മാഡ്രിഡ്: റയല് മാഡ്രിഡ് മുഖ്യ പരിശീലകന് സിനദിന് സിദാന്റെ സമ്മര്ദം അല്പ്പം കുറച്ചു. ചാമ്പ്യന്സ് ലീഗില് പിഎസ്ജിയോട് തകര്ന്നടിഞ്ഞ റയല് ലാ ലിഗയില് ഏകപക്ഷീയമായ ഒരു ഗോളിന് സെവിയയെ പരാജയപ്പെടുത്തി. വായുവില് ഉയര്ന്നുപൊങ്ങിയ കരീം ബെന്സേമയുടെ തലയില് നിന്നാണ് നിര്ണായകമായ ഗോള് പിറന്നത്.
ലാ ലിഗയിലെ ആദ്യ നാലു മത്സരങ്ങളില് തോല്വിയറിയാതെ കുതിച്ച സെവിയയുടെ ആദ്യ തോല്വിയാണിത്. റയലിന്റെ മൂന്നാം വിജയവും. ഇതോടെ അഞ്ചു മത്സരങ്ങളില് പതിനൊന്ന് പോയിന്റുമായി ഒന്നാം സ്ഥാനത്തുള്ള അത്ലറ്റിക്കോ ബില്വാവോയ്ക്ക് ഒപ്പമെത്തി.
ചാമ്പ്യന്സ് ലീഗില് പിഎസ്ജിയോട് ഏകപക്ഷീയമായ മൂന്ന് ഗോളുകള്ക്ക് റയല് തോറ്റതോടെ സിദാന്റെ പരിശീലക സ്ഥാനത്തിന് ഇളക്കം തട്ടുമെന്ന് തോന്നി. കടുത്ത സമ്മര്ദത്തിലായ സിദാന് സെവിയക്കെതതിരായ വിജയം ആശ്വാസമായി. റയലിന്റെ പ്രധാന എതിരാളികളായ ബാഴ്സയുടെ പരിശീലകന് ഏണസ്റ്റ് വാല്വെര്ഡിയും സമ്മര്ദത്തിലാണ്. കഴിഞ്ഞ ദിവസം ബാഴ്സ് മടക്കമില്ലാത്ത രണ്ട് ഗോളുകള്ക്ക് ഗ്രാനഡയോട് തോറ്റു.
ഗോള് ഒഴിഞ്ഞുനിന്ന ആദ്യ പകുതിക്കുശേഷം 64-ാം മിനിറ്റിലാണ് റയല് മാഡ്രിഡ് വിജയഗോള് നേടിയത്്. ഗാരേത്ത് ബെയ്ലും കര്വാജലും നടത്തിയ മുന്നേറ്റമാണ് ഗോളിന് വഴിയൊരുക്കിയത്. ഗാരേത്ത് കാര്വാജലിന് പാസ് നല്കി. കാര്വാജല് പന്ത് ഗോള് മുഖത്തേക്ക് ഉയര്ത്തിവിട്ടു. ഉയര്ന്നു ചാടിയ ബെന്സേമ തലകൊണ്ട് പന്ത് സെവിയയുടെ വലയിലേക്ക് തിരിച്ചുവിട്ടു.
87-ാം മിനിറ്റില് സെവിയയ്ക്ക് ഗോള് മടക്കാന് അവസരം ലഭിച്ചു. പക്ഷെ സെവിയ താരം ഡി ജോങ്ങിന്റെ ഹെഡര് പുറത്തേക്ക് പറന്നുപോയി.
