തിരുവനന്തപുരം: ശബരിമലയെയും ആചാരങ്ങളെയും ഫേസ്ബുക്കിലൂടെ അപമാനിച്ച പാപ്പനംകോട് സ്വദേശിയും ആര്ബിഐ ഉദ്യോഗസ്ഥനുമായ വി.കെ നാരായണനെതിരെ കേസെടുക്കാന് തിരുവനന്തപുരം ജുഡിഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി ഉത്തരവിട്ടു. 2018 സെപ്തമ്പറില് തന്റെ ഫെയ്സ്ബുക്ക് പേജില് പോസ്റ്റ് ചെയ്തതിനെതിരെ ബിജെപി പാപ്പനംകോട് ബൂത്ത് പ്രസിഡന്റ് ശ്രീപ്രകാശ് തിരുവനന്തപുരം സിറ്റി പോലീസ് കമ്മീഷണര്ക്ക് പരാതി കൊടുത്തെങ്കിലും സിപിഎം അനുഭാവി ആയതിനാല് കേസെടുക്കാതെ പരാതി അവഗണിച്ചു.
‘കക്കൂസില് പോകുന്ന ഭാവത്തിലാണ് ശബരിമലയിലെ പ്രതിഷ്ഠ. തത്വമസി ബോര്ഡ് മാറ്റി ജെന്സ് ടോയിലറ്റ് എന്ന് ആക്കിയാല് യുവതികളെ വിലക്കാം’ എന്ന തരത്തില് ശബരിമല സന്നിധാനത്തെയും അയ്യപ്പ പ്രതിഷ്ഠയേയും വളരെ മോശമായി ചിത്രീകരിക്കുന്നതായിരുന്നു വി.കെ നാരായണന് പോസ്റ്റിലൂടെ. മാത്രമല്ല ഹിന്ദു ആചാരാനുഷ്ഠാനങ്ങളെ അപമാനിക്കുന്ന തരത്തില് മറ്റ് പോസ്റ്റുകളും പ്രതി ഫെയ്സ് ബുക്ക് പേജു വഴി പ്രചരിപ്പിച്ചിരുന്നു. പോലീസ് നടപടി സ്വീകരിക്കാത്തതിനാലാണ് കോടതിയെ സമീപിച്ചത്.
പ്രതിക്കെതിരെ പ്രഥമദൃഷ്ട്യാ കേസ് കോടതിക്ക് ബോധ്യപ്പെട്ടതിന്റെ അടിസ്ഥാനത്തില് ഇന്ത്യന് ശിക്ഷാ നിയമം 295,295എ എന്നീ ജാമ്യമില്ലാ വകുപ്പുകള് പ്രകാരം കേസെടുത്ത് ഒക്ടോബര് 5ന് പ്രതി കോടതിയില് നേരിട്ട് ഹാജരാകുന്നതിന് ഉത്തരവിട്ടു. പരാതിക്കാരനു വേണ്ടി ബിജെപി തിരുവനന്തപുരം ലീഗല് സെല് കണ്വീനര് അഡ്വ: രാജ് മോഹന് ജി ജെ, യുവമോര്ച്ച സംസ്ഥാന വൈസ് പ്രസിഡന്റ് അഡ്വ:ആര് എസ് രാജീവ്, അഡ്വ: പ്രകാശ് ആര്.സി എന്നിവര് ഹാജരായി.
