കിങ്സ്റ്റണ്: ധോണിക്ക് പകരക്കാരനായി ടീമിലെത്തിയ വിക്കറ്റ് കീപ്പര് ഋഷഭ് പന്ത് ഇനിയും ഫോമിലേക്ക് ഉയര്ന്നിട്ടില്ല. എന്നിരുന്നാലും വിന്ഡീസിനെതിരെ ഇന്ന് ആരംഭിക്കുന്ന രണ്ടാം ടെസ്റ്റിനുളള ഇന്ത്യന് ടീമില് നിന്ന് തഴയപ്പെടാന് സാധ്യതയില്ല. രണ്ട് മത്സരങ്ങളുടെ പരമ്പര തൂത്തുവാരാനായി കോഹ്ലിപ്പട ഇറങ്ങുകയാണ്. സബീന പാര്ക്കില് ഇന്ത്യന് സമയം രാത്രി എട്ടിന് കളി തുടങ്ങും.
ആദ്യ ടെസ്റ്റില് 318 റണ്സ് വിജയം നേടിയ ഇന്ത്യ പരമ്പരയില് 1-0 ന് മുന്നിട്ടുനില്ക്കുകയാണ്. ദുര്ബ്ബലരായ വിന്ഡീസിനെതിരെ രണ്ടാം ടെസ്റ്റിലും ഇന്ത്യ വിജയം ആഘോഷിക്കുമെന്ന് ഏതാണ്ടുറപ്പാണ്.
ഋഷഭ് പന്തിന്റെ ഫോം മാത്രമാണ് ഇന്ത്യയെ അലട്ടുന്നത്. വിന്ഡീസ് പര്യടനത്തിലെ ഇതുവരെ നടന്ന മത്സരങ്ങളില് പന്തിന്റെ സ്കോര് 0,4, 65 നോട്ടൗട്ട് , 20, 0, 24,7 എന്നിങ്ങനെയാണ്. പന്തിന് പകരം പരിചയ സമ്പന്നനായ കീപ്പര് വൃദ്ധിമാന് സാഹയെ ഇറക്കണമെന്ന് പ്രമുഖര് ആവശ്യപ്പെട്ടു കഴിഞ്ഞു. എന്നാല് പന്തിനെ ഒഴിവാക്കാന് സാധ്യതയില്ല. കാരണം വന് വിജയം നേടിയ ടീമില് മാറ്റം വരുത്താന് ടീം മാനേജ്മെന്റ് തയ്യാറാകില്ല.
പരമ്പരയില് ലീഡ് നേടിയ ഇന്ത്യ ലേശംപോലും സമ്മര്ദമില്ലാതെയാണ് കളിക്കാനിറങ്ങുന്നത്. പേസര്മാരായ ജസ്പ്രീത് ബുംറയും ഇഷാന്ത് ശര്മയും മുഹമ്മദ് ഷമിയുമൊക്കെ മിന്നുന്ന ഫോമിലാണ്. ആദ്യ ടെസ്റ്റില് ബുംറ ആറു വിക്കറ്റും ശര്മ എട്ടു വിക്കറ്റും വീഴ്ത്തിയിരുന്നു.
ഇന്ത്യയുടെ മധ്യനിരയും ഫോമിലാണ്. ആദ്യ ടെസ്റ്റില് കടുത്ത സമ്മര്ദ്ദത്തിലും സെഞ്ചുറിയും അര്ധ സെഞ്ചുറിയും നേടിയ അജിങ്ക രഹാനെയാണ് മധ്യനിരയിലെ കരുത്ത്. ഹനുമ വിഹാരിയും രണ്ടാം ഇന്നിങ്ങ്സില് തകര്ത്തുകളിച്ച് 93 റണ്സ് നേടി. മായങ്ക് അഗര്വാളും കെ.എല്. രാഹുലും തന്നെ ഇന്നിങ്ങ്സ് ഓപ്പണ് ചെയ്യും . രോഹിത് ശര്മയ്ക്ക് ഇത്തവണയും പുറത്തിരിക്കേണ്ടിവരും.
വിന്ഡീസ് ടീം ദുര്ബ്ബലമാണ്. ഇന്ത്യക്കെതിരെ തിരിച്ചുവരാനുള്ള ശേഷിയൊന്നും അവര്ക്കില്ല. ആദ്യ ടെസ്റ്റില് ഒരാള്ക്ക് പോലും അര്ധ സെഞ്ചുറി കുറിക്കാനായില്ല. യുവ താരങ്ങളായ ഷിംറോണ് ഹെ്റ്റ്മെയറിനും ഷായ് ഹോപ്പിനും അവസരത്തിനൊത്തുയരാനായില്ല.
ന്യൂബോള് ബൗളര്മാരായ ഷാനോണ് ഗബ്രീയേലും കെമര് റോച്ചും തകര്ത്തെറിഞ്ഞു. പക്ഷെ മറ്റ് ബൗളര്മാരില് നിന്ന് വേണ്ടത്ര പിന്തുണ ലഭിച്ചില്ല.
