സ്വാമി അഭയാനന്ദ ചിന്മയാമിഷന്‍, തിരുവനന്തപുരം
ഉഭയ ലിംഗാധികരണം
ഇതില്‍ 11 സൂത്രങ്ങളുണ്ട്.
ബ്രഹ്മത്തിന്റെ സഗുണ നിര്‍ഗുണ ലക്ഷണങ്ങളെ ചര്‍ച്ച ചെയ്യുകയാണ് ഈ അധികരണത്തില്‍.
സൂത്രം സ്ഥാനതോളപി പരസ്യോഭയലിംഗം സര്‍വ്വത്ര ഹി
സ്ഥാനവിശേഷം കൊണ്ടും പരമാത്മാവിന് സഗുണ, നിര്‍ഗുണമെന്ന രണ്ട് ലക്ഷണങ്ങള്‍ ഇല്ല. എന്തെന്നാല്‍ ശ്രുതിയില്‍ എല്ലായിടത്തും അങ്ങനെയാണ് പറഞ്ഞിട്ടുള്ളത്.
സ്ഥാന വിശേഷം കൊണ്ട് പരമാത്മാവിന് ഒരു ദോഷവുമില്ല.ശ്രുതിയില്‍ എല്ലാവിധ ദോഷങ്ങളകന്നവനെന്നും എല്ലാ ദിവ്യഗുണങ്ങളും ചേര്‍ന്നവനെന്നും രണ്ട് ഭാവങ്ങളെ പറഞ്ഞിട്ടുണ്ട്.
തത് പദലക്ഷ്യാര്‍ത്ഥമായ ബ്രഹ്മം സഗുണമെന്നും നിര്‍ഗുണമെന്നും ഉള്ള ലക്ഷണത്തോടു കൂടിയതാണോ എന്ന് വിവിധ രീതിയില്‍ നോക്കിക്കാണുകയാണ് ഇവിടെ.
ഛാന്ദോഗ്യത്തില്‍ ‘സര്‍വ്വകര്‍മ്മാ സര്‍വ്വ കാമഃ സര്‍വ്വഗന്ധഃ സര്‍വ്വ രസഃ ‘എല്ലാ കര്‍മ്മങ്ങള്‍ ചെയ്യുന്നവനും എല്ലാ കാമങ്ങളുള്ളവനും എല്ലാ ഗന്ധങ്ങളേയും രസങ്ങളേയും അനുഭവിക്കുന്നവനുമായ ബ്രഹ്മം സഗുണമാണെന്നും പറയുന്നു.
എന്നാല്‍ ബൃഹദാരണ്യ കത്തില്‍ ‘അസ്ഥൂലമനണ്വഹ്രസ്വമദീര്‍ഘം’ സ്ഥൂലമോ അണുവോ ഹ്രസ്വമോ ദീര്‍ഘമോ അല്ലെന്ന് ഗുണാതീതമായ നിര്‍ഗുണ സ്വരൂപത്തേയും കാണിക്കുന്നു. ഈ ശ്രുതി വാക്യങ്ങളുടെ അടിസ്ഥാനത്തില്‍ ബ്രഹ്മം രണ്ടുവിധ ലക്ഷണങ്ങളോടും കൂടിയതാണെന്ന് പൂര്‍വപക്ഷം വാദിക്കുന്നു.
എന്നാല്‍ അത് ശരിയല്ല. വാസ്തവത്തില്‍ നിര്‍ഗുണമായ ബ്രഹ്മം ഉപാധികളുമായുള്ള സംബന്ധം കാരണം സഗുണമാണെന്ന് തോന്നുന്നതാണ്. ഒരു വസ്തുവിന് ഒരേ സമയം രണ്ട് രൂപമുണ്ടാവുക എന്നത് സാധ്യമല്ല. ഉപാധിയോട് ചേരുമ്പോള്‍ ഒരു വസ്തുവിന്റെ യഥാര്‍ത്ഥ രൂപത്തിന് മാറ്റമുണ്ടാകുകയില്ല. മാറ്റം വരുന്നു എന്ന് തോന്നുന്നത് ഭ്രമം മാത്രമാണ്. ഉപാധികളെല്ലാം അവിദ്യാ നിര്‍മ്മിതങ്ങളായതിനാല്‍ അവയ്‌ക്കൊന്നിനും സ്വസ്വരൂപത്തിന് മാറ്റമുണ്ടാക്കാന്‍ കഴിയില്ല.
