ന്യൂദല്ഹി : കരസേനാ മേജര് ജനറലിനെ ആയുധ നിര്മാണശാലയുടെ സിഇഒ ആയി നിയമിക്കാന് തീരുമാനം. അമേത്തിയിലെ എകെ 47 പോലെയുള്ള അന്റന് കലഷ്നിക്കോവ് യന്ത്രത്തോക്ക് നിര്മാണ കമ്പനിയുടെ സിഇഒ ആയി കരസേനാ മേധാവിയെ നിയമിക്കാനാണ് തീരുമാനിച്ചിരിക്കുന്നത്.
കരസേന മേധാവി ബിപിന് റാവത്തിന്റെ നിര്ദ്ദേശ പ്രകാരമാണ് മേജര് ജനറലിനെ ആയുധ നിര്മാണ കമ്പനിയുടെ സിഇഒ ആയി നിയമിക്കാന് തീരുമാനിച്ചത്. ലോകരാഷ്ട്രങ്ങള്ക്കിടയില് തന്നെ അപൂര്വ്വങ്ങളില് അപൂര്വ്വമായ ഈ തീരുമാനത്തിന് കൈയ്യടിച്ച് പിന്തുണ നല്കിയിരിക്കുകയാണ് പ്രതിരോധ വിദഗ്ധര്. മേജര് ജനറല് സഞ്ജീവ് സെങ്ഗാറിനെയാണ് നിലവില് ഈ പദവിയിലേക്ക് നിയമിക്കുന്നത്. കൊര്വ ആയുധനിര്മ്മാണശാലയുടെ സിഇഒ നാലു വര്ഷത്തേയ്ക്കാണ് ഇദ്ദേഹം നിയമിതനാകുന്നത്.
എകെ 47 പോലെയുള്ള അന്റന് കലഷ്നിക്കോവ് യന്ത്രത്തോക്കുകള് നിര്മിക്കുന്ന ഇന്ത്യ റഷ്യ സംയുക്ത ആയുധനിര്മ്മാണശാലയുടെ തലപ്പത്തേയ്ക്ക് സര്വീസിലിരിക്കുന്ന ഒരു മേജര് ജനറല് എത്തുന്നത് അപൂര്വമാണ്. കരസേനാ മേധാവി ആയിരിക്കെ ബിപിന് റാവത്ത് എടുത്ത സുപ്രധാന തീരുമാനങ്ങളില് ഒന്നാണ് ഇതും.
കലഷ്നിക്കോവ് എകെ 203 എന്ന പുതിയ ഇന്ത്യ റഷ്യ സംയുക്ത നിര്മ്മാണത്തിലുള്ള യന്ത്രത്തോക്ക് ഏറ്റവും മികച്ച ഗുണനിലവാരത്തില്ത്തന്നെ നിര്മിക്കണമെന്ന കേന്ദ്ര തീരുമാനത്തെ തുടര്ന്നാണ് മേജര് ജനറലിനെ തന്നെ ഇതിന്റെ മേധാവിയായി നിയമിക്കുന്നത്.
സുരക്ഷാ സേനകളില് നിന്നുതന്നെ അതിന്റെ നിയന്ത്രണമുണ്ടാകുന്നത് നന്നായിരിക്കുമെന്ന കരസേനാമേധാവിയുടെ നിര്ദ്ദേശമനുസ്സരിച്ചാണ് ആ ചുമതല മേജര് ജനറല് സഞ്ജീവ് സെങ്ഗാറിനെ ഏല്പ്പിച്ചത്. ഓര്ഡിനന്സ് ഫാക്ടറി ബോര്ഡിന്റേയും കലഷ്നിക്കോവ് കമ്പനിയുടെയും സംയുക്ത സംരംഭമാണ് അമേഠിയിലെ ഇന്തോ റഷ്യ റൈഫിള്സ് കമ്പനി. ഏഴുലക്ഷത്തി അമ്പതിനായിരം എകെ 203 തോക്കുകള് സേനകള്ക്കായി നിര്മിക്കാനാണ് ആദ്യഘട്ട പദ്ധതി.
എകെ 203 നോടൊപ്പം അമേരിക്കയിലെ സിങ് സോയര് കമ്പനിയുടെ സിങ് 716 യന്ത്രത്തോക്കുകളും ഇന്ത്യന് സേനയ്ക്ക് വേണ്ടി വാങ്ങാന് ഉദ്ദേശിച്ചിട്ടുണ്ട്. അതുകൂടിയാകുന്നതോടെ യുദ്ധമുന്നണിയിലുള്ള ഇന്ത്യന് സുരക്ഷാസൈനികര്ക്ക് ഏറ്റവും മികച്ച ആയുധങ്ങള് തന്നെയാകും ലഭിക്കുകയെന്ന് പ്രതിരോധകേന്ദ്രങ്ങള് അഭിപ്രായപ്പെട്ടു.
