ചണ്ഡീഗഢ് : രാഹുല് ഗാന്ധിക്ക് പകരമായി ഒരു യുവനേതാവ് കോണ്ഗ്രസ് അധ്യക്ഷനാവണമെന്ന് പഞ്ചാബ് മുഖ്യമന്ത്രി അമരീന്ദര് സിങ്. കോണ്ഗ്രസ് അധ്യക്ഷ സ്ഥാനത്ത് നിന്നുള്ള രാഹുല് ഗാന്ധിയുടെ രാജി അങ്ങേയറ്റം നിര്ഭാഗ്യകരമാണ്. രാഹുലിന് പകരമായി ഊര്ജ്ജസ്വലനായ ഒരു നേതാവ് പാര്ട്ടിയുടെ നേതൃത്വം ഏറ്റെടുക്കണമെന്നാണ് തന്റെ അഭിപ്രായമെന്നും അദ്ദേഹം അറിയിച്ചു.
രാഹുലിന് പകരമായി വരുന്നത് ഊര്ജസ്വലനായ ഒരു നേതാവായിരിക്കണം. രാജ്യത്തെ മുഴുവന് യുവത്വത്തേയും പ്രതിനിധീകരിക്കാനും താഴെത്തട്ടിലുള്ള പ്രവര്ത്തകര്ക്ക് ഊര്ജം നല്കി മുന്നോട്ട് കൊണ്ടു പോകാനും കഴിവുള്ളയാളെയാണ് പ്രവര്ത്തകസമിതി കണ്ടെത്തേണ്ടത്.
ലോക്സഭാ തെരഞ്ഞെടുപ്പില് കോണ്ഗ്രസ് ദയനീയ പരാജയം ഏറ്റുവാങ്ങിയതോടെ രാഹുല് ഗാന്ധി രാജി പ്രഖ്യാപനം നടത്തിയതാണ്.
എന്നാല് രണ്ട് ദിവസം മുന്പ് തീര്ത്തും നാടകീയമായി രാഹുല് ഗാന്ധി തന്റെ രാജിക്കത്ത് പരസ്യപ്പെടുത്തിയതോടെ പുതിയ അധ്യക്ഷന് വേണ്ടിയുള്ള ചര്ച്ചകള് പാര്ട്ടിക്കുള്ളില് സജീവമായി. പാര്ട്ടിക്കുള്ളില് അടിമുടി അഴിച്ചു പണിയുണ്ടാവും എന്നാണ് സംഘടനാ ചുമതലയുള്ള എഐസിസി ജനറല് സെക്രട്ടറി കെസി വേണുഗോപാല് കഴിഞ്ഞ ദിവസം പറഞ്ഞത്.
നിലവിലെ അധ്യക്ഷന് രാജിവച്ച സ്ഥിതിക്ക് പ്രവര്ത്തകസമിതിയിലെ മുതിര്ന്ന അംഗത്തിനായിരിക്കും അധ്യക്ഷന്റെ താല്കാലിക ചുമതല എന്നാണ് സൂചന.
