പാറശ്ശാല: ഇഞ്ചിവിള നടുത്തോട്ടത്തില് കഞ്ചാവുകടത്തു സംഘം വീടുകയറി വൃദ്ധനെ ആക്രമിച്ച കേസില് പോലീസ് കസ്റ്റഡിയിലെടുത്ത സിപിഎം അനുഭാവിയായ ഓട്ടോഡ്രൈവറെ സ്റ്റേഷനില് കയറി ബലപ്രയോഗത്തിലൂടെ മോചിപ്പിക്കാന് വിഫലശ്രമം.
വൃദ്ധനെ ആക്രമിച്ച സംഘം സഞ്ചരിച്ച ഓട്ടോയും ഡ്രൈവറുമാണ് കസ്റ്റഡിയിലുള്ളത്. നടുത്തോട്ടം വാര്ഡു മെമ്പര് സജിന്റെ നേതൃത്വത്തിലുള്ള സിപിഎം, ഡിവൈഎഫ്ഐ പ്രവര്ത്തകരുടെ സംഘമാണ് സിഐ, എസ്ഐ എന്നിവരുടെ മുന്നില് നിന്നും ഓട്ടോഡ്രൈവറെ ബലപ്രയോഗത്തിലൂടെ മോചിപ്പിക്കാന് ശ്രമിച്ചത്. പോലീസിന്റെ കൃത്യമായ പ്രതിരോധം കാരണം ശ്രമം വിഫലമായി.
ഇഞ്ചിവിള നടുത്തോട്ടം മേഖല കേന്ദ്രീകരിച്ച് കഞ്ചാവ് കള്ളപ്പണ മാഫിയാ സംഘം സജീവമാണെന്ന ആക്ഷേപം പരക്കെയുണ്ട്. ഇത് ശരിവയ്ക്കുന്ന രഹസ്യറിപ്പോര്ട്ടുകളും നിരവധിയാണ്. കഞ്ചാവ്, കള്ളപ്പണ സംഘം അവരുടെ ഇടപാടുകള് മറച്ചുപിടിക്കാനായി പാറശ്ശാല മേഖലയില് ആസൂത്രിത അക്രമം അഴിച്ചുവിടുന്നതും പതിവാണ്. സിപിഎം ഉന്നതങ്ങളില് നിന്നുള്ള പിന്തുണ ഇത്തരക്കാര്ക്ക് ലഭിക്കുന്നതിനാല് നിയമം നോക്കുകുത്തിയാകുന്നതും കുറ്റക്കാര് രക്ഷപ്പെടുന്നതും സാധാരണ സംഭവം.
ഇത്തരം രഹസ്യ ഇടപാടുകള്ക്കെതിരെ ശബ്ദിക്കുന്നവരെ വീടുകയറി ആക്രമിക്കുക, കള്ളക്കേസില് കുടുക്കുക എന്ന തന്ത്രമാണ് പാര്ട്ടി പിന്തുണയോടെ നടപ്പാക്കി വരുന്നത്. സംഘപരിവാര് പ്രവര്ത്തകരാണ് ഇത്തരത്തില് പീഡിപ്പിക്കപ്പെടുന്നത്. കഴിഞ്ഞ അഞ്ചു മാസക്കാലയളവിനുള്ളില് അമ്പതോളം സംഘപരിവാര് പ്രവര്ത്തകരാണ് ഇത്തരത്തില് കള്ളക്കേസുകളില് പ്രതിയാക്കപ്പെട്ടിട്ടുള്ളത്.
സിപിഎം പ്രവര്ത്തകരുടെ പേരിലുള്ള കേസുകള് അന്വേഷണ വിധേയമാക്കില്ല എന്നതും ശ്രദ്ധേയമാണ്. അക്രമികള്ക്കു സിപിഎം നല്കുന്ന രാഷ്ട്രീയ സംരക്ഷണം പോലീസിനെയും നിസഹായരാക്കുന്നു.