കഠോപനിഷത്തില്‍ ‘അശബ്ദമ സ്പര്‍ശമരൂപമവ്യയം’ ശബ്ദമോ സ്പര്‍ശമോ രൂപമോ നാശമോ ഇല്ലാത്തത് എന്ന് കാണാം. ശ്രുതികളിലെ ഇത്തരം വാക്യങ്ങളെയാണ് ബ്രഹ്മ പ്രതിപാദകങ്ങളായി കാണേണ്ടത്. അതിനാല്‍ ബ്രഹ്മം നിര്‍ഗുണം തന്നെയാണ്.
ഹൃദയത്തില്‍ അധിവസിക്കുന്നവനാണ് പരമാത്മാവ് എന്ന് പറയുമ്പോള്‍ ഹൃദയത്തിന്റെ ദോഷങ്ങള്‍ പരമാത്മാവിനെ ബാധിക്കില്ലേ എന്ന സംശയത്തിനും പരിഹാരമാണ് ഈ സൂത്രം. ആത്മാവ് എല്ലാവിധ ദോഷങ്ങളില്‍ നിന്നും അകന്നവനാണെന്നും സകല ദിവ്യ ഗുണങ്ങളുള്ളവനെന്നും ശ്രുതിയില്‍ പലയിടത്തും പറയുന്നുണ്ട്.
സൂത്രം നഭേദാദിതി ചേന്ന പ്രത്യേകമതദ്വചനാത്
ഭേദം പറഞ്ഞിട്ടുള്ളതിനാല്‍ ഒരു ലക്ഷണമേയുള്ളൂ എന്ന് പറയാനാകില്ല എന്നാണെങ്കില്‍ അത് ശരിയല്ല. പ്രത്യേകമായി അങ്ങനെയല്ല എന്ന് പറഞ്ഞിട്ടുള്ളതിനാല്‍.
ശ്രുതി വാക്യങ്ങളില്‍ ബ്രഹ്മത്തെ സഗുണ സാകാരമായും നിര്‍ഗുണ നിരാകാരമായും വര്‍ണിക്കുന്നതിനാല്‍ രണ്ട് തരം ബ്രഹ്മമുണ്ടെന്ന് കരുതണമെന്ന് പൂര്‍വപക്ഷം പറഞ്ഞാല്‍ അത് ശരിയല്ല. സഗുണ സാകാരമായി കാണുന്നത് ഉപാധി സംബന്ധം കൊണ്ടാണെന്ന് പ്രത്യേകം പറയുന്നു. ഉപാധി മൂലം വേറെയായി തോന്നുമെങ്കിലും ആത്മാവിന് മാറ്റമില്ലെന്ന് ശ്രുതി വ്യക്തമാക്കുന്നുണ്ട്.
ബൃഹദാരണ്യകത്തില്‍ ‘യശ്ചായമസ്യാം പൃഥി വ്യാം തേജോമയോ/മൃതമയഃ പുരുഷഃ അയമേവ സ യോ/യമാത്മാ’ ഈ പൃഥിവിയില്‍ തേജോമയനും അമൃതമയനുമായ പുരുഷന്‍ യാതൊന്നോ അദ്ധ്യാത്മമായി ഈ ശരീരത്തിലിരിക്കുന്ന തേജോമയനും അമൃതമയനുമായ പുരുഷനും ആ ഈ ആത്മാവ് തന്നെയാണ്. ഉപാധിയോട് കൂടിയവനും ഉപാധികളില്ലാത്തവനുമായ ആത്മാവ് ഒന്ന് തന്നെയാണ്. ഉപാധി കൊണ്ട് ആത്മാവിന് ദോഷമുണ്ടാകുന്നില്ല.
