കൊച്ചി: ജന്മഭൂമി ലെജന്ഡ് ഓഫ് കേരള പുരസ്കാരം മഹാകവി അക്കിത്തത്തിന്. സമഗ്രസംഭാവനകള് പരിഗണിച്ചാണ് മഹാപ്രതിഭാപുരസ്കാരം നല്കി ജന്മഭൂമി ആദരിക്കുന്നത്. തൃശ്ശൂര് വടക്കുംനാഥക്ഷേത്രമൈതാനത്ത് 20ന് വൈകിട്ട് നടക്കുന്ന ആഘോഷരാവില് പുരസ്കാരം സമര്പ്പിക്കും.
കേരളത്തിന്റെ സാംസ്കാരികരംഗത്ത് രൂപംകൊണ്ട അധികാരകേന്ദ്രങ്ങളെ കൂസാത്ത നിസ്വന്റെ പ്രതികരണങ്ങളാണ് മഹാകവി അക്കിത്തത്തിന്റെ കവിതകളുടെ തന്റേടമായി വിലയിരുത്തപ്പെട്ടത്. ഇരുപതാം നൂറ്റാണ്ടിന്റെ ഇതിഹാസത്തിലൂടെ കേരളത്തെ ആകെ തിരുത്തുകയായിരുന്നു കവി. എഴുത്തുകാരന്റെ ചേരി സര്ഗാത്മകതയുടേതാണെന്ന് ഉറക്കെ പ്രഖ്യാപിച്ച് കന്യാകുമാരി മുതല് ഗോകര്ണം വരെ അക്കിത്തത്തിന്റെ നേതൃത്വത്തില് തപസ്യ നടത്തിയ സാംസ്കാരിക തീര്ത്ഥയാത്ര മഹാകവിയിലെ സാമൂഹ്യ സാംസ്കാരിക നായകന്റെ തിരനോട്ടമായിരുന്നു.
പക്ഷമില്ലാത്തവന്റെ പക്ഷം ഉയര്ത്തിപ്പിടിച്ച രചനകളും നിലപാടുകളും കാരണം പലപ്പോഴും പലരും അവഗണിക്കാന് പരിശ്രമിച്ചിട്ടും അക്കിത്തം പ്രതിഭ കൊണ്ട് പ്രശസ്തിയുടെ ഹിമാലയം താണ്ടി. ശ്രീമദ് ഭാഗവതത്തെ മലയാളത്തിലേക്ക് പകര്ത്തി വായനക്കാരന് സമര്പ്പിച്ച മലയാള സാഹിത്യത്തിലെ ഇതിഹാസത്തിനാണ് ഇക്കുറി ജന്മഭൂമി പുരസ്കാരം. പത്മശ്രീ, മൂര്ത്തീദേവി പുരസ്കാരം, എഴുത്തച്ഛന് പുരസ്കാരം, കേന്ദ്ര, കേരള സാഹിത്യ അക്കാദമി അവാര്ഡുകള്, സഞ്ജയന് പുരസ്കാരം, വയലാര്, വള്ളത്തോള്, ആശാന് അവാര്ഡുകള് ഓടക്കുഴല് പുരസ്കാരം തുടങ്ങി നിരവധി അവാര്ഡുകള് മഹാകവിയെ തേടിയെത്തിയിട്ടുണ്ട്.
ഇ. ശ്രീധരന്, മോഹന്ലാല്, മധു, കോട്ടയക്കല് പി കെ വാര്യര് തുടങ്ങിയവരാണ് ഇതിന് മുമ്പ് ലെജന്റ്സ് ഓഫ് കേരള പുരസ്കാരത്തിന് അര്ഹരായത്. കുടുംബത്തില് നിന്ന് ലഭിക്കുന്ന അംഗീകാരത്തില് സന്തോഷം ഏറെയുണ്ടെന്ന് പുരസ്ക്കാരത്തിന് തെരഞ്ഞെടുത്ത കാര്യം അറിയിച്ചപ്പോള് അക്കിത്തം പ്രതികരിച്ചു. ആരോഗ്യ പ്രശ്നങ്ങല് ഉണ്ടെങ്കിലും തൃശ്ശൂരില് നേരിട്ടെത്തി പുരസ്ക്കാരം സ്വീകരിക്കുമെന്നും മഹാകവി പറഞ്ഞു.
