കൊളംബോ: ബംഗ്ലാദേശിനെതിരായ ഏകദിന പരമ്പര ശ്രീലങ്ക തൂത്തുവാരി. മൂന്നാമത്തെയും അവസാനത്തെയും മത്സരം 122 റണ്സിന് ജയിച്ചാണ് ശ്രീലങ്ക പരമ്പരയില് സമ്പൂര്ണ വിജയം കരസ്ഥമാക്കിയത്. ശ്രീലങ്ക ഉയര്ത്തിയ 295 റണ്സിന്റെ വിജയലക്ഷ്യം പിന്തുടര്ന്ന ബംഗ്ലാദേശ് 36 ഓവറില് 172 റണ്സിന് ഓള് ഔട്ടായി. സ്കോര് ശ്രീലങ്ക 50 ഓവറില് 294/8, ബംഗ്ലാദേശ് 36 ഓവറില് 172 ഓള് ഔട്ട്. പരമ്പരയിലുടനീളം മികച്ച പ്രകടനം നടത്തയ ഏയ്ഞ്ചലോ മാത്യൂസാണ് കളിയിലെയും പരമ്പരയിലെയും താരം. ആദ്യ ഏകദിനത്തില് 91 റണ്സിന് ജയിച്ച ലങ്ക രണ്ടാം ഏകദിനം ഏഴ് വിക്കറ്റിന് ജയിച്ചിരുന്നു.
കൂറ്റന് വിജയലക്ഷ്യം പിന്തുടര്ന്ന ബംഗ്ലാദേശിന് ഒരിക്കല്പോലും മത്സരത്തില് പ്രതീക്ഷ ഉയര്ത്താനായില്ല. 69 റണ്സെടുത്ത സൗമ്യ സര്ക്കാര് മാത്രമാണ് ബംഗ്ലാദേശിനായി പൊരുതിയത്. 39 റണ്സെടുത്ത് പുറത്താകാതെ നിന്ന വാലറ്റക്കാരന് തൈജുള് ഇസ്ലാമും ഭേദപ്പെട്ട പ്രകടനം നടത്തി.
ഇവരെ കൂടാതെ രണ്ട് പേര് കൂടി മാത്രമാണ് രണ്ടക്കം കടന്നത്. ഓപ്പണര് അനമുല് ഹഖ് (14), മുഷ്ഫിഖര് റഹിം (10) എന്നിവരാണ് രണ്ടക്കം കടന്ന മറ്റുള്ളവര്. തമീം ഇഖ്ബാല് (2), സാബിര് റഹ്മാന്(7), മുഹമ്മദ് മിഥുന് (4), മഹ്മദുള്ള (9), മെഹ്ദി ഹസ്സന് റാസ (8), ഷെയ്ഫുള് ഇസ്ലം (1), റൂബല് ഹൊസൈന് (2) എന്നിങ്ങനെയാണ് മറ്റുള്ളവരുടെ സ്കോര്. ലങ്കക്കായി ദസുന് സനക മൂന്ന് വിക്കറ്റെടുത്തപ്പോള് കാസുന് രജിതയും ലഹിരു കുമാരയും രണ്ട് വിക്കറ്റ് വീതം വീഴ്ത്തി.
നേരത്തെ ആദ്യം ബാറ്റ് ചെയ്ത ലങ്കക്കായി കരുണരത്നെ (46), കുശാല് പെരേര (42), കുശാല് മെന്ഡിസ് (54), എയ്ഞ്ചലോ മാത്യൂസ് (87), സനക (30) എന്നിവരുടെ ബാറ്റിങ് മികവിലാണ് ശ്രീലങ്ക 8 വിക്കറ്റ് നഷ്ടത്തില് 294 റണ്സെടുത്തത്.
