ന്യൂദല്ഹി: വിദേശ കാര്യ മന്ത്രാലയത്തിന്റെ ശക്തമായ ഇടപെടലിനെ തുടര്ന്ന് ഇറാന് പിടിച്ചെടുത്ത എംടി റിയ എന്ന കപ്പലിലുണ്ടായിരുന്ന 12 ഇന്ത്യക്കാരില് ഒമ്പത് പേരെ വിട്ടയച്ചു. ക്യാപ്റ്റനടക്കം മൂന്ന് പേരെ വിട്ടയച്ചിട്ടില്ല. ജൂലായ് 14നാണ് ഇറാന് കപ്പല് പിടിച്ചെടുത്തത്. യുഎഇ കേന്ദ്രമായി പ്രവര്ത്തിക്കുന്ന കെആര്ബി പെട്രോകെമിക്കല്സ് കമ്പനി വാടകയ്ക്കെടുത്തതാണ് എംടി റിയ. എണ്ണക്കടത്ത് ആരോപിച്ച് ഈ മാസമാദ്യമാണ് ഇറാന് കപ്പല് പിടിച്ചെടുത്തതെന്നാണ് വിവരം.
അതേ സമയം കഴിഞ്ഞ ആഴ്ച ഹോര്മുസ് കടലിടുക്കില് ഇറാന് പിടിച്ചെടുത്ത ബ്രിട്ടീഷ് കപ്പലായ സ്റ്റെന ഇംപേരോയിലെ 18 ജീവനക്കാരെ ഇതുവരെ വിട്ടയച്ചിട്ടില്ല. 3 മലയാളികളടക്കം 18 ഇന്ത്യക്കാരാണു കപ്പലിലുള്ളത്. ഇവരടക്കം രണ്ട് കപ്പലുകളിലായി 21 ഇന്ത്യക്കാര് ഇപ്പോള് ഇറാനിലുണ്ട്.
ഇതിനിടെ സ്റ്റെന ഇംപേരോയിലെ ജീവനക്കാര്ക്ക് ഇന്ത്യന് കോണ്സലുമായി ബന്ധപ്പെടുന്നതിന് അവസരം ലഭിച്ചു. ഇതില് നാല് മലയാളികളുണ്ട്.ഇത് കൂടാതെ ജൂലായ് നാലിന് മെഡിറ്ററേനിയന് കടലില് നിന്ന് പിടിച്ചെടുത്ത ഇറാന് ടാങ്കറായ ഗ്രേസ് ഒന്നില് 24 ഇന്ത്യക്കാരുണ്ട്. ഇവര് സുരക്ഷിതരാണെന്ന് ബ്രിട്ടന് കഴിഞ്ഞ ദിവസം അറിയിച്ചിരുന്നു.
സ്റ്റെന ഇംപോറയിലെ ജീവനക്കാര്ക്ക് ഇന്ത്യന് കോണ്സലുമായി ബന്ധപ്പെടുന്നതിന് അവസരം ലഭിച്ചതായി വിദേശകാര്യ സഹമന്ത്രി വി.മുരളീധരന് പറഞ്ഞു. കുടുങ്ങിക്കിടക്കുന്ന എല്ലാം ഇന്ത്യക്കാരുടെയും മോചനത്തിനുള്ള ശ്രമം തുടരുകയാണെന്നു വിദേശകാര്യ മന്ത്രാലയ വക്താവ് രവീഷ് കുമാര് അറിയിച്ചു.
