ബെംഗളൂരു: കര്‍ണാടക സ്പീക്കര്‍ കെ. ആര്‍. രമേഷ് കുമാര്‍ രാജിവച്ചു. യെദ്ദ്യൂരപ്പ സര്‍ക്കാര്‍ വിശ്വാസ വോട്ടെടുപ്പ് നേടിയ സാഹചര്യത്തിലാണ് രാജി.
സ്വമേധയാ സ്ഥാനം ഒഴിയുന്നുവെന്ന് അറിയിച്ച രമേശ് കുമാര്‍, സ്പീക്കര്‍ എന്ന നിലയില്‍ മാനസികമായി സമ്മര്‍ദ്ദത്തില്‍പ്പെട്ടാണ് കാര്യങ്ങളെല്ലാം ചെയ്തതെന്നും വിഷാദത്തിന്റെ കടലില്‍ താന്‍ വീണുപോയെന്നും രാജിക്ക് പിന്നാലെ അദ്ദേഹം പറഞ്ഞു.
സ്പീക്കര്‍ രാജി സമര്‍പ്പിച്ചതോടെ സഭ ഇന്നത്തേയ്ക്ക് പിരിഞ്ഞു. രാവിലെ പത്തിനാണ് നിയമസഭ ചേര്‍ന്നത്. ശേഷമായിരുന്നു വിശ്വാസവോട്ടെടുപ്പ്. ശബ്ദവോട്ടോടെയാണ് യെദ്യൂരപ്പ സര്‍ക്കാര്‍ വിശ്വാസവോട്ട് നേടിയത്. വിശ്വാസവോട്ട് നേടിയതോടെ ആറ് മാസത്തേക്ക് ബി.എസ് യെദ്യൂരപ്പ സര്‍ക്കാര്‍ ഭരണം ഉറപ്പിച്ചു.
കര്‍ണാടകയുടെ 19ാമത് മുഖ്യമന്ത്രിയായി കഴിഞ്ഞ വെള്ളിയാഴ്ചയാണ് ബി.എസ്. യെദിയൂരപ്പ അധികാരമേറ്റത്. എന്നാല്‍, ജനങ്ങളുടെ വിശ്വാസം തകര്‍ക്കില്ലെന്നും പ്രതിപക്ഷവുമായി സഹകരിച്ച് പ്രവര്‍ത്തിക്കാമെന്നാണ് കരുതുന്നതെന്നും യെദ്ദ്യൂരപ്പ പറഞ്ഞു.
നാലാം തവണയാണ് യെദിയൂരപ്പ സംസ്ഥാനത്തിന്റെ മുഖ്യമന്ത്രിയാവുന്നത്. കഴിഞ്ഞ വെള്ളിയാഴ്ച മുഖ്യമന്ത്രി യെദ്ദ്യൂരപ്പ മാത്രമാണ് സത്യപ്രതിജ്ഞ ചെയ്ത് അധികാരമറ്റത്. സഭയില്‍ ഭൂരിപക്ഷം തെളിയിച്ചതോടെ മന്ത്രിസഭയിലെ അംഗങ്ങളെയും വകുപ്പുകളും പ്രഖ്യാപിക്കാനുള്ള നടപടിയിലേക്ക് കടന്നിരിക്കുകയാണ് ബിജെപി. വിശ്വാസവോട്ടിന് പിന്നാലെ ധനബില്ലിന് അംഗീകാരം നല്‍കുകയും ചെയ്തിട്ടുണ്ട്.
