തിരുവനന്തപുരം: യൂണിവേഴ്സിറ്റി കോളേജില് നടക്കുന്ന സംഭവങ്ങളുടെ പശ്ചാത്തലത്തില് യൂണിവേഴ്സിറ്റി കോളേജിന്റെ ചാന്സലര് കൂടിയായ ഗവര്ണര് അടിയന്തരമായി ഇടപെട്ട് അന്വേഷണം നടത്തണമെന്ന് ബിജെപി ദേശീയ നിര്വാഹക സമിതിയംഗം പി.കെ. കൃഷ്ണദാസ്. യൂണിവേഴ്സിറ്റി കോളേജ് മയക്കുമരുന്നിന്റെ കേന്ദ്രമാണ്. യൂണിവേഴ്സിറ്റി കോളേജില് നടക്കുന്ന പിഎസ്സി പരീക്ഷകളില് ക്രമക്കേട് നടന്നിട്ടുണ്ടെങ്കില് അതിനെതിരെ നടപടിയെടുക്കണമെന്നും അദ്ദേഹം ആവശ്യപ്പെട്ടു.
എസ്എഫ്ഐയുടെ ആക്രമണത്തില് പരിക്കേറ്റ് ചികിത്സയില് കഴിയുന്ന അഖിലിനെ മെഡിക്കല് കോളേജ് ആശുപത്രിയില് സന്ദര്ശിച്ചശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. ആര്ക്കും നിയന്ത്രിക്കാന് പറ്റാത്ത അവസ്ഥയിലാണ് യൂണിവേഴ്സിറ്റി കോളേജിന്റെ ഇപ്പോഴത്തെ അവസ്ഥ. സിപിഎമ്മുകാര്ക്ക് അടിമകളായി നില്ക്കുന്ന പ്രിന്സിപ്പാള്മാരെയാണ് ഇവിടെ നിയമിക്കുന്നത്.
അഖിലിനെ ആക്രമിച്ച പ്രതികളെ പിടികൂടുന്നതിനായി യൂണിവേഴ്സിറ്റി സ്റ്റുഡന്റ്സ് സെന്ററും യൂണിവേഴ്സിറ്റി ഹോസ്റ്റലും റെയ്ഡ് ചെയ്യാന് പോലീസ് തയാറായപ്പോള് മുഖ്യമന്ത്രിയുടെ ഓഫീസ് ഇടപെട്ടാണ് ഇതിനെ തടഞ്ഞത്. ഇതില് പോലീസുകാര്ക്ക് തന്നെ അതൃപ്തിയുണ്ട്. യൂണിവേഴ്സിറ്റി കോളേജിനെ എസ്എഫ്ഐ അധോലോകമാക്കി മാറ്റി. എസ്എഫ്ഐ ഇപ്പോള് ഒരു വിദ്യാര്ഥി സംഘടനയല്ല, ഐഎസിനെ പോലെ ഒരു ഭീകരസംഘടനയായാണ് പ്രവര്ത്തിക്കുന്നതെന്നും പി.കെ. കൃഷ്ണദാസ് പറഞ്ഞു. മഹിളാമോര്ച്ച സംസ്ഥാന പ്രസിഡന്റ് വി.ടി രമ, ബിജെപി ജില്ലാ പ്രസിഡന്റ് അഡ്വ.എസ്. സുരേഷ്, ജില്ലാ വൈസ് പ്രസിഡന്റുമാരായ പൂന്തുറ ശ്രീകുമാര്, മുക്കുംപാലംമൂട് ബിജു, മഹിളാമോര്ച്ച ജില്ലാ പ്രസിഡന്റ് വലിയശാല ബിന്ദു തുടങ്ങിയവര് അദ്ദേഹത്തോടൊപ്പം ഉണ്ടായിരുന്നു.
