെ ലൗ ജിഹാദിലൂടെ മതംമാറ്റുന്ന സംഭവം ആദ്യം പുറത്തുകൊണ്ടുവന്നത് അലി അക്ബറായിരുന്നു. ഇതില്‍ പ്രകോപിതരായാണ് സോളിഡാരിറ്റി പോലീസില്‍ പരാതി നല്‍കിയത്. സോളിഡാരിറ്റി യൂത്ത് മൂവ്‌മെന്റ് ജനറല്‍ സെക്രട്ടറി ഉമ്മര്‍ ആലത്തൂരാണ് കോഴിക്കോട് നടക്കാവ് പോലീസില്‍ പരാതി നല്‍കിയത്.
കോഴിക്കോട് ലൗ ജിഹാദിലൂടെ പെണ്‍കുട്ടിയെ പ്രണയം നടിച്ച് പീഡിപ്പിച്ചുവെന്ന പെണ്‍കുട്ടിയുടെ പിതാവിന്റെ പരാതിയുടെ അടിസ്ഥാനത്തില്‍ പോലീസ് പ്രാഥമിക അന്വേഷണം മാത്രമാണ് ആരംഭിച്ചിട്ടുള്ളത്. ഈ സംഭവത്തിന്റെ പേരില്‍ മതസ്പര്‍ദ വളര്‍ത്തുന്ന തരത്തിലും കലാപം സൃഷ്ടിക്കുന്ന വിധത്തിലും ആസൂത്രിതമായ വ്യാജപ്രചരണങ്ങളാണ് നടക്കുന്നതെന്നാണ് സോളിഡാരിറ്റിയുടെ ന്യായീകരണം. സമൂഹത്തിലെ ഉന്നത സ്ഥാനത്തിരിക്കുന്ന ഒരു വ്യക്തി ഇത്തരം വിളിച്ചു പറയലുകള്‍ക്ക് നേതൃത്വം നല്‍കുന്നത് വലിയ ക്രമസമാധാന പ്രശ്‌നമാണ് സൃഷ്ടിക്കുന്നതെന്നും സോളിഡാരിറ്റിയുടെ പരാതിയില്‍ പറയുന്നു.ലൗ ജിഹാദിലൂടെ മകളെ മതംമാറ്റാന്‍ ശ്രമം നടന്നെന്ന പിതാവിന്റെ പരാതിയെ തുടര്‍ന്ന് നടുവണ്ണൂര്‍ സ്വദേശി മുഹമ്മദ് ജാസിമിനെ കഴിഞ്ഞ ദിവസം അറസ്റ്റ് ചെയ്തിരുന്നു.
കോഴിക്കോട് സ്വദേശിയായ വിദ്യാര്‍ഥിനിയെ ജ്യൂസില്‍ മയക്കുമരുന്ന് കലര്‍ത്തിയാണ് ഇയാള്‍ പീഡിപ്പിച്ചത്. തുടര്‍ന്ന് ഇസ്ലാമിലേക്ക് മതം മാറണമെന്നും അല്ലെങ്കില്‍ നവമാധ്യമങ്ങള്‍ വഴി ചിത്രങ്ങള്‍ പ്രചരിപ്പിക്കുമെന്നും യുവാവ് പെണ്‍കുട്ടിയെ ഭീഷണിപ്പെടുത്തിയെന്നാണ് പരാതി.
സഹപാഠിയായ യുവാവ് സൗഹൃദം നടിച്ച് തന്നെ പീഡിപ്പിക്കുകയായിരുന്നുവെന്ന് പെണ്‍കുട്ടി നടക്കാവ് പോലീസ് സ്‌റ്റേഷനില്‍ ആഗസ്റ്റ് നാലിനാണ്് പരാതി നല്‍കിയത്. പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്ത് കോഴിക്കോട് ജുഡീഷ്യല്‍ ഫസ്റ്റ്ക്ലാസ് മജിസ്‌ട്രേറ്റ് (ഏഴ്) കോടതിയില്‍ രഹസ്യമൊഴി രേഖപ്പെടുത്തുകയും ചെയ്തു. കോഴിക്കോട്ട് സരോവരം പാര്‍ക്കില്‍ സംഭവം നടന്നതിനാല്‍ കേസ് മെഡിക്കല്‍ കോളേജ് സ്‌റ്റേഷനിലേക്ക് റഫര്‍ ചെയ്‌തെങ്കിലും തുടര്‍ നടപടികള്‍ ഉണ്ടായില്ല. കേസന്വേഷണ വിവരം ഇപ്പോള്‍ പുറത്തുവിടാന്‍ കഴിയില്ലെന്നാണ് അന്വേഷണ ഉദ്യോഗസ്ഥനായ സിഐ മൂസ വള്ളിക്കാടന്‍ പറയുന്നത്.കോഴിക്കോട്ട് നഗരത്തിലെ ക്രൈസ്തവ ആരാധനാലയത്തോട് ചേര്‍ന്ന വനിതാ ഹോസ്റ്റലില്‍ താമസിക്കുന്ന യുവതിയെ തട്ടിക്കൊണ്ടുപോകാനും പ്രതികള്‍ ശ്രമിച്ചു. ഇതിന്റെ ദൃശ്യങ്ങള്‍ സ്ഥാപനത്തിന്റെ സിസിടിവിയില്‍ നിന്ന് പോലീസിന് ലഭിച്ചിരുന്നു. അമ്പതോളം പെണ്‍കുട്ടികളെ കഴിഞ്ഞ മൂന്ന് മാസത്തിനിടയ്‌ക്ക് മതപരിവര്‍ത്തനം ചെയ്യാന്‍ ശ്രമിച്ചുവെന്നാണ് ലഭിക്കുന്ന വിവരം. ക്രിസ്ത്യന്‍ വിഭാഗത്തിലെ പെണ്‍കുട്ടികളെ വ്യാപകമായി മതപരിവര്‍ത്തനത്തിന് വിധേയമാക്കുന്നുണ്ട്.
