തിരുവനന്തപുരം: സംസ്ഥാനത്ത് വരും ദിവസങ്ങളില് കനത്ത മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. അഞ്ച് ജില്ലകളില് റെഡ് അലര്ട്ട് പ്രഖ്യാപിച്ചിട്ടുണ്ട്. ജൂലൈ 18 ന് ഇടുക്കി, ജൂലൈ 19 ന് പത്തനംതിട്ട, കോട്ടയം, ഇടുക്കി എന്നീ ജില്ലകളിലും, ജൂലൈ 20 ന് ഇടുക്കി, ജൂലൈ 21ന് കണ്ണൂര് എന്നി ജില്ലകളിലുമാണ് കേന്ദ്ര കാലാവസ്ഥ നിരീക്ഷണ കേന്ദ്രം ‘റെഡ്’ അലര്ട്ട് പ്രഖ്യാപിച്ചിരിക്കുന്നത്.
റെഡ് പ്രഖ്യാപിക്കപ്പെട്ട ജില്ലകളില് അതിതീവ്ര ( മണിക്കൂറില് 204 മിമി ല് കൂടുതല് മഴ) മഴയ്ക്കുള്ള സാധ്യതയുണ്ട്. സര്ക്കാര് സംവിധാനങ്ങളും പൊതുജനങ്ങളും ജാഗ്രത പാലിക്കുക, ക്യാമ്പുകള് തയ്യാറാക്കുന്നതുള്പ്പെടെയുള്ള മുന്നൊരുക്കങ്ങള് നടത്തുക എന്നിവയാണ് റെഡ് അലേര്ട്ട് കൊണ്ട് ഉദ്ദേശിക്കുന്നത്. തുടര്ച്ചയായ ദിവസങ്ങളില് അതിതീവ്ര മഴ പെയ്യുന്ന സാഹചര്യത്തില് വെള്ളപ്പൊക്കം, ഉരുള്പൊട്ടല് തുടങ്ങിയ പ്രകൃതി ദുരന്തങ്ങള്ക്ക് സാധ്യത വര്ധിക്കും.
ജൂലൈ 19 ന് ആലപ്പുഴ, എറണാകുളം എന്നീ ജില്ലകളിലും ജൂലൈ 20 ന് എറണാകുളം ജില്ലയിലും ജൂലൈ 21ന് ഇടുക്കി, എറണാകുളം ജില്ലകളിലും കേന്ദ്ര കാലാവസ്ഥ നിരീക്ഷണ കേന്ദ്രം ‘ഓറഞ്ച്’ അലര്ട്ടും പ്രഖ്യാപിച്ചിട്ടുണ്ട്. ഓറഞ്ച് അലര്ട്ട് പ്രഖ്യാപിക്കപ്പെട്ട ജില്ലകളില് ഒറ്റപ്പെട്ടയിടങ്ങളില് ശക്തമായതോ (115മിമി വരെ മഴ) അതിശക്തമായതോ (115മിമി മുതല് 204.5 മിമി വരെ മഴ) ആയ മഴയ്ക്കുള്ള സാധ്യതയുണ്ട്. സര്ക്കാര് സംവിധാനങ്ങളും പൊതുജനങ്ങളും ജാഗ്രത പാലിക്കുവാനുള്ള മുന്നറിയിപ്പാണ് ഓറഞ്ച് അലേര്ട്ട് കൊണ്ട് ഉദ്ദേശിക്കുന്നത്.
yellow alert പ്രഖ്യാപിച്ച ജില്ലകള്
ജൂലൈ 18 : തിരുവന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശ്ശൂര്, പാലക്കാട്, മലപ്പുറം, കോഴിക്കോട്, വയനാട്,കണ്ണൂര് കാസര്ഗോഡ്.
ജൂലൈ 19 : തിരുവന്തപുരം, കൊല്ലം, തൃശ്ശൂര്, പാലക്കാട്, മലപ്പുറം, കോഴിക്കോട്, വയനാട്,കണ്ണൂര് കാസര്ഗോഡ്.
ജൂലൈ 20 : പത്തനംതിട്ട, ആലപ്പുഴ, കോട്ടയം, തൃശ്ശൂര്, മലപ്പുറം, കോഴിക്കോട്, വയനാട്,കണ്ണൂര്.
ജൂലൈ 21 : കൊല്ലം, പത്തനംതിട്ട, ആലപ്പുഴ, കോട്ടയം, തൃശ്ശൂര്, മലപ്പുറം, കോഴിക്കോട്, വയനാട്, കാസര്ഗോഡ്.
ജൂലൈ 22 : ഇടുക്കി, കോഴിക്കോട്, കണ്ണൂര്, കാസര്ഗോഡ്.
ബന്ധപ്പെട്ട സര്ക്കാര് വകുപ്പുകളോടും ഉദ്യോഗസ്ഥരോടും തയ്യാറെടുപ്പുകള് നടത്താനും താലൂക്ക് തലത്തില് കണ്ട്രോള് റൂമുകള് ആരംഭിക്കുവാനുമുള്ള നിര്ദേശം സംസ്ഥാന ദുരന്ത നിവാരണ അതോറിറ്റി നല്കിയിട്ടുണ്ട്.
