ന്യൂദല്ഹി : ഭീകര പ്രവര്ത്തനങ്ങളും അക്രമവും ഉപേക്ഷിക്കാതെ പാക്കിസ്ഥാനുമായി യാതൊരു വിധത്തിലുള്ള ചര്ച്ചകള്ക്കും ഇല്ലെന്ന് നിലപാട് ആവര്ത്തിച്ച് ഇന്ത്യ. യൂറോപ്യന് യൂണിയനില് വിദേശ കാര്യമന്ത്രി എസ്. ജയശങ്കറാണ് ഇക്കാര്യം വീണ്ടും വ്യക്തമാക്കിയത്.
കശ്മീര് വിഷയം ചര്ച്ചയിലൂടെ പരിഹരിക്കണമെന്ന യൂറോപ്യന് യൂണിയന് നിലപാടിനുള്ള പ്രതികരണമായാണ് ഇന്ത്യ നയം ആവര്ത്തിച്ചത്. അതിര്ത്തിയിലെ പ്രകോപനപരമായ നിലപാട് തന്നെയാണ് ഇപ്പോഴും പാക്കിസ്ഥാന് സ്വീകരിക്കുന്നത്.
ഭീകര പ്രവര്ത്തനങ്ങള്ക്കുള്ള പിന്തുണ പിന്വലിക്കാന് ഒരുക്കമല്ലെന്ന വിധമാണ് പാക്പ്രധാനമന്ത്രിയുടേതടക്കമുള്ള പ്രസ്താവനകള് പുറത്തുവരുന്നത്. ചര്ച്ച വേണമെന്ന യൂറോപ്യന് യൂണിയന് നിലപാട് അംഗീകരിക്കുന്നു. പക്ഷേ ഭീകരവാദം അവസാനിപ്പിക്കാതെ ചര്ച്ചയില്ലെന്നും യൂറോപ്യന് യൂണിയന് കമ്മിഷണര് ക്രിസ്റ്റോസ് ലിയാന്റിസുമായി നടത്തിയ കൂടിക്കാഴ്ചയില് വിദേശകാര്യമന്ത്രി എസ്. ജയ്ശങ്കര് വ്യക്തമാക്കി.
അതിനിടെ ലോകരാഷ്ട്രങ്ങള് ഇന്ത്യക്ക് അനുകൂലമായ നിലപാട് ഉപേക്ഷിച്ച് കശ്മീര് വിഷയത്തില് ഇടപെട്ടില്ലെങ്കില് ആണവ ശക്തികളായ രാജ്യങ്ങള് ഏറ്റുമുട്ടുമെന്ന് പാക് പ്രധാനമന്ത്രി ഇമ്രാന് ഖാന് അറിയിച്ചു. ഒരു ഓണ്ലൈന് വാര്ത്താമാധ്യമത്തിന് നല്കിയ അഭിമുഖത്തിലാണ് ഇക്കാര്യം അറിയിച്ചത്. പാക് വ്യോമപാത ഭാഗികമായി അടച്ചതും, വ്യാപാര ബന്ധം അവസാനിപ്പിച്ചതും,സംഝോത എക്സ്പ്രസിന്റെ സര്വ്വീസ് നിര്ത്തിയതുമടക്കമുള്ള വിവരങ്ങള് അന്താരാഷ്ട്ര സമൂഹത്തിന് മുമ്പില് അവതരിപ്പിച്ചതായും ഇമ്രാന്ഖാന് അഭിമുഖത്തില് പറഞ്ഞിട്ടുണ്ട്.
