വാരാണസി : സര്ക്കാരിനെതിരെ പ്രതിപക്ഷം രേഖപ്പെടുത്തുന്ന എതിര്പ്പുകള് തന്റെ നിശ്ചയദാര്ഢ്യത്തെ ശക്തിപ്പെടുത്തുകയാണ് ചെയ്യുന്നതെന്ന് പ്രധാനമന്ത്രി നരേന്ദ്രമോദി. വാരാണസിയില് ബിജെപി അംഗത്വ വിതരണത്തിന്റെ ഉദ്ഘാടനം നിര്വ്വഹിക്കവേയാണ് മോദി ഇക്കാര്യം അറിയിച്ചത്.
പ്രതിപക്ഷം ഉയര്ത്തുന്ന പല പ്രതിസന്ധികളിലും പുത്തന് അവസരങ്ങള് കണ്ടെത്താനാകും. ഇന്ത്യക്ക് അഞ്ച് ലക്ഷം കോടി ഡോളര് എന്ന ലക്ഷ്യത്തിലേക്ക് എത്താന് കഴിയില്ലെന്ന് പറയുന്നവര് രാജ്യത്തിന്റെ കഴിവിനെ ചോദ്യം ചെയ്യുകയാണ്.
ബജറ്റിന് ശേഷം എല്ലാവരും ചര്ച്ച ചെയ്യുന്നത് അഞ്ച് ലക്ഷം കോടി ഡോളര് സമ്പദ്വ്യവസ്ഥയെക്കുറിച്ചാണ്. സാധാരണക്കാരനെ സംബന്ധിച്ചിടത്തോളം എന്താണീ അഞ്ച് ലക്ഷം കോടി ഡോളര് സമ്പദ് വ്യവസ്ഥയെന്ന് ബിജെപി പ്രവര്ത്തകര് മനസ്സിലാക്കണം. അത് മറ്റുള്ളവരെ അറിയിക്കുകയും വേണം. ചിലര് പറയുന്നത് ഈ ലക്ഷ്യത്തിലേക്ക് എത്താന് നമുക്ക് കഴിയില്ലെന്നാണ്. അവര് ഇന്ത്യയുടെ കഴിവിനെ ചോദ്യം ചെയ്യുകയാണ്. കുറച്ച് വൈകിയാലും ആ ലക്ഷ്യത്തിലേക്കെത്താന് കഴിയുമെന്ന് ഉറപ്പുണ്ട്. വരാണസിയില് ബിജെപിയുടെ അംഗത്വവിതരണം ഉദ്ഘാടനം ചെയ്ത് മോദി പറഞ്ഞു.
സാധാരാണക്കാരന് ധനികനാകുന്നതാണ് പുതിയ ഇന്ത്യ. പഴയ ഇന്ത്യ നടക്കുകയായിരുന്നെങ്കില് ഇപ്പോള് അത് ഓടുകയാണ്. കര്ഷകരുടെ ക്ഷേമം ഉറപ്പുവരുത്തുന്നതാണ് ഇത്തവണത്തെ ബജറ്റ്. കര്ഷകര്ക്ക് അവരുടെ ഉത്പ്പന്നങ്ങള്ക്ക് അര്ഹമായ വില ലഭിക്കും. കര്ഷകര്ക്ക് വേണ്ടി കയറ്റുമതി വ്യവസ്ഥകള് കൂടുതല് ലളിതമാക്കിയിട്ടുണ്ട്. മത്സ്യത്തൊഴിലാളികള്ക്കും വലിയ നേട്ടമാണ് ബജറ്റിലെ നിര്ദ്ദേശങ്ങളെന്നും പ്രധാനമന്ത്രി അഭിപ്രായപ്പെട്ടു.
വെള്ളത്തിന്റെ ദുരുപയോഗം തടഞ്ഞ് വെള്ളം ആവശ്യത്തിന് മാത്രം ഉപയോഗിക്കുന്ന രീതിയിലേക്ക് രാജ്യം മാറണം. വെള്ളം പാഴാക്കാതെയുള്ള കൃഷിരീതിയിലേക്ക് മാറാന് നമുക്ക് കഴിയണം. സുന്ദര ഭാരതമാകുമ്പോള് ഒരുപാട് വിനോദ സഞ്ചാരികള് ഇവിടേക്ക് എത്തും. വലിയ തൊഴില് സാധ്യതകള് അതിലൂടെ ഉണ്ടാകും. ഹോംസ്റ്റേകളാണ് ഇന്നത്തെ പ്രധാന ആകര്ഷണം. കാശിയില് ഹോംസ്റ്റേകള്ക്കായി ഒരുപാട് പേര് വരും. അടിസ്ഥാന സൗകര്യ വികസനം സമ്പദ്വ്യവസ്ഥയില് പ്രധാനമാണെന്നും മോദി കൂട്ടിച്ചേര്ത്തു.
