കേരളം കുതിപ്പ് തുടരുന്നു

ലക്‌നൗ: ദേശീയ അന്തര്‍- സംസ്ഥാന അത്‌ലറ്റിക് ചാമ്പ്യന്‍ഷിപ്പില്‍ കേരളം കുതിപ്പ് തുടരുന്നു. രണ്ടാം ദിനത്തില്‍ കേരളം മൂന്ന് സ്വര്‍ണം കരസ്ഥമാക്കി. ഇതോടെ ഏഴു സ്വര്‍ണമായി. നാനൂറ് മീറ്ററില്‍ അലക്‌സ് എ ആന്റണി, എണ്ണൂറ് മീറ്ററില്‍ മുഹമ്മദ് , വനിതകളുടെ എണ്ണൂറ് മീറ്ററില്‍ ചിത്ര ഉണ്ണികൃഷ്ണന്‍ എന്നിവരാണ് ഇന്നലെ സ്വര്‍ണം നേടിയത്. അതേസമയം ഇരുപത് കിലോ മീറ്റര്‍ നടത്തത്തില്‍ ഇര്‍ഫാന്‍ രണ്ടാം സ്ഥാനത്തേക്ക് പിന്തള്ളപ്പെട്ടു.

അലക്‌സ് എം ആന്റണി 46.17 സെക്കന്‍ഡിലാണ് നാനൂര്‍ മീറ്ററില്‍ ഒന്നാമനായത്. ഹരിയാനയുടെ ഹര്‍ഷ് ബാല്‍ജീത്ത് സിങ് വെള്ളിയും കര്‍ണാടകയുടെ സച്ചിന്‍ റോബി വെങ്കലവും നേടി.

എണ്ണൂറ് മീറ്ററില്‍ കേരളത്തിന്റെ മുഹമ്മദ്  1:48.35 സെക്കന്‍ഡിലാണ് ഒന്നാം സ്ഥാനം ഓടിയെടുത്തത്. തമിഴ്‌നാടിന്റെ  അമീര്‍ വെള്ളിയും ഹരിയാനയുടെ അങ്കിത് വെങ്കലവും സ്വന്തമാക്കി.

വനിതകളുടെ എണ്ണൂറ് മീറ്ററില്‍ കേരളത്തിന്റെ ചിത്ര ഉണ്ണികൃഷ്ണന്‍  2:02.96 സെക്കന്‍ഡിലാണ് സ്വര്‍ണം നേടിയത്. കേരളത്തിന്റെ തന്നെ ജെസി ജോസഫിനാണ് വെള്ളി (2:07.09), യുപിയുടെ പ്രമീള യാദവ് വെങ്കലം നേടി.

ഇരുപത് കിലോ മീറ്റര്‍ നടത്തത്തില്‍ കേരളത്തിന്റെ ഇര്‍ഫാനെ രണ്ടാം സ്ഥാനത്തേക്ക് പിന്തള്ളി ഹരിയാനയുടെ സന്ദീപ് കുമാര്‍ സ്വര്‍ണം നേടി. ഒരു മണിക്കൂര്‍ 27.25.47 സെക്കന്‍ഡിലാണ് സന്ദീപ് കുമാര്‍ ഫിനിഷ് ചെയ്തത്. ഇര്‍ഫാന്‍ ഒരു മണിക്കൂര്‍ 28:20.94 സെക്കന്‍ഡില്‍ രണ്ടാമനായി. ഉത്തരാഖണ്ടിന്റെ ചന്ദന്‍ സിങ്ങിനാണ് വെങ്കലം.

ട്രിപ്പിള്‍ ജമ്പില്‍ പഞ്ചാബിന്റെ അര്‍പീന്ദര്‍ സിങ് സ്വര്‍ണം ചാടിയെടുത്തു. ദൂരം 16.83 മീറ്റര്‍. കര്‍ണാടകത്തിന്റെ കാര്‍ത്തിക് (16.80) വെള്ളിയും തമിഴ്‌നാടിന്റെ മുഹമ്മദ് (16.79) വെങ്കലവും കരസ്ഥമാക്കി. കേരളത്തിന്റെ എല്‍ദോസ് നാലാം സ്ഥാനത്തേക്ക് പിന്തള്ളപ്പെട്ടു.

നാനൂറ് മീറ്റര്‍ ഹര്‍ഡില്‍സില്‍ മെഹ്ദി പിര്‍ജഹാന്‍ മീറ്റ് റെക്കോഡോടെ സ്വര്‍ണം നേടി. 49.33 സെക്കന്‍ഡിലാണ് ഫിനിഷ് ചെയ്ത്. ഇതോടെ 2018 ല്‍ ഗുവാഹത്തിയില്‍ ധരുണ്‍ കുറിച്ചിട്ട 49.68 സെക്കന്‍ഡിന്റെ റെക്കോഡാണ് വഴിമാറിയത്. റെക്കോഡ് തിരുത്തിയെങ്കിലും പിര്‍ജഹാന് ലോക ചാമ്പ്യന്‍ഷിപ്പിനുള്ള യോഗ്യതാ മാര്‍ക്ക് (49.30 സെ) മറിക്കടക്കാനായില്ല.

കര്‍ണാടകയുടെ ജഗദീഷ് ചന്ദ്ര വെള്ളിയും കേരളത്തിന്റെ ജിതിന്‍ പോള്‍ വെങ്കലും നേടി.

വനിതകളുടെ 400 മീറ്റര്‍ ഹര്‍ഡില്‍സില്‍ കര്‍ണാടകയുടെ അര്‍പിത മഞ്ജുനാഥ് 59.98 സെക്കന്‍ഡില്‍ ഒന്നാം സ്ഥാനം നേടി. തമിഴ്‌നാടിന്റെ ആരതി , ദിവ്യ എന്നിവര്‍ യഥാക്രമം രണ്ട്, മൂന്ന് സ്ഥാനങ്ങള്‍ നേടി. കേരളത്തിന്റെ സയന നാലാമതായി ഫിനിഷ് ചെയ്തു.

പുരുഷന്മാരുടെ ഇരുനൂറ് മീറ്ററില്‍ തമിഴ്‌നാടിന്റെ നിതിന്‍ സ്വര്‍ണം നേടി. ദല്‍ഹിയുടെ അക്ഷയ് വെളളിയും അഭിനവ് വെങ്കലവും കരസ്ഥമാക്കി. വനിതകളുടെ ലോങ് ജമ്പില്‍ തമിഴ്‌നാടിന്റെ നയന ജെയിംസ് സ്വര്‍ണം നേടി. ദൂരം 6.20 മീറ്റര്‍. ഝാര്‍ഖണ്ഡിന്റെ പ്രിയങ്ക വെള്ളിയും തമിഴ്‌നാടിന്റെ ഹര്‍ഷിനി വെങ്കലവും കരസ്ഥമാക്കി. 

പുരുഷന്മാരുടെ ഷോട്ട്പുട്ടില്‍ ഹരിയാനയുടെ ഇന്ദര്‍ജിത്ത് സിങ് സ്വര്‍ണം സ്വന്തമാക്കി. പഞ്ചാബിന്റെ ജസ്ദീപ് ധില്ല വെളളിയും രാജസ്ഥാന്റെ ശക്തി റാത്തോഡ് വെങ്കലവും നേടി.